Թանկարժեք կցորդը

Անցյալ տարեվերջին Կառավարությունը որոշում ընդունեց Ռուսաստանում ՀՀ դեսպանությանը կից մաքսային կցորդ ունենալու վերաբերյալ: 2020 թվականի հունվարի վերջին հայտնի դարձավ, որ Կառավարությունը որոշում է ընդունել Արամ Թանանյանին 3 տարի ժամկետով Ռուսաստանում Հայաստանի դեսպանությանը կից մաքսային կցորդ նշանակելու վերաբերյալ:
Մաքսային կցորդը պետք է աշխատի Վերին Լարսի անցակետի մոտակայքում, սակայն նրա բնակության վայրը կլինի 30-35 կմ հեռավարությամբ Վլադիկովկաս քաղաքը:
Փետրվարի 27-ի նիստում գործադիրը մտադիր է միջոցներ հատկացնել կցորդի պայմանները բարելավելու համար: Մաքսային կցորդի 2020 թվականի պահպանման ծախսերը հաշվարկվել են 11 ամսվա համար՝ շուրջ 29,8 մլն դրամ: Նշված միջոցները առաջարկվել է վերաբաշխել ՊԵԿ-ի 2020 թվականի պետական բյուջեով նախատեսված պահպանման ծախսերից՝ հետագայում այս տարվա պետական բյուջեի պահուստային ֆոնդից դրանք վերականգնելու պայմանով:
Բացի այդ` կցորդին կառավարությունը մտադիր է նաև շքեղ մեքենա տրամադրել: TOYOTA LC 150 4.0 GAS մակնիշի մեքենան նախկինում Սննդամթերքի անվտանգության տեսչական մարմնին է եղել ամրացված: Մեքենայի արժեքը կազմում է 26 մլն 4 96 հազար դրամ: Որպես հիմնավորում նշվում է, որ կցորդը պետք է  ՌԴ Վերին Լարսի մաքսակետ- Վրաստանի Կազբեկի մաքսակետ- Ստեփանծմինդա հատվածում՝ շուրջ 20-25 կմ հեռու, եղանակային  պայմաններց անկախ (ձնաբուք, սելավ, քարաթափում և այլն) բեռնատարների խցանումների ժամանակ, անհրաժեշտության դեպքում  մեկնի դեպքի վայր, տեղում քննարկի և լուծման ուղիներ առաջարկի ՌԴ և Վրաստանի ներկայացուցիչներին: Եթե հակիրճ ասելու լինենք` նրա խնդիրը  Լարիսի խցանումները կարգավորելն է: 
Փաստորեն, կցորդի գոյությունը պետության վրա ավելի քան 56 մլն դրամ է նստում: 

Հայկ Դավթյան