Փաշինյանը -Ալիևի նոր դեբատին Արցախի նախագահը ներկա լինելո՞ւ է

Ստեփանակերտում տեղի ունեցած Հայաստանի և Արցախի Անվտանգության խորհուրդների համատեղ նիստում վարչապետ Նիկոլ Փաշինյանը հայտարարել է, որ Արցախն արդեն բանակցային գործընթացի լիարժեք մասնակից է:

<<Վերջին շրջանում մենք այս առումով բավականին արդյունավետ աշխատանք ենք իրականացրել, և այդ աշխատանքը հասել է մի կուլմինացիայի, երբ մենք հնարավորություն ենք ունեցել արձանագրել, որ Արցախի և Հայաստանի իշխանությունների պատկերացումներն Արցախի հարցի կարգավորման վերաբերյալ նույնական են: Սա ամենևին չի նշանակում, թե Արցախի հարցի կարգավորման ամբողջ համատեքստի բոլոր դետալների հետ կապված կան միևնույն պատկերացումները, սա նշանակում է, որ ռազմավարության, վեկտորի ուղղությամբ մենք իսկապես ունենք նույնական պատկերացում և այդ նույնական պատկերացումներն ունեն մի քանի անհրաժեշտ հենասյուներ: Այդ հենասյուներից կարևորագույնը ես համարում եմ արձանագրումն այն բանի, որ Արցախի Հանրապետությունը բանակցային գործընթացի լիարժեք մասնակից է և առանց Արցախի Հանրապետության հետ բանակցությունների` հնարավոր չէ Ղարաբաղի հարցի կարգավորում>>,- հայտարարել է Նիկոլ Փաշինյանը:

Փաշինյանի կարծիքով` համատեղ աշխատանքի ընթացքում ձևավորվել է Ղարաբաղի հարցի բանակցային նոր բովանդակություն, որն ավելի համապարփակ է ներկայացնում Հայաստանի Հանրապետության և Արցախի Հանրապետության շահերը, և երկրորդը` այդ բովանդակությունը կառուցողական է` հարցի կարգավորման հնարավորություններ ստեղծելու տեսանկյունից: <<Այս առումով, ես նույնպես կարևորում եմ այն դիսկուրսը և քննարկումը, որ տեղի ունեցավ Մյունխենի անվտանգության համաժողովի շրջանակում, որտեղ այդ նույն բովանդակությունը միս ու արյուն ստացավ, հստակ ձևակերպվեց, և այն մենք պայմանականորեն անվանեցինք մյունխենյան սկզբունքներ>>- հայտարարել է Փաշինյանը:

Երբ Մյունխենում, Ալիևի հետ դեբատի ժամանակ Փաշինյանը հիշեցրեց դեռևս 1992թ. և 1994թ. Բուդապեշտի ԵԱՀԿ գագաթնաժողովում Արցախի բանակցային կողմ ճանաչվելու մասին, Ալիևը կարծես թե դրան հավանություն չտվեց: Ալիևը պնդեց, թե Արցախը միշտ էլ Ադրբեջան է եղել, իսկ բանակցելու մասով էլ ակնարկեց, թե նախ զորքերը հանեք:
Վերադառնալով Արցախի բանակցային կողմ դառնալու թեզին` եթե ո'չ Ադրբեջանը, ո'չ էլ ԵԱՀԿ Մինսկի խմբի անդամները չեն հաստատել, որ ընդունում են այդ մոտեցումը, Նիկոլ Փաշինյանը ինչո՞ւ է այդքան համոզված պնդում, որ Արցախն արդեն լիարժեք մասնակից է:
Շատ հետաքրքիր է` եթե այսուհետ Փաշինյանը Ալիևի հետ նորից որոշի դեբատի մասնակցել, Արցախի նախագահը ներկա լինելո՞ւ է, թե՞ Փաշինյանը իր ներկայությունն է դիտարկում որպես Արցախի մասնակցություն: Հատկանշական է, որ անվտանգության խորհրդի նիստում Արցախի ղեկավարության դիրքորոշումն այս մասով չհնչեց` համենայն դեպս հրապարակավ:

 Հայկ  Դավթյան