Սուպերվարչապետությունը պոզով-պոչով է լինո՞ւմ

Նիկոլ Փաշինյանը սիրում է կրկնել, որ Հայաստանում սուպերվարչապետական համակարգը վերացել է Սերժ Սարգսյանի գնալուց հետո, որ այդ համակարգը «սուպեր» դարձնողը հենց Սերժ Սարգսյանն էր:
Բայց Փաշինյանի այս պնդումն առաջինը քանդուքարափ անողը նրա թիմն է՝ խորհրդարանի իշխող ուժը: Ամիսներ շարունակ մենք տարբեր հարցերի շուրջ ականատեսն ենք լինում Առողջապահության նախարար Արսեն Թորոսյանի եւ պատգամավորների մի խմբի անթաքույց հակամարտությանը: Խումբը ղեկավարում է Արարատ Միրզոյանի սանիկ Նարեկ Զեյնալյանը, մամուլում տեղեկություններ կան, որ նա նախարարական հավակնություններ ունի: Բայց մի կողմ թողնելով անձնական ամբիցիաներն ու վերաբերմունքը, պետք է փաստենք, որ պատգամավորների այդ խումբը հաճախ այնքան խիստ է քննադատում նախարարին ու նրա նախաձեռնությունները, որ գործադիրը ստիպված է լինում հետաձգել նախարարի ընդունած որոշումները: Սա եղավ ծննդատները փակելու նախաձեռնության, որոշ առողջապահական հիմնարկներն օպտիմալացնելու եւ այլ հարցերի շուրջ: Այսօր հերթը ՁԻԱՀ կանխարգելման հանրապետական կենտրոնի միավորմանն էր:

Ինչպես հայտնի է՝ Արսեն Թորոսյանը որոշել է այն միավորել Նորքի ինֆեկցիոն հիվանդանոցին: Մի քանի օր առաջ կենտրոնի նախագահին խայտառակ ձեւով հեռացրեցին, հիմա աշխատակիցներն ընդվզում են ոչ միայն տնօրենին հեռացնելու ու նոր տնօրեն նշանակելու, այլեւ բուժհաստատությունները միավորելու քայլին: Հարցի վերաբերյալ ԱԺ առողջապահության և սոցիալական հանձնաժողովն ի դեմս Նարեկ Զեյնալյանն այսօր կազմակերպել էր աշխատանքային քննարկում: Նա այս հարցում էլ հիմնովին քննադատեց Արսեն Թորոսյանին, ասաց, որ իրենք մեկ ամիս առաջ որոշակի հարցադրումներով դիմել էին առողջապահության նախարարություն ՁԻԱՀ-ի կանխարգելման հանրապետական կենտրոնի և «Նորք» ինֆեկցիոն հիվանդանոցի միավորման հետ կապված: «Որոշակի հարցադրումներ էինք արել, թե արդյոք կատարվել է արդյունավետության գնահատում, ծախսարդյունավետության գնահատում, միավորման արդյունքում արդյոք կանխատեսել եք, թե ինչ արդյունքներ ենք ակնկալում: Պատասխանն ստացել ենք այսօր առավոտյան, այնտեղ նշված է, որ որևիցե վերլուծություն չի իրականացվել: Պատճառաբանությունը եղել է այն, որ փաստ է, որ ցանկացած միավորում բերում է արդյունավետության բարձրացման: Իսկ քննարկումը կազմակերպելու նպատակը եղել է այն, որ ստացել ենք և կոլեկտիվի կողմից գրություն, որ իրենք դրա հետ կապված հարցեր ունեն: Նաև կենտրոնի շահառուների կողմից ենք ստացել գրություն իրենց տեսակետը հայտնելու»,-ասել է նա։ Քննարկման ընթացքում հրավիրվածներից շատերը նույնպես պնդել են, որ քայլը չհիմնավորված է ու անհրաժեշտություն կա օր առաջ չեղարկելու:

Քննարկումից հետո Զեյնալյանն ասել է, որ իրենք կամփոփեն քննարկման արդյունքները եւ համապատասխան դիրքորոշմամբ հանդես կգան:
Սակայն կարելի է չկասկածել, որ որեւէ դիրքորոշում չի կարող որեւէ ազդեցություն ու հետեւանք ունենալ Արսեն Թորոսյանի պաշտոնավարման հարցում: Ժողովրդավարական պետություններում, որտեղ ինստիտուտների միջեւ գործում է իրական փոխզսպումն ու հակակշիռները, մի քանի նման հակազդեցությունից հետո կառավարության ղեկավարն առնվազն կփորձեր հասկանալ խնդրի էությունը եւ հաշվի կնստեր խորհրդարանական կառավարման մոդելում առանցքային դերակատարում ունեցող խորհրդարանի հետ, որտեղից գրեթե ուղիղ տեքստով հայտարարում են, որ Թորոսյանը կոմպետենտ չէ այդ պաշտոնում եւ անձնական շահերից բխող որոշումներ է կայացնում: Բայց քանի որ Նիկոլ Փաշինյանն ինքն է նշանակում նախարարներին, ապա կարելի է վստահ լինել, որ որեւէ նախարար հրաժեշտ կտա իր պաշտոնին այն ժամանակ, երբ վարչապետն է դա ուզում: Հիմա եկեք ծուռը նստենք, ուղիղ խոսենք՝ սուպերվարչապետական համակարգը պոզով-պոչով է լինում:

Անի Սահակյան