Իլհամի բարեկամները սպասում են նրան ՀԱՊԿ-ում. Մտքներին Արցախն է

Հայաստանում Բելառուսի դեսպան Իգոր Նազարուկը, հաշվի առնելով Սովետական Միության փորձը, դեմ չէ Ադրբեջանի՝ ՀԱՊԿ անդամակցությանը:

«Ուզում եմ հիշատակել Սովետական միության փորձը: Մենք բոլորս տարբեր էինք, հիշո՞ւմ եք՝ Բալթյան հանրապետություններ և Միջին Ասիայի հանրապետություններ: Ուրախությամբ պետք նշեմ, որ այս բազմազգ ընտանիքում Սովետական միության տարածքում չեն եղել տարածքային պահանջներ, միջազգային և կրոնական հակամարտություններ: Դրա համար այդ ուղղությամբ թրենդը ճիշտ կլիներ», – երեկ նշել է դեսպանը «ՀԱՊԿ դերը Կովկասի տարածաշրջանում անվտանգության ապահովման գործում» թեմայով քննարկման ժամանակ՝ անդրադառնալով հարցին, թե արդյոք հնարավոր է, որ Ադրբեջանը մուտք գործի ՀԱՊԿ, ինչը հետագայում կնպաստի ղարաբաղյան հակամարտության կարգավորմանը:

Ռուսական շրջանակներից՝ փորձագետների, մեկնաբանների մակարդակով բազմիցս նշվել է, որ Ադրբեջանի՝ ՀԱՊԿ անդամ դառնալը կնպաստի ղարաբաղյան հակամարտության կարգավորմանը:

Այս կարծիքի տիրաժավորումն, իհարկե, ձեռնտու է Ռուսաստանին, որը մեկ անգամ չէ հայտարարել, որ դեմ չէր լինի, եթե Ադրբեջանը անդամակցեր ԵԱՏՄ-ին: Սակայն Ադրբեջանը պաշտոնապես չեզոք մեկնաբանություններ է արել, հասկացնելով, որ նման անդամակցությանը կհամաձայներ, եթե համոզված լիներ, որ ԼՂ խնդիրը լուծվելու է Բաքվի պահանջներին համահունչ:

Երեկ ՀՀ ԱԽ քարտուղար Արմեն Գրիգորյանը ընդունել է Հայաստանում աշխատանքային այցով գտնվող Հավաքական անվտանգության պայմանագրի կազմակերպության գլխավոր քարտուղար Ստանիսլավ Զասին։

Ըստ ԱԽ գրասենյակի՝ քննարկվել են ահաբեկչության դեմ համատեղ պայքարի արդյունավետության բարձրացմանը, թմրանյութերի և հոգեմետ նյութերի անօրինական շրջանառության դեմ պայքարին վերաբերող հարցեր։

Արմեն Գրիգորյանը ներկայացրել է իրավիճակը հայ-ադրբեջանական հակամարտ զորքերի շփման գծում և ընդգծել է Արցախյան հարցի բացառապես խաղաղ ճանապարհով լուծելու հրամայականը՝ կարևորելով դրանում ՀԱՊԿ դիրքորոշումը ու Հայաստանի հասարակության սպասելիքներն այդ կառույցից։ Քարտուղար Զասը մեկ անգամ ևս հաստատել է ՀԱՊԿ դիրքորոշումը առ այն, որ ղարաբաղյան հակամարտության խաղաղ կարգավորմանը այլընտրանք չկա։

Ղազախստանը, Բելառուսը բազմիցս իրենց դիրքորոշումներով ցույց են տվել, թե որքանով են կարևորում Ադրբեջանի նախագահի դիրքորոշումը: Կարելի է պատկերացնել, թե համաձայնություն կլինի Ադրբեջանի հետ ԼՂ որևէ հարցում ՀԱՊԿ-ում կամ ԵԱՏՄ-ում, եթե Բաքուն անդամակցի այդ կառույցներին:

Մետաքսյա Շալունց