Փաշինյանն արդարացրեց նախկիններին

Նիկոլ Փաշինյանն ամեն օր զարմացնում է իրականությունից կտրված լինելու իր կարգավիճակով: Ազգային ժողովի հետ կառավարության հերթական հարցուպատասխանը վարչապետի ոչ սթափ տրամաբանությունը մի շարք հարցերում կրկին ուշադրություն գրավեց: Նախ չգիտես ինչու Նիկոլ Փաշինյանը որոշել էր սրբագրել շնաբարո դուսպրծուկների եւ հակապետական ուժերի մասին ԱԺ-ում ունեցած իր վերջին ելույթը: Եկել էր ասելու, որ ինքը ոչ մեկին չի սպառնացել, ու թող իրենց չհամեմատեն նախկինների հետ, որոնք ընդդիմախոսների մեքենաներ էին այրում, շենքերի մուտքերում վախեցնում, ծեծում: Փաշինյան ելույթը նախեւառաջ նվիրված էր Էդմոն Մարուքյանին, ով ինչպես սպասվում էր անարձագանք չթողեց.«Եթե դուք պիտի գաք այստեղ ուժեղ ելույթ ունենաք, հետո Սիսակին ասեք՝ մի հատ հարց պիտի տաս, ելույթս սրբագրեմ, պիտի արդարանամ, իմաստը դրա ո՞րն էր: Եվ մի բան էլ՝ կարո՞ղ է ձեր ֆեյսբուքի account-ը գողացել են, այդ ի՞նչ բան է խորհրդարանի նիստն այդպես անլրջացնել»:

Մարուքյանը պնդեց, որ իշխանության մոտ այլակարծության նկատմամբ չկա տարրական հարգանք. «Որ ասում եք՝ մենք որ սպառնացող լինեինք, եւ այլ…հենց ԱԺ ելույթից հետո Վանաձորում աուդիտով փնտրում են ԼՀԿ ներկայացուցիչներ: Ես ուզում եմ իմանալ՝ այդ ո՞վ է հանձնարարել աուդիտով հարցերի պլանի մեջ գրել, թե «Լուսավոր Հայաստանից» ձեր մոտ ո՞վ կա աշխատող»: Իսկ ինչ պատասխանեց Փաշինյանը.« Ես նայում եմ հիմա, թե դուք հեղափոխությունից հետո ոնց եք… Դուք, մի հատ նայենք ձեր բոլոր ելույթները Սերժ Սարգսյանի ներկայությամբ, երբ որ ինքը նստած է եղել: Նայենք ձեր տոնը, ձեր բառապաշարը, ձեր «վորդինգը», համեմատենք հիմիկվա հետ: Այո, վայելեք այն ազատությունը, որ հեղափոխությունը ձեզ բերել է, բայց գոնե ընդունեք դա: Դուք կարայիք Սերժ Սարգսյանի ներկայությամբ այդպե՞ս խոսել, եկեք նայենք վիդեոները, Հովիկ Աբրահամյանի ներկայությամբ ձեր խոսակցության տոնայնությունը, մյուսների ներկայությամբ ու հիմա», ասաց Փաշինյանը ցույց տալով, թե ինչ դեմոկրատական բարքեր է հաստատված իր իշխանության ժամանակ: Փաշինյանը ըստ էության մոռացել է Սերժ Սարգսյանի ժամանակ իր խրոխտ ելույթները, հիմա ինչ, չենք կարող ասել, որ այն ժամանակ էլ Նիկոլ Փաշինյանն է վայելել այդ ազատությունը:

Երկրորդ աբսուրդը վարչապետի՝ հանրաքվեի եւ տնտեսական ակտիվության միջեւ բացահայտած կապն էր: Սահմանադրական բարեփոխումների հանրաքվեի 2 ամիս տեւելիք քարոզարշավը արդյոք կարո՞ղ է բացասական ազդեցություն ունենալ տնտեսական ակտիվության վրա հարցին ի պատասխան Փաշինյանն ասաց. «2019 թվականի փորձը ցույց տվեց, որ Հայաստանի տնտեսության վրա ազդող հիմնական գործոնը, ի դեպ՝ նախորդ տարիների փորձը նույնպես դա ցույց տվեց, որ ապագայի նկատմամբ ՀՀ քաղաքացիների ունեցած վստահությունն է։ Ուզում եմ հավաստիացնել, որ այդ քարոզարշավի ընթացքում ՀՀ քաղաքացիների վստահությունն ապագայի նկատմամբ ավելի կուժեղանա, ինչը նշանակում է, որ տնտեսական ակտիվությունը էլ ավելի կմեծանա։ Համոզված եմ, որ ոչ միայն բացասական ազդեցություն չի ունենա քարոզարշավը տնտեսական ընդհանուր վիճակի վրա, այլեւ կունենա աշխուժացնող ազդեցություն»։
Նիկոլ Փաշինյանն ասաց, որ Հայաստանում ստեղծվում է տուրիզմի նոր տեսակ՝ ընտրական տուրիզմ, նա կոչ արեց մեր հայրենակիցներին գալ եւ մասնակցել հանրքավեին: Ինչպես հասկանում եք, վարչապետի այս միտքն այլեւս մեկնաբանության կարիք էլ չունի, ուրիշ ինչ «կրուտիտ» պետք է անի Նիկոլ Փաշինյանը, ով անձնական ցանկությունն իրականացնելու համար պատրաստ է պետության բյուջեից շուրջ 3 միլիարդ դրամ ծախսել: Նախորդ ընտրություններից առաջ էլ տնտեսական հեղափոխություն էին խոստանում, ներդրումների հեղեղ, իսկ այն, ինչ կատարվեց ընտրություններից հետո շատ հուզիչ էր:
Իրականությունից կտրված հաջորդ բացահայտումը բանակի հետ էր կապված: Բանակում ինչպես հայտնի է վերջին շրջանում 43 օրում մենք ունեցել ենք 10 զոհ՝ ոչ մարտական գործողությունների պայմաններում: Իինչու, հարցադրմանն ի պատասխան Փաշինյանն ասաց խնդիրը հասկանալու համար այսօր պետք է գնանք ու տեսնենք, թե մեր բակերում, դպրոցներում մեր երեխաներն իրար հետ ինչպես են շփվում. «Ես այս վերջերս զարմացա, երբ իմացա, որ ընդհուպ ԱԺ պատգամավորներ ասում են՝ գողական ապրելակերպը մեր ազգային ինքնության պահպանման համար շատ կարեւոր է: Ես զարմացած եմ: Ճշտելու առիթ չեմ ունեցել պատգամավորների հետ, որոնց վերագրվում է, բայց խնդիրն այդտեղից է: Մենք բանակում վարտիքը փոխելու խնդիր ենք չէ՞ դրել իմ՝ վարչապետ դառնալուց հետո: Վարտիքները փոխվեց, լվացքի մեքենայով ապահովվեցին զորամասերը, հետո պարզվեց, որ մեր զինվորի արժանապատվության համար պրոբլեմ է, երբ որ իրենց վարտիքը լվացքի մեքենայի մեջ հայտնվի ուրիշի վարտիքի հետ: Դու հասկանո՞ւմ եք սա ինչ պրոբլեմ է: Երբ հանկարծ մի զինվոր հայտնվի, որը կրում է մի վարտիք, որն ուրիշի վարտիքների հետ լվացքի մեքենայի մեջ է եղել, դա կարող է այդ զինվորի հետ մեծ պարզաբանումներ առաջացնելու խնդիր ստեղծի»:
Այստեղ են ասել՝ իյա իրո՞ք, երբ նախկիններն ասում էին, թե բանակը հասարակության հայելին է, որ այն, ինչ կատարվում է քաղաքացիական կյանքում, տեղ է գտնում նաեւ բանակում, Փաշինյանը ամբիոններ էր ճոճում, նրան թվում էր բանակի ողջ խնդիրը վարտիքի եւ լվացքի մեքենայի մեջ է, այսօր, երբ ինքն է պետության ղեկավար, արդարանում է ճիշտ նույն ճանապարհով, որով նախկիններն էին անում:

Անի Սահակյան