Նիկոլ Փաշինյանի տագնապը. «ստրախովկա» են անում

Նիկոլ Փաշինյանը մի քանի օր առաջ հայտարարեց Մարտի 1-ին երթ անցկացնելու մասին: Այդ օրը քարոզարշավ չի լինելու, բայց պարզից էլ պարզ է, որ իշխանությունը մոբիլիզացնում է ուժերը երթն այդ տպավորիչ դարձնելու: Մամուլն արդեն մի քանի օր է հղում է անում իր աղբյուրներին, որ հանձնարարական կա հնարավորինս շատ մարդաքանակ ապահովել՝ ցույց տալու, որ իրենց հետևից դեռ գնացող զանգված կա եւ որ այդ օրը իշխանություններն ամեն ինչ անելու են հանրաքվեից առաջ լրացուցիչ հուզականություն ու էյֆորիա ապահովելու համար։ Ու չնայած քարոզչություն տեղի չի ունենա, բայց հենց այդ հավաքն էլ կդառնա հանրաքվեի նախընտրական քարոզարշավի փաստացի մեկնարկը: Բայց ահա փետրվարի 26-ին Նիկոլ Փաշինյանի արբանյակ կուսակցությունն անհանգիստ տեղապտույտի մեջ է հայտնվել:

Սասնա ծռերի առաջնորդ Ժիրայր Սեֆիլյանը կոչ է տարածել կուսակցության անունից՝ չեղարկել երթը.<<Հաշվի առնելով կորոնավիրուսի համաճարակի բռնկման իրական սպառնալիքը, ս.թ. մարտի 1-ին բազմամարդ երթ կազմակերպելու վերաբերյալ գործող իշխանության կոչը համարում ենք անպատասխանատու և ազգային անվտանգության համար խիստ վտանգավոր քայլ:
Առհասարակ՝ անպատասխանատու գործելակերպը դարձել է ներկայիս իշխանությունների հիմնական հատկանիշը: Նրանք իրենց բանավոր ելույթներում ընդունում են, որ առնվազն 2008 թ. Մարտի 1-ից հետո ակնհայտ է դարձել, որ ընտրությունները կեղծելով իշխանությունը շարունակաբար յուրացրած ռեժիմն արդեն ամբողջությամբ տապալել է սահմանադրական կարգը, զավթել է պետությունը և այն վերածել է պետականության և ժողովրդի դեմ կիրառվող ահաբեկչական մեքենայի, սակայն հրաժարվում են նշվածը որպես պաշտոնական իրավաքաղաքական գնահատական արձանագրել ՀՀ ԱԺ որոշմամբ և դրանից բխող քայլեր ձեռնարկել>> ,- հընթացս էլ խայծել են իշխանություններին:

<<Մենք անազնիվ ենք համարում նման գործելակերպը, երբ Նիկոլ Փաշինյանը Մարտի 1-ի ջարդարարների հետ պետական և հացկերույթի սեղանների շուրջ է նստում, հետո ժողովրդին ու Մարտի 1-ի զոհերի հարազատներին երթի է հրավիրում:
Օրվա առթիվ մեր խորին ցավակցությունն ենք հայտնում Մարտի 1-ի զոհերի հարազատներին ու մեր ամբողջ ժողովրդին:
Համոզված ենք, որ գործող իշխանությունների հետ միասին թե առանց նրանց մոտ ապագայում հաղթահարվելու է արդարության ճգնաժամը և վերջապես բացվելու է Մարտի 2-ի լուսաբացը>> ,- ասված է հաղորդագրության մեջ:

Ակնհայտ է, որ իշխանական ճամբարում անհանգստություն կա, ըստ էության արդեն հաշվարկել են, մինուս, պլյուս արել եւ սպասելիքները չեն արդարացել: Այդ իսկ պատճառով օգնության են կանչել արբանյակ ուժերին, որոնք գլխանց հող են նախապատրաստում, որպեսզի երթը եթե չարդարացնի սպասելիքները, տակից դուրս գալու ասելիք լինի:

Անի Սահակյան