Կողմնորոշվեք պարոնայք․ մարտահրավեր, թե ծաղրուծանակ

Հանրային հեռուստաընկերությանը տված իր հարցազրույցում ՀՀ վարչապետ Նիկոլ Փաշինյանը, պաասխանելով հարցին, թե ինչու սահմանադրական փոփոխությունների հարցը մինչև հանրաքվեի դնելը չեն ուղարկում Վենետիկի հանձնաժողով, եզրակացության, մարտահրավեր նետեց Վենետիկի հանձնաժողովին, և վարչապետի գլխավոր ասելիքն այն էր՝ քանի որ իրավունքի չարաշահումներով ընդունված 2015 թվականի Սահմանադրությունը Վենետիկի հանձնաժողովի կողմից դրական եզրակացության է արժանացել, ուստի այժմ բացատրություններ տալու հերթը Վենետիկինն է․ «Գերմանիա կատարած իմ վերջին այցի ընթացքում այս իրավիճակի վերաբերյալ քննարկումներ եմ ունեցել բազմաթիվ գործընկերների հետ: Կարող եմ ասել, որ նրանք զարմացած են, որ Հայաստանի Հանրապետությունու այդ տրանսֆորմացիոն շրջանում այսպիսի պրոցեսներ են տեղի ունենում։ Ես եվրոպացի մեր գործընկերների ուշադրությանն եմ հրավիրել, որ այս ողջ պրոցեսը, երբ ըստ էության իրավունքի չարաշահման հետ գործ ունենք կապված տրանսֆորմացիոն երևույթի հետ, տեղի է ունեցել Վենետիկի հանձնաժողովի հայացքի ներքո, և ես կարծում եմ, որ մինչև այդ հարցին մենք կանդրադառնանք, Վենետիկի հանձնաժողովը պետք է պատասխանի որոշ հարցերի, այդ թվում եվրոպացի մեր գործընկերներին։ Իսկ այդ հարցը մենք կքննարկենք։ Մեր եվրոպացի գործընկերների հետ քննարկումների մեջ ենք, թե ինչպես ենք մոտենալու այդ խնդրին»:

Այսօր խորհրդարանում Դատական օրենսգրքում փոփոխությունների թեմայով լսումների ժամանակ ՀՀ արդարադատության նախարար Ռուստամ Բադասյանը, ի պատասխան բարեփոխումների փաթեթի որոշ խնդրահարույց փոփոխությունների, Վենետիկի հանձնաժողովի օգնությանն է դիմել՝ ասելով, որ այս կառույցից իրենք դրական եզրակացություն են ստացել։ Խոսքը, մասնավորապես, դատավորների տարիքային շեմի իջեցման, եւ այլնի մասին է, բայց մեր նյութի համատեքստում խնդրահարույցը ոչ այնքան իշխանության փոփոխություններն են, որքան նախարարի վկայակոչած փաստարկը, որով փորձ է անում ապացուցել, թե ինչքան լավն է իրենց նախագիծը, այնքան պուպուշ, որ արժանացել է միջազգային հեղինակավոր կառույցի գնահատանքին։

Այստեղ չենք կարող չասել՝ կողմնորոշվեք պարոնայք՝ հիմա Վենետիկը ծախված, կաշառված ու ոչ անաչառ մարմին է, որին պետք է բոյկոտել, թե մենք պարտավոր ենք մնալ միջազգայնորեն ստանձնած մեր պարտավորությունների շրջանակում։ Իրականում, այո, կողմնորոշված են եւ շատ հստակ, իշխանությունում գիտեն, որ հանրաքվեի նախագիծը ծայրից ծայր հակաիրավական է ու այն ոչ մի դեպքում չի կարելի դուրս բերվել միջազգային արենա։ Միայն թե հարց է՝ Վենետիկի հանձնաժողովի նկատմամբ այս անհարգալից պահվածքը ինչ հետեւանքներ է ունենալու մեզ վրա։

Նշենք, որ սա միակ հարցը չէ, որով արդարադատության նախարարը, այսպես ասած, «պադմոշկա» տվեց թիմին։ Նա իր շուրջ բարձրացած վերջին օրերի աղմուկի մասին խոսելիս, մասնավորապես, որ վեց ամսում մոտ 16 հազար դոլարի պարգեւավճար է ստացել, ասաց, որ ինքը միակը չէ եւ բոլոր նախարարների պես է վարձատրվել, մի բան էլ քիչ։ Կարելի է պատկերացնել, որ եթե իրեն ավելի համեստ են պարգեւատրել, քան մյուսներին, ապա ինչ ահռելի գումարների մասին է խոսքը եւ ինչպիսի ախորժակ ունեն հեղափոխական իշխանությունում:

Անի Սահակյան