Վենետիկի վրա թքած ունենալու նուրբ արվեստը

Իշխող մեծամասնությունում հիմարության մրցույթ է հայտարարված՝ «Ով այնպիսի ապուշություն դուրս կտա» խորագրի ներքո: Մրցույթի մասնակիցները այս պահին շատ չեն, բայց աճի միտումներ են գրանցվում՝ հաշվի առնելով ամեն հաջորդ օրվա ավելի տենդենցիոզ հայտարարությունները: Օրերս Պետաիրավական հանձնաժողովի անդամ , Իմ Քայլի պատգամավորն էր փորձում հիմնավորել միջազգային կառույցներից հանրաքվեի նախագծի հարցով խորհրդատվական կարծիք չլսելու պատճառների մասին. «Սահմանադրական փոփոխությունների հարցով Վենետիկի հանձնաժողովին չդիմելը, կարծում եմ՝ պետք է լինի բացառիկ պրակտիկա. սա բացառիկ իրավիճակ է, մենք բազմիցս ասել ենք, թե ինչու է բացառիկ, մեկի համար մեր փաստարկները կարող են համոզիչ թվալ, մյուսների համար՝ ոչ։ Բայց մենք շարունակում ենք աշխատանքը Վենետիկի հանձնաժողովի հետ, երեկ էլ Արդարադատության նախարարը հեռախոսազրույց է ունեցել հանձնաժողովի նախագահ պարոն Ջիանի Բուքիքիոյի հետ»,- հայտարարում էր Գրիգորյանը:
Ալեն Սիմոնյանն էլ ասում է. «ՀՀ իշխանությունը հաշվետու է եւ մի ընտանիքի անդամ է կազմում ՀՀ ժողովրդին՝ այն մարդկանց, որոնք մեզ քվեարկել են, եթե ՀՀ իշխանությունը նպատակահարմար կգտնի, եթե իրավական առումով ճիշտ կգտնի Վենետիկի հանձնաժողովի կամ որեւէ մեկ այլ մարմնի խորհրդակցական կարծիք հարցնել, մենք դա կանենք, մնացած բոլոր պարագաներում մենք հաշվետու են ՀՀ ժողովրդի առաջ»։

Սակայն, այդուհանդերձ, այս պահի դրությամբ առաջատարը Իմ Քայլի պատգամավոր Վահագն Հովակիմյանն է: Նա հայտարարել է, որ Վենետիկի հանձնաժողովի նախագահ Ջիաննի Բուքիքիոն անձնական հայտարարություններ է անում , որովհետև մի 10 տարի առաջ Սերժ Սարգսյանը նրան կաշառել է՝ տալով թանկարժեք ադամանդներով շքանշան : Այս հանճարեղ աբսուրդով է Հովակիմյանը բացատրում սահմանադրական հանրաքվեի հակասահմանադրական նախագծի վերաբերյալ Վենետիկի հանձնաժողովի կարծիքը չհարցնելու իշխանության քայլը:

Հիշեցնենք, որ նախագծի քվեարկությունից հինգ պակաս ԵԽԽՎ-ն հայտարարություն տարածեց՝ կոչ անելով անհապաղ դիմել Վենետիկի հանձնաժողովին խորհրդատվական կարծիք ստանալու վերաբերյալ: Եւ քանի որ իշխանությունը հասկանում է, որ այդ պարագայում կասեցվելու է իր ձեռնարկած հակաօրինական գործընթացը, որոշել է Վենետիկին կաշառակեր հռչակելու լոբբինգ անել: Իսկ 2009թ. Ջիանի Բուքիքիոյին պատվո շքանշան է շնորհվել ոչ թե ՀՀ նախագահ Սերժ Սարգսյանի, այլ Հայաստանի Հանրապետության անունից՝ Հայաստանի եվրոպական ինտեգրմանը նպաստելու և ՀՀ-ում իրավական բարեփոխումների իրականացման գործում ունեցած ներդրման համար: Բայց սա չէ գլխավորը:
Եւ ողջ խնդիրը Վենետիկի հանձնաժողովի նախագահի անձի ու նրա «մութ անցյալի» մասին չէ : Խոսքն այն մասին է, որ Հայաստանը` որպես ԵԽ լիիրավ անդամ, ունի ստանձնած պարտավորություն, որ Սահմանադրության փոփոխություն ենթադրող նախագիծը նախապես պետք է ուղարկվի տվյալ մասնագիտական հանձնաժողովին, ինչը չի արվել: Գուցե Հայաստանը վերադառնում է քարանձավային ժամանակաշրջանի եւ ցեղապետերն են որոշելու՝ ում ուտել, երբ եւ ինչպես, մի բան ակնհայտ է, որ մտածողությունը քարանձավային է:

Անի Սահակյան