Փչանալու մեխանիկա, ափսոս էր իրավաբանը

Թվում էր, թե Նիկոլ Փաշինյանը կխնայի ոմանց, չի փչացնի մասնագետներին, երբ սեղանին է դրված քաղաքական օրակարգ, բայց դա միայն թվում է: Իմ Քայլի ամենահեղինակավոր իրավաբան Վլադիմիր Վարդանյանը ձեզ օրինակ: Սահմանադրական հանրաքվեի հարցով վերջին օրերին նա գրեթե լռում էր, գոնե շրջանցում ակնհայտ հակաիրավական խութերը, բայց քանի որ ռեժիմը խուճապի մեջ է, մարտադաշտ է հանել ծանր հրետանուն: Վլադիմիր Վարդանյանը լրագրողների հետ զրույցում խաչ քաշելով մասնագիտական երկարամյա կարիերայի վրա փորձում էր հրամցնել իրենց եփած ճաշը: Հանրաքվեի մասին օրենքի համաձայն ընտրատեղամասում պետք է լինի նաև ՍԴ որոշումը, եթե ՍԴ չդիմեն, ի՞նչ որոշում է դրված լինելու ընտրատեղամասում հարցին, Վլադիմիր Վարդանյանը անխռով պատասխանեց, որ որոշում չի լինելու:
«Ես, տարբեր երկրների փորձը հաշվի առնելով, ենթադրում եմ, որ եթե հարցը հանրաքվեով չլուծվի, կարող է խորքային ազդեցություն ունենալ, վերածվել խրոնիկ իրավիճակի, որի հանգուցալուծումը նույնիսկ այսօր շատ երկրներում նշմարված չէ: Գուցե այս լուծումը կդառնա իրավաչափ լուծում՝ օրինակ՝ դառնալով այլ մայրցամաքների կամ այլ եվրոպական պետությունների համար, որոնք նման խնդիրների են բախվում»,-ասաց պատգամավորը: Փաստորեն իշխանության մեր հանճարները կարծում են, որ իրենք նոր հեծանիվ են հորինել, որը օրինակ կարող է դառնալ այլ մայրցամաքների համար: Համաձայնեք անմեղսունակության եւ մարտնչող ինքնավստահության մեծ դոզա է պետք ունենալ այսպիսի հայտարարարություն անելու համար:
Մյուս աբսուրդը պարոն իրավաբանի կողմից, հարցին՝ հիմա դիմելու են Վվենետիկի հանձնաժողով, թե ոչ, Վարդանյանը կրկին նույն ինքնավսըահությամբ ասում է, թե սահմանադրական փոփոխությունների ժամանակ պարտադիր չէ դիմել: Իյա իրոք, կասեր դասականը, իսկ երբ է պարտադիր, եթե ոչ հենց այդ փոփոխությունների ժամանակ. «Վենետիկի հանձնաժողովի հետ շարունակում ենք ակտիվ աշխատել, բայց, քանի որ այս նախագիծը վերաբերում է այնպիսի փոփոխության, որի պարագայում Վենետիկի ասելիքը շատ քիչ է, ուստի իմաստ չկա նախագիծը ուղարկել։ Կան հարցեր, որոնք վերաբերում են Սահմանադրական փոփոխություններին և անպայման չէ դրանք ուղարկել միջազգային փորձաքննության»:
Վարդանյանի խոսքով՝ ՍԴ-ն անձնական շահագրգռվածություն ունի հարցի վերաբերյալ և տվյալ պարագայում հարցն ուղարկել ՍԴ ու ակնկալել քիչ թե շատ օբյեկտիվ որոշում որոշակի առումով խնդրահարույց է։ Ստեղծված իրավիճակում, պատգամավորի համոզմամբ, կա մի լուծում՝ դիմել ժողովրդին և հարցնել՝ ի՞նչ կարծիքի է գործող կարգավորումների մասին։
Վլադիմիր Վարդանյանը ճիշտ կանի պատասխանել հարցին՝ իսկ ԱԺ-ն ի դեմս իշխող ֆրակցիայի չունի՞ շահագրգռվածություն ՍԴ-ից ազատվելու եւ իր կրնկի տակ գործող ՍԴ ձեւավորելու հարցում, պատասխանը միանշանակ է ու դրական, հարց է առաջանում, իսկ ինչու է ձեզ կարելի հարցով որոշում կայացնել, իսկ ՍԴ-ին ոչ:

Անի Սահակյան