Ի՞նչ եղավ Աննա Հակոբյանի եղբոր՝ Գարիկ Մաշադյանի մեղադրանքը

Անցած տարվա հոկտեմբերի 25-ին Հայաստանի քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի պետ Հովհաննես Պողոսյանի որոշմամբ ստեղծված քննչական խմբի ղեկավար, նույն քննչական բաժնի հատկապես կարևոր գործերով քննիչ Արման Կարապետյանը միջնորդություն է ներկայացնելու Երևան քաղաքի ընդհանուր իրավասության դատարան, որպեսզի դատարանը որպես խափանման միջոց երկամսյա կալանքի որոշում կայացնի Երևան քաղաքի Վարդաշեն 2-րդ փողոցի բնակիչ, 46-ամյա Գարիկ Մաշադյանի նկատմամբ:

Ինչպես հայտնում էՐ ֆոտոլրագրող Գագիկ Շամշյանը, Գ. Մաշադյանը կասկածվում է հոկտեմբերի 22-ին առանձնակի դաժանությամբ իր հարևանուհի՝ 64-ամյա Ց. Բ.-ին սպանելու մեջ: Ֆոտոլրագրողի տեղեկություններով՝ կասկածյալը սպանության վայրում քննչական փորձարարության ժամանակ պատմել է, թե ինչպես է մտել տուն և ինչ գործողություններ է արել ներսում: Իսկ քննչական փորձարարությանը հետևել են քննչական բաժնի պետ Հ. Պողոսյանը, բաժի պետի տեղակալ Գառնիկ Մաթևոսյանը, խմբի ղեկավար, ՀԿԳ քննիչ Ա. Կարապետյանը: Եթե այսօր դատարանը բավարարի քննչական մարմնի միջնորդությունը, ապա կասկածյալ Գ. Մաշադյանը տեղափոխվելու է ՀՀ արդարադատության նախարարության «Նուրբարաշեն» քրեկատարողական հիմնարկ:

Դեպքից անցել է արդեն 6 ամիս, սակայն  գործն այդպես էլ դատարան չի մտել, համենայնդեպս «Դատալեքս» համակարգում այն բացակայում է, ինչը բավականին տարօրինակ է՝ հաշվի առնելով, որ երկրում մի շարք աղմկահարույց գործ են քննվում, որոնք շատ արագ հայտնվում են դատարանում:

Հիշեցնենք, որ Գարիկ Մաշադյանը ՀՀ պետական եկամուտների կոմիտեի նախագահի 1-ին տեղակալ Ռաֆիկ Մաշադյանի եղբայրն է, սակայն երկար տարիներ նրանց միջև ոչ մի շփում չի եղել: Կարելի է ասել՝ Գ. Մաշադյանը իր կյանքը վարել է եղբորից անկախ և նրանք երկար տարիներ միմյանց չեն հանդիպել:

Նաև պետք է նշենք, որ Ռաֆիկ Մաշադյանը ՀՀ վարչապետի տիկին Աննա Հակոբյանի մորաքրոջ որդին է, հետևաբար Գարիկ Մաշադյանը ևս համարվում է Աննա Հակոբյանի խորթ եղբայրը: