Ովքեր են դավաճանները

Վարչապետ Նիկոլ Փաշինյանն օրերս խորհրդակցություն է հրավիրել կոռուպցիայի դեմ պայքարի վերաբերյալ, որի շրջանակում քննարկվել են հակակոռուպցիոն պայքարի ընթացքը և հետագա քայլերը: Խորհրդակցությանը մասնակցել են իրավապահ մարմինների ղեկավարները: Ինչպես եւ սպասելի էր, վարչապետը հերթական սկանդալային հայտարարությամբ է հանդես եկել:

Փաշինյանը բողոքել է իրավապահ համակարգի դանդաղկոտությունից, որը կոռուպցիոներների մի մասին հնարավորություն է տալիս փախչել Հայաստանից, մյուս մասի համար հանցանշանները և ապացույցները թաքցնելու, քողարկելու պատուհան է բացում: Եւ, իսկապես, մի շարք գործերով առանցքային վկաներ, նույնիսկ կասկածյալներ ու մեղադրյալներ, լքել են հանրապետության տարածքը, ինչի արդյունքում այդ գործերով քննությունը մտել է փակուղի՝ Միհրան Պողոսյան, Արամ Հարությունյան եւ այլք: «Ես չեմ թաքցնի իմ գնահատականը և հստակ կասեմ, որ նման իրավիճակի առանցքային պատճառներից մեկն այն է, որ իրավապահ համակարգի ամենավերին օղակներում եղել են բառիս բուն իմաստով դավաճաններ, որոնք կոռուպցիայի դեմ հայտարարված պայքարի ծխածածկույթի տակ առաջնորդվել են այլ հաշվարկներով և այլ հանձնարարություներով»,-ասել է Փաշինյանը։

Ովքեր են իրավապահ համակարգի դավաճանները, ո՞ւմ նկատի ունի վարչապետը, ինչո՞ւ Փաշինյանը անուններ չի տալիս։ Սրանք հարցեր են, որոնք, վստահեցնում ենք՝ պատասխաններ չունեն: Ինչպես պատասխան չունի վարչապետի մեկ այլ հանձնարարականի հետ կապված հարցը՝ իսկ ԱԱԾ-ն երբ է գտնելու սատանաներին, եթե չի գտնում, կարող ենք կասկածել, որ այս կառույցում վերից վար դավաճաններ են: Նիկոլ Փաշինյանի այլեւս որեւէ գործողությունում, հայտարարությունում տրամաբանություն, իմաստ գտնելն անիմաստ զբաղմունք է: Նա ամեն բան անում եւ ասում է այնպես, ինչպես ինքն է ցանկանում եւ ինչպես իրեն է պետք: Չմտածելով, որ վարչապետը չի կարող իրեն թույլ տալ շարքային ընդդիմադրի պես անպատասխանատու հայտարարություն անել, այս հայտարարությանը պետք է հետեւեն գործընթացներ՝ առնվազն դավաճաններին հայտնաբերելու ուղղությամբ:

Իհարկե, հնարավոր է, որ դավաճանների մասով քննություն է ընթանում, քրեական գործեր կան հարուցված, մարդիկ կկանգնեն պատասխանատվության առաջ, այդ դեպքում պետք է զերծ մնալ նման հայտարարություններից, իսկ եթե պարզվեց, որ վարչապետը սխալ է: Իսկ իրավապահ համակարգի դավաճաններ ասելով՝ արդյոք Փաշինյանը նկատի ունի նախկին ոստիկանապետ Վալերի Օսիպյանին եւ ԱԱԾ նախկին տնօրեն Արթուր Վանեցյանին, որոնց վրա էլ, ըստ ամենայնի, փորձում է բարդել նախկինների նկատմամբ այս խայտառակ իրավական պրոցեսը, երբ այդպես էլ պատասխանատվության չի ենթարկվում նախկին եւ ոչ մի <<թալանչի>>: Այս մանիպուլացիային կարելի էր հավատալ, եթե չլիներ Ռուբեն Հայրապետյանի հրապարակային մեղադրանքը Փաշինյանի թիմակից Անդրանիկ Քոչարյանին ուղղված: Հայրապետյանը իր հարցազրույցներից մեկում ասաց, թե Քոչարյան Անդրանիկն իրեն նախապես խորհուրդ է տվել հեռանալ երկրից, իր դեմ իրավական պրոցեսներ են սկսվելու: Հիմա ինչ, կարող ենք չէ մտածել, որ դավաճանները ոչ թե հեռացողներն են, այլ վարչապետին շրջապատող ամենամտերիմները, ավելին, որ սա կազմակերպված միջոցառում է, եւ Նիկոլ Փաշինյանն ինքն է ապահովում նախկինների հեռացումը, նրանք նախ մուծվում են, ապա հեռանում: Իսկ Փաշինյանը շարունակում է իր թատրոնը,բոլորին դավաճան հանում՝ արդարացնելով սեփական մեղքերը, շուտով նա դավաճանության մեջ կմեղադրի նաեւ սեփական ընտանիքին:

Անի Սահակյան