Նիկոլ Փաշինյանը խախտել է հանրաքվեի մասին օրենքը

Սահմանադրական դատարանի դատավորներին և նախագահին պաշտոնանկ անելու վերաբերյալ հարցը հանրաքվեի դնելը հակասում է ոչ միայն ՀՀ սահմանադրությանը, այլ նաև Հանրաքվեի ամսին ՀՀ օրենքին:

Այսպես` Հանրաքվեի մասին ՀՀ օրենքի 8-րդ հոդվածը սահմանում է Սահմանադրության փոփոխությունների նախագիծը հանրաքվեի դնելու կարգը: Ըստ այդմ` Սահմանադրական դատարանի կողմից «Սահմանադրական դատարանի մասին» Հայաստանի Հանրապետության սահմանադրական օրենքով սահմանված կարգով և ժամկետներում նախագծի՝ Սահմանադրությանը համապատասխանող ճանաչելու մասին որոշում ընդունվելու դեպքում Ազգային ժողովը Սահմանադրական դատարանի որոշման կայացումից հետո` 15-օրյա ժամկետում, որոշում է ընդունում նախագիծը հանրաքվեի դնելու վերաբերյալ` պատգամավորների ընդհանուր թվի ձայների առնվազն երկու երրորդով:
Սահմանադրական դատարանի կողմից Սահմանադրության փոփոխությունների նախագծի՝ Սահմանադրությանը հակասող ճանաչելու մասին որոշում ընդունվելու դեպքում նախագիծը հանվում է շրջանառությունից:

Իսկ նույն օրենքի 25-րդ հոդվածը սահմանում է, որ հանրաքվեի տեղամասային կենտրոնում պետք է լինեն՝
1) հանրաքվեի դրված հարցի տեքստը,
2) հանրաքվեի դրված իրավական ակտի նախագծի՝ Սահմանադրությանը համապատասխանող ճանաչելու վերաբերյալ Սահմանադրական դատարանի որոշումը,
3) հանրաքվեի դրված հարցի վերաբերյալ «ԱՅՈ» և «ՈՉ» քարոզչության կողմերի բացատրական զեկույցը:
Փաստորեն ապրիլի 5-ի հանրաքվեի ժամանակ հանրաքվեի դրված իրավական ակտի նախագծի՝ Սահմանադրությանը համապատասխանող ճանաչելու վերաբերյալ Սահմանադրական դատարանի որոշումը բացակայելու է, հետևաբար գործընթացն արդեն իսկ անօրինական է` դրանից բխող բոլոր հետևանքներով:
Այստեղից էլ բխում է հաջորդ տրամաբանական հարցը` եթե հանրաքվեի արդյունքների և անցկացման հետ կապված դատական հայց ներկայացնելու խնդիր առաջանա, ուր են դիմելու այո-ի կամ ոչ-ի կողմնակիցները: Ըստ էության, Սահմանադրական դատարանը չի կարող քննության առնել ի սկզբանե հակասահմանադրական և հակաօրինական գործընթացը, կամ էլ քննարկելու դեպքում ստիպված է լինելու արձանագրել, որ այն հակասահմանադրական է:
Այլ կերպ ասած` Նիկոլ Փաշինյանը հետևողականորեն երկիրը տարավ սահմանադրական ճգնաժամի: Բայց այստեղ մի շատ կարևոր խնդիր կա. Սահմանադրական կարգի տապալումը վաղեմության ժամկետ չունի, և երբևէ այս մեղադրանքով Փաշինյանի ու այսօրվա քաղաքական մեծամասնության դեմ անպայման գործ հարուցվելու է:

 Հայկ  Դավթյան