Նոր Հայաստանում Արթուր Բաղդասարյան է բուծվում

Նոր Հայաստանում, նոր իշխանության թեւի տակ էլ Արթուր Բաղդասարյան է բուծվում ի դեմս Էդմոն Մարուքյանի:

Սկսենք հերթով: ՍԴ 7 դատավորներին տուն ուղարկելու հարցով սահմանադրական հանրաքվեի իրականացնելու հարցի քննարկման ժամանակ Էդմոն Մարուքյանն ու իր թիմը այնպիսի խրոխտ մեկնարկ վերցրեցին, թվում էր, թե գնալու են, ջարդեն կառավարության դռները, որտեղ ծրագրել են Հայաստան պետության դեմ մի դավադիր, հակապետական ծրագիր: Քանզի այդ ծրագրի արդյունքում խաթարվելու է Հայաստանի իրավական անվտանգությունը, պետության ժողովրդավարական, իրավական սկզբունքները գրվելու են սառույցին: Հետո պարզվեց, որ Էդմոնի վազքը մինչեւ այնտեղ է, որտեղ սկսվում է Փաշինյանի շահը, կամ որտեղից անդին վտանգ է սպառնում Փաշինյանի իշխանությանը: Համաձայնենք, լավ, որ չունեին 27 պատգամավոր եւ չէին կարող դիմել Սահմանադրական դատարան, իսկ ինչն է խանգարում պայքարել այս ապօրինի գործընթացի դեմ, ձեւավորել Ոչ-ի շտաբ, չվախենալ առճակատել իշխանության դեմ, ժողովրդին իրազեկել, թե որն է իշխանության իրական մտադրությունը:

Մարուքյանը երեկվա իր ասուլիսում երկար-բարակ ուզում էր համոզել, թե բոյկոտը ճիշտ է: «Մենք նախ ասում ենք, որ հանրաքվեն ամբողջությամբ ապօրինի է։ Այս պրոցեսն իրավական բեսպրիդելի ճանապարհով է առաջ գնում։ Հիմա էլ հարց է առաջանում, թե ովքեր են լինելու ճամբարներում։ Իշխանությունը սպասում է, որ ճամբարներ լինեն, որ դրանց վրա իր հրետանիով ու հետևակով ոչնչացնեն այդ ճամբարներին։ Մեր մոտեցումը հետևյալն է՝ հակասահմանադրական հանրաքվեի պրոցեսի մեջ չպիտի լինի մի քանի ճամբար, պետք է լինի այո-ի ճամբար միայն։ Իշխանություններին պետք է, որ լինի նաև «ոչ»-ի ճամբար, որ հակաքարոզչություն իրականացնի։ Թող մենակ Այո-ն քարոզեն, մեր ժողովուրդն էլ կորոշի՝ գնալ քվեարակության թե չէ։ «Ոչ»-ի ճամբար ունենալով, ստացվում է իշխանություններին շանս տալ տանել ատելություն, վերջում էլ մեկի նյարդերը տեղիք կտան և իրեն հայհոյողին քարով կխփի»,- ասում է նա:

Սա ոչ հիմնավոր, պարզունակ փաստարկ է: Դիցուք, ինչ կարող է ասել իշխանությունը Լուսավոր Հայաստանի մասին, ինչ հակաքարոզչություն կարող է իրականացնել, որը մարդկանց մոտ այսպես ասած եղանակ կփոխեր: Իհարկե, այսօր էլ իշխանական ճամբարից Մարուքյանի եւ նախկինների համագործակցության մասին են ակնարկներ հնչում, բացահայտ հայտարարություններ արվում, բայց այս սկզբունքով առաջնորդվելիս պիտի ոչինչ չանել, գնալ տուն: Որովհետեւ ցանկացած պարագայում իշխանությունում կգտնվի մեկը, ով նախկին բոբոներով կփորձի վարկաբեկել որեւէ ուժի: Եւ հետո, գոնե Մարուքյանի դեպքում այդ արգումենտը չաշխատող է, քանի որ նախորդ խորհրդարանական ընտրություններից առաջ չնայած Փաշինյանն անձամբ էր նրան մեղադրում, բայց ի վերջո նրա հետ Ելք դաշինք կազմեց, ինչը նշանակում է՝ կամ Փաշինյանը սխալվել էր իր գնահատականում, կամ ինքն էլ էր Մարուքյանի հետ համագործակցում նախկինների հետ: Այո, պարոն Մարուքյանը ճիշտ է, Ոչ-ի ճակատում դիրքավորված ցանկացած մեկին իշխանությունը խրտվիլակի պես օգտագործելու է իր շնաբարո կրքերը հագուրդ տալու նպատակով, բայց ցանկացած հաջողություն զրկանքներ, զոհեր է պահանջում: Հատկապես, երբ նժարին պետության եւ նրա իրավական անվտանգության հարցն է դրված: Իսկ մարուքյանական դիրքորոշումը միայն ու միայն իշխանությանն է ձեռնտու:

Անի Սահակյան