Ինչու՞ է Եվրոպան շարունակում հանդուրժել Նիկոլ Փաշինյանին․ ի՞նչ նոր բան է խոստացել Փաշինյանը Եվրոպային.Արեն Ապիկյան (video)

Եվրոպական կառույցներն անցել են մեղմ դիվանագիտական լեզուն և նրանց հայտարարություններն արդեն բավականին կոշտ են։ Եվրոպայում հետևում են այս ամբողջ պրոցեսներին և այս ամենը շատ լուրջ հարված է հասցնում Հայաստանի հեղինակությանը: Այս մասին Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ժամանակ ասել է սահմանադրագետ Գոհար Մելոյանը՝ անդրադառնալով սահմանադրական փոփոխությունների նախագծին և հանրաքվեին։

«Իշխանությունն այսօր մտածում է այն ուղղությամբ, որ ապրիլի հինգին նախատեսված հանրաքվեն այնուամենայնիվ չկայան և իրենք մաքսիմալ ճնշումներ են գործադրում ՍԴ դատավոր-անդամների վա, որպեսզի նրանք գնան վաղաժամ կենսաթոշակի»,- ասաց քաղաքական մեկնաբան, «ArmNews FM»-ի տնօրեն Լիլիթ Թումանյանը:

Հիշեցնենք, որ օրերս ԱԺ-ում ընդունվեց սահմանադրական փոփոխությունների նախագիծ, ըստ որի՝ առաջարկվում է 1995թ. հուլիսի 5-ի Հայաստանի Հանրապետության Սահմանադրության՝ 2015թ. դեկտեմբերի 6-ի փոփոխություններով, 213-րդ հոդվածը շարադրել նոր խմբագրությամբ:

Ըստ Թումանյանի՝ Նիկոլ Փաշինյանը շատ լավ հասկանում է, որ հնարավոր է հանրաքվեին անհրաժեշտ թվով ձայն չհավաքվի, դրա համար էլ նա անմիջապես կոչով դիմեց սփյուռքում ապրող մեր հայրենակիցներին․ «Իրականում բուն պրոցեսն արդեն հետաքրքիր չէ, որովհետև այն հակաօրինական և ոչ լեգիտիմ է։ Եվ, եթե մենք հանրաքվեից հետո տեսնենք Նիկոլ Փաշինյանի կողմից ուժային կառույցներին չարաշահելու ավելի շատ քայլեր, դա կնշանակի, որ ինքը տեսել է շատ ցածր թվեր։»։

Հաղորդման մյուսը հյուրը՝ բիզնես խորհրդատու Արեն Ապիկյանը, կիսում է Լիլիթ Թումանյանի կարծիքը, որ իշխանությանն այնքան էլ ձեռնտու չէ հանրաքվեն․ «Կարծում եմ՝ հանրաքվեին իշխանությունը չի հավաքի ձայների այն քանակը, որպեսզի «ԱՅՈ»-ն անցնի։ Եթե անգամ պետական ամբողջ համակարգը լծված լինի այդ գործին, միևնույն է, 650 հազար ձայն անհնար է, որ հավաքվի»։

Ապիկյանի խոսքով՝ բացառված չէ, որ կլինեն դատավոր-անդամներ, որոնք չեն դիմանա ճնշումներին և կզիջեն իրենց դիրքերը։

Հարցին՝ եթե ցանկանան բողոքարկել հանրաքվեի արդյունքները, ո՞րն է այն մարմինը, որը պետք է բողոքարկմանը ընթացք տա, Մելոյանը պատասխանել է․ «Բողոքարկում ընդունող մարմինը Սահմանադրական դատարանն է։ Եթե ՍԴ դատավոր անդամներից երեքից ավելը որոշեն դիմել վաղաժամ կենսաթոշակի անցնելու օրենքին, այս դեպքում ստեղծվում է կազուսային իրավիճակ, այսինքն՝ ՍԴ ոչ լիարժեք կազմի դեպքում Սահմանադրական դատարանը չի կարող ընթացակարգով սահմանված ընթացք տալ բողոքարկմանը»։

Խոսելով Սահմանադրական դատարանի շուրջ ստեղծված իրավիճակին եվրոպական կառույցների կողմից տրված գնահատականներին՝ սահմանադրագետը նշել է․ «Եվրոպական կառույցներն անցել են մեղմ դիվանագիտական լեզուն և նրանց հայտարարություններն արդեն բավականին կոշտ են։ Եվրոպայում հետևում են այս ամբողջ պրոցեսներին և այս ամենը շատ լուրջ հարված է հասցնում Հայաստանի հեղինակությանը»։

Սահմանադրագետը հատուկ ընդգծեց, որ նման իրավիճակ ու նման գործընթացներ ամբողջ աշխարհում երբևէ չեն եղել․ «Համոզված եմ, որ, եթե անգամ հանրաքվեին «ԱՅՈ»-ն հաղթի, մոտ երկու-երեք տարի հետո մեր երկրի իշխանություններին պարտավորեցնելու են վերականգնել ՍԴ դատավոր անդամների լիազորությունները»։

Դիտարմանը՝ ի՞նչ խնդիր է այս հանրաքվեով ուզում լուծել իշխանությունը, Արեն Ապիկյանն ասել է․ «Քանի որ իշխանությունը չունի երկարաժամկետ գործողությունների պլան, զբաղվում է օրվա իրենց խնդիրներով։ Մենք դեռ բեմերի վրա Նիկոլ Փաշինյանին էլ կտեսնենք»։

Քաղաքական մեկնաբան Լիլիթ Թումանյանն էլ իր հերթին, խոսելով հանրաքվեի վերաբերյալ խորհրդարանական ընդդիմության պահվածքի մասին, ասել է․ «Մենք այսօր չունենք խորհրդարանական ընդդիմություն։ Իրական ընդդիմությունն արտախորհրդարանական է և ինձ համար ընդունելի չէ խորհրդարանական ընդդիմության պահվածքը՝ պարզապես այս գործընթացներին ձեռնպահ մնալը»։