Հանցավոր անփութությունն անպատիժ է թողնվում
ՀՀ պաշտպանության նախարար Սեյրան Օհանյանը՝ անդրադառնալով երեք բարձրաստիճան զինվորականների պաշտոնանկություններին, ասել է, որ բանակում կադրային քաղաքականությունն իրականացվում է պլանավորված, իսկ հրամաններն ու որոշումները չեն քննարկվում: «Բանակում հրամաններն ու որոշումները, չնայած նրան, որ ձևավորվում են նաև համապատասխան քննարկումների, առաջարկների հիման վրա, չեն քննարկվում և կատարվում են: Իհարկե, եթե հարցն այդ կադրային փոփոխությունների մասին է, ապա պետք է մեկ բառով ասեմ, որ պահի հետ, անկասկած, կապ ունեն և միտված են մեր կառավարման համակարգը բարելավելուն և պատշաճ մակարդակի բարձրացնելուն»,- մանրամասնել է Օհանյանը Նախարարը չի ասել, որ չքննարկելը մարդուն չի ազատում պատասխանատվությունից և ոչ էլ առանց պատճառի գեներալներ են հեռացնում համակարգից: Իսկ քանի որ պատճառը կա եւ այդ մասին չի թաքցրել նաեւ պաշտպանության նախարարը՝ խոստովանելով <<պահի հետ>> կապի մասին, հետեւաբար պիտի լինեն նաեւ համապատասխան պատժիչ գործողություններ: Ինչպես հայտնի է ապրիլյան ռազմական գործողություններից հետո ԶՈւ երեք չինովնիկներ պաշտոնանկ եղան, պաշտոնաթողությունն առավել քան հասկանալի էր մարդկանց համար: Եւ հատկապես, որ հեռացողներն անմիջական պատասխանատվություն էին կրում ապրիլյան օրերի այն բոլոր թերացումների համար, որոնք տեսանելի էին շարքային քաղաքացու աչքերով: Օրինակ այդ օրերին գրեթե բոլորի շուրթերից մեկ հարց էր հնչում՝ իսկ որտեղ է եղել հայկական հետախուզական ծառայությունը, որ հակառակորդը հաջողացրել է մասշտաբային ներթափանցել մեր կողմը: Նախագահ Սերժ Սարգսյանի հրամանագրերով՝ պաշտոններից ազատվեցին Հայաստանի պաշտպանության նախարարի տեղակալ-նյութատեխնիկական ապահովման դեպարտամենտի պետ Ալիկ Միրզաբեկյանը, զինված ուժերի գլխավոր շտաբի հետախուզության վարչության պետ գեներալ-մայոր Արշակ Կարապետյանը, զինված ուժերի կապի զորքերի պետ-կապի և ավտոմատացված կառավարման համակարգերի վարչության պետ գեներալ-մայոր Կոմիտաս Մուրադյանը։ Այդուհանդերձ, որքան էլ զարմանալի է նախարար Օհանյանը հայտարարում է, որ պաշտոնանկ եղած զինվորականները քրեական պատասխանատվության չեն ենթարկվի, որովհետև նրանց գործունեությունը քրեական պատասխանատվության ենթարկելու աստիճանի չէ: «Նրանց գործունեությունը քրեական պատասխանատվության ենթարկելի չէ: Բանակում քրեական գործերը հարուցվում են իրավապահ մարմինների վերահսկողության ներքո, համապատասխան հետաքննության անցկացման շրջանակներում: Այդ գործունեությունը կանոնակարգված է, և բանակում էլ, ինչպես մնացած բոլոր կառույցներում, կան բազմաթիվ հարուցված քրեական գործեր, որոնց ավարտից հետո համապատասխան հետևություններ կատարվում են: Իսկ ինչ վերաբերում է նրանց գործունեությանը, պաշտպանության բանակը իր առջև դրված խնդիրը լիարժեք կատարել է, հասել է հաջողության, հակառակորդին զրկել է մարտավարական և այլ առավելություններից: Բանակն այն կառույցը չէ, որ ինքնուրույն միջոցառումներ չի ձեռնարկում բացասական երևույթների դեմ պայքարի շրջանակներում», մանրամասնել է նախարարը՝ խնդիրն ամբողջությամբ մասնավորից տեղափոխելով ընդհանրական դաշտ: Մինչդեռ որեւէ մեկը արդյոք կարո՞ղ է հիշել մի դեպք, որ աշխատանքից ազատված բարձրաստիճան զինվորականների գործով քննություն անցկացված լինի, արդյոք հիմա իրավապահները հետաքրքրվում են երեք պաշտոնյաների հարցով:Արդյունքում ստացվում է, որ պատերազմական իրավիճակում հանցավոր անփութություն թույլ տված գեներալներն անգամ կարող են անպատիժ մնալ, ոչինչ որ այդ անփությունը տասնյակ մարդկային կայքներ է արժեցել: Սրանից հետո մտածելը, որ բանակի բյուջեն մսխող, ատկատների սիրահար ու բանակի մատակարարների հետ <<փայ>> մտնող գեներալներն այսուհետ կհեռացվեն համակարգից, ուղղակի սին պատրանքներ են: Անի Սահակյան