Ուհանում շահագործման է հանձնվել կորոնավիրուսի բուժման գծով մասնագիտացած երկրորդ հիվանդանոցը

Չինական Ուհան քաղաքում փետրվարի 8-ին շահագործման է հանձնվել սեղմ ժամկետներում կառուցված, կորոնավիրուսի բուժման գծով մասնագիտացած երկրորդ հիվանդանոցը` «Լեյշենշան»-ը: Այս մասին տեղեկացնում է РИА Новости գործակալությունը` հղում անելով Չինաստանի Կենտրոնական հեռուստատեսությանը:

Ուհանի արվարձանում կառուցված հիվանդանոցը զբաղեցնում է 79 000 քմ տարածք, որի մեծ մասը նախատեսված է հիվանդների համար, 10 մասնաշենք նախատեսված է բժշկական անձնակազմի և նյութատեխնիկական միջոցների համար: Բժիշկների համար ընդհանուր առմամբ ստեղծվել է 264 սենյակ, որոնցից յուրաքանչյուրում կարող է ապրել 6 մարդ, սենյակներում տեղադրված է երեք երկհարկանի մահճակալ, կա օդորակիչ, հեռուստացույց, այլ էլեկտրական համակարգեր, առանձին լոգարան: