Կրկեսի վերածված Այո-ի քարոզարշավը

Դվին հյուրանոցային համալիրում սահմանադրական հանրաքվեի «Այո» շտաբը կազմակերպել է դրամահավաք, որի ընթացքում հավաքվել է 205 մլն 560 հազար դրամ: Քարոզչական կողմի շտաբի պետ, Տարածքային կառավարման և ենթակառուցվածքների նախարար Սուրեն Պապիկյանը հայտարարել է, որ 

օնլայն հարթակում դրամահավաքը շարունակվում է: Կան նաև փոխանցումներ արտարժույթի տեսքով, որոնց արտացոլումն առայժմ հստակեցված չէ, այսինքն՝ կարող է այս թվի որոշակի փոփոխություն լինել: Դրամահավաքի արդյունքում հավաքված գումարն ուղղվելու է քարոզարշավի անցկացմանը:
Դրամահավաքի նվիրատուները տարբեր գործարարներ, հայտնի և անհայտ գործիչներ են եղել: Նրանցից մեկը` դերասան Հովհաննես Ազոյանն ասել է, թե ինքը փող չի ունեցել, մոր թոշակից 15 հազար դրամ է վերցրել, որ Այո-ի շտաբին նվիրատվություն անի: Այսպիսով` կարելի է արձանագրել, որ Այո-ն դեռ չսկսած` քարոզարշավը վերածվեց կրկեսի, ինչի համար Նիկոլ Փաշինյանն ու Իմքայլականները պարտական են պստիկ Հովոյին: Հասկանում եք չէ` պետությունը թոշակառու կնոջը չնչին թոշակ է տալիս, որը հաստատ չի հերիքում ապրուստի համար, իսկ այս անառակ զավակը վերցնում է կնոջ թոշակը ու տալիս Նիկոլ Փաշինյանին, որ ան Այո քարոզի: Պարոն Փաշինյան, ամոթ է, հետ տվեք այդ կնոջ թոշակը:
Ինչ վերաբերում է գործարարներին և ընդհանրապես քաղաքացիներին, ովքեր Այո-ի օգտին նվիրատվություն են արել` հետաքրքիր է` որտե՞ ղ էին նրանք երբ Նիկոլ Փաշինյանը ընդդիմադիր էր և նախաձեռնել էր Իմպիչմենտի գործընթացը, երբ Փաշինյանը` որպես Երևանի քաղաքապետի թեկնածու, հայտարարել էր դրամահավաքի մասին, Երբ Փաշինյանն ու նրա գործընկերները Ելք դաշինքի համար էին դրամահավաք հայտարարել: Պատասխանը շատ պարզ է` նրանք նույն տեղում էին` ճիշտ այնտեղ, որտեղ այժմ. այսինքն` իշխանության կողքին: Նրանք իրենց տեղը չեն փոխել, այս Նիկոլ Փաշինյանն է իր գտնվելու տեղը փոխել: Իսկ համոզմունքներն ու գաղափարները. այստեղ ևս մեծ փոփոխություն չկա` իշխանության կողքին միշտ ապահով է:

Փաշինյանը հայտարարել է, որ ինքն ու իր քաղաքական թիմը կկտրեն իրենց ձեռքերը, բայց մի քվեաթերթիկի կեղծիք թույլ չեն տա, <<ես անձամբ կկտրեմ իմ ձեռքերը և թեկուզ մեկ կեղծիք թույլ չեմ տա, որովհետև դա կնշանակի ջնջել այն արժեքները, որոնց վրա մենք կանգնած ենք»,- ասել է նա: Ձեռքերը կտրել պետք չի, բայց շուրջը ուշադիր նայել և անցյալը հիշել պետք է: Հիշում եք` Նիկոլ Փաշինանը Ազգային ժողովում հայտարարում էր, թե չամադանով փող են տարել Բաղրամյան 26: Հիմա փաստորեն ոչ միայն չամադանով փողեր, այլ անգամ մարդկանց թոշակներն են բերում Այո-ի ընտրաշտաբ, որի փաստացի տերը Նիկոլ Փաշինյանն է: Բերում են, որ ապահով ապրեն, որ իրենց հարցերը հեշտ լուծվեն, որ իրենք ասֆալտին փռվելու վտանգից ազատվեն:

Հայկ Դավթյան