Լեւոնական «թալանչիները» խաղից դուրս․ Փաշինյանի խտրական քայլը

Սահմանադրական հանրաքվեն դեռեւս տեղի չի ունեցել, հայտնի չէ ԱՅՈ-ն կհաղթի, եւ իշխանությունը վերջապես կձեւավորի իր երազանքների կամակատար բարձր դատարանը, բայց արդեն գործուն քայլեր են արվում ու մատնում, թե իրականում ինչու են ուզում ազատվել այսօրվա կազմից եւ ձեւավորել այս կառույցը խամաճիկ դատավորներով: Այսպիսով՝ իշխանությունը պատրաստվում է բառի բուն իմաստով խլել նախկին պաշտոնյաների ունեցվածքները:

Ամիսներ շարունակ քննարկվում էր «Ապօրինի ծագում ունեցող գույքի բռնագանձման մասին» օրենքի նախագիծը, բազում քննադատություններ կային դրա վերաբերյալ, թվում էր, թե իշխանությունը կհրաժարվի դրանից, բայց ոչ, երեկ այն ներկայացվել է Ազգային ժողով ու քննարկվել Պետաիրավական հարցերի մշտական հանձնաժողովում:
Արդարադատության նախարարի ներկայացմամբ, իրավասու մարմինը` հավաքած տեղեկատվության հիմա վրա, կարող է դիմել դատարան` քրեական գործ հարուցելու խնդրանքով, եթե անձին պատկանող գույքի ծավալը եւ նրա օրինական եկամուտների տարբերությունը 25 միլիոն դրամ եւ ավելի է: Դատարանում գործի քննությունը քաղաքացիական ընթացակարգով է ընթանալու: Սկզբնական ապացուցման բեռը կրելու է պետությունը, ապա՝ պատասխանողը եւ հայցվորը: Կառավարությունն առաջարկում է, որ իրավասու մարմինը ապօրինի ծագման մասին ուսումնասիրություն սկսելու որոշումից հետո կարող է ուսումնասիրել նախորդող տասը տարիները: Բացառություններ ևս նախատեսված են. ըստ այդմ, իրավասու մարմինը կարող է ուսումնասիրություններ կատարել մինչեւ 1991 թվականի սեպտեմբերի 21-ը: Այսինքն, ինչպես նկատելի է Լեւոնական պաշտոնյաներին այս օրենքը չի առնչվում, մինչդեռ հասարակությունն ամենաշատը խոսել է հենց նրանց թալանի ու գողոնի մասին: Անունները շատ են, փաստերը՝ ճշգրիտ, մամուլում դրանց մասին տասնյակ-հարյուրավոր նյութեր են գրվել:
Նշենք, որ կարգավորումները չեն տարածվում մասնավոր անձանց և գործարարների վրա, խոսքը միայն պաշտոնատար անձանց մասին է։

Օրենքի գործողության ոլորտում կներառվեն նաեւ «քրեական ենթամշակույթին» վերաբերող դեպքերը: Ապօրինի ճանապարհով ձեռք բերված գույքի պաշտպանության իրավունք չի տրվում: Խոսելով Սահմանադրական արգելքի մասին, ըստ որի անձի վիճակը վատացնող օրենք չի կարող լինել, նախարարը նշում է Գերմանիայի ՍԴ-ի որոշման օրինակը: ԲՀԿ-ական պատգամավոր Գեւորգ Պետրոսյան այս մասով իր անհամաձայնությունը հայտնեց՝ նկատելով, որ Գերմանիայի ՍԴ որոշումը մեզ համար հիմք չի կարող լինել, մենք Սահմանադրական արգելք ունենք նման դեպքերի համար` անձի վիճակը վատթարացնող օրենքին հետադարձ ուժ տրվել չի կարող: Հենց այստեղ է թաղված շան գլուխը, եթե ՍԴ-ում Նիկոլ Փաշինյանն ունենա իր դատավորներին, ապա հարցն անլուծելի չի դառնա եւ թքած ունենալով սահմանադրական արգելքների վրա, հարցին լուծում կտան այնպես, ինչպես շեֆն է ցանկանում: Պատահական չէ, որ մի քանի օր առաջ Փաշինյանը կառավարության նիստում խոսեց Մոնումենտի շքեղ առանձնատների եւ դրանց ապօրինի լինելու մասին, այժմ պարզվում է, որ օրինականների համար էլ է նա խնդիր ստեղծելու:

Անի Սահակայան