«Պանամական արխիվի» արտահոսքի կազմակերպիչը մանրամասնում է

Անանուն աղբյուրը, որը գերմանական Süddeutsche Zeitung թերթին էր փոխանցել պանամական Mossack Fonseca իրավաբանական ֆիրմայի նյութերը, հանդես է եկել հայտարարությամբ, որում բացատրել է իր որոշման պատճառները՝ նամակը մայիսի 6-ին հայտնվել է գերմանական պարբերականի ու Հետաքննող լրագրողների միջազգային կոնսորցիումի (ICIJ) կայքում, որը հետաքննել էր օֆշորների միջոցով հարկերից խուսափելու գլոբալ սխեմաները: Նամակը վերնագրված էր «Հեղափոխությունը թվայնացված է լինելու»: Աղբյուրը, որը հայտնի է որպես Ջոն Դոու, հայտնել է, որ «պանամական արխիվը» մամուլին փոխանցելու իր որոշման հիմնական պատճառը ունեցվածքային անհավասարության դեմ պայքարելու ու կոռուպցիոներներին պատասխանատվության կանչելու ցանկությունն է եղել: Mossack Fonseca-ի փաստաթղթերը, նրա խոսքով ցույց են տվել ամբողջ անարդարությունը, որի վրա խարսխված է օֆշորներ գրանցող ընկերությունների աշխատանքը ու կառավարությունների անգործությունը, որոնք թույլ են տալիս նման ընկերություններ ստեղծել «հարկային դրախտներում»: Ավելին Mossack Fonseca –ն «իր ազդեցությունն օգտագործում էր ամբողջ աշխարհում օրենքներ գրելու ու վերաշարադրելու համար, որպեսզի տասնամյակներ շարունակ պաշտպանի հանցագործների շահերը»: Ջոն Դոուի խոսքով ինքը ոչ մի կառավարության կամ հետախուզական ծառայության պատվեր չի կատարել: Աղբյուրը մտադիր չէ 11.5 մլն փաստաթղթերը հենց այնպես հանձնել տարբեր երկրների հարկային մարմիններին: Նա պաշտպանել է ICIJ –ի որոշումը՝ չբացահայտել փաստաթղթերը: Բայց Ջոն Դոուն հայտնել է, որ կցանկանար իրավապահ մարմինների համագործակցել այն չափով, որքանով հնարավոր կլինի իր համար: Համագործակցության դիմաց նա ուզում է դատական անձեռնմխելիության երաշխիքներ: Արտահոսքի հեղինակի խոսքով,եթե մարդիկ, գործելով օրենքի շրջանակում, բացահայտում են չարաշահումներ՝ լինեն նրանք ինսայդերներ, թե արտաքին գործակալներ, նրանք արժանի են կառավարական հետաապնդման նկատմամբ իմունիտետի: Այդ առաջարկից բացի նա դիմել է բոլոր երկրների կառավարություններին՝ օֆշորային ընկերությունների ստեղծումը արգելելու կոչով: