Վանեցյանի բացահայտումն ու խոշոր վրիպումը

ԱԱԾ նախկին ղեկավար Արթուր Վանեցյանը տպագիր մեդիայի խմբագիրների հետ իր հայտնի հանդիպման ժամանակ մի քանի հետաքրքիր բացահայտում, միաժամանակ նաև մեծ բացթոցում է արել: 

1. Վանեցյանը հայտարարել է, որ Սերժ Սարգսյանին եւ Ռոբերտ Քոչարյանին անձամբ չի ճանաչում, Միքայել Մինասյանին ճանաչում է շատ վաղուց, նրա հետ ընկերներ չեն եղել, ունեցել են նորմալ շփումներ: «Վերջին անգամ նրան հանդիպել եմ ԱԱԾ-ում՝ ԱԱԾ տնօրեն եղած ժամանակ՝ Նիկոլ Փաշինյանի գիտությամբ եւ հանձնարարությամբ: Հանձնարարության բովանդակության մասին գիտեն երեք հոգի՝ ես եւ եւս երկու հոգի, որոնք այսօր իմ քաղաքական թիմից չեն: Մնացած հարցերով խնդրում եմ դիմեք նրանց: Ռամզան Քադիրովի հետ ունեցել եմ շփումներ, որոնց մասին պատմել չեմ ուզում, որպեսզի չվտանգեմ այն հնարավոր ծրագրերը, որոնք պետք է իրականանան մեր երկրի համար»,-հայտարարել է նա:

Ինչ հանձանրարությամբ է նա հանդիպել Միքայել Մինասյանի հետ` հստակ չէ: Վանեցյանը չի մանրամասնել նաև, թե արդյոք հանդիպման արդյունքը գոհացուցիչ է եղել վարչապետ Նիկոլ Փաշինյանի համար: Վանեցյանը փակագծերը մինչև վերջ չի բացել` թերևս հասկանալով, որ չափազանց անկեղծանալու դեպքում կարող է մեղադրվել պետական գաղտնիքներ հրապարակելու համար: Թերևս հիմա խոսելու հերթը Փաշինյանինն է: Նա պետք է պարզաբանի, թե նախկիններին հիմնավորապես մերժելուց հետո ԱԱԾ ղեկավարի միջոցով ինչ ասելիքներ ու հարաբերություններ է փորձել կառուցել նախկինների հետ: Ի վերջո, ինչ է պահանջել Միքայել Մինասյանից Նիկոլ Փաշինյանը` փող, գաղտնիքներ, փաստաթղթեր, երաշխիքներ:
2. Ռոբերտ Քոչարյանի գործի մասին խոսելով՝ Արթուր Վանեցյանը նշել է, որ խոսքը մարտի 1-ի գործի բացահայտման մասին է, և առաջնահերթությունը պետք է տրվի տասը մարդու սպանության բացահայտմանը: Նրա կարծիքով` այսօրվա քննությունը չի նպաստում դրան: «Ռոբերտ Քոչարյանի խափանման միջոց կալանավորումը ընտրված է սխալ, եւ նա երբեւիցե իր որեւէ քայլով ցույց չի տվել, որ խուսափում է քննությունից: Ճիշտ կլիներ Ռոբերտ Քոչարյանի խափանման միջոցը վերանայվեր, դա կթուլացներ հասարակական որոշ շրջանակներում լարվածությունը եւ միայն կնպաստեր գործի լիարժեք քննությանը եւ բացահայտմանը»,- նշել է Վանեցյանը: Սրանով թերևս ԱԱԾ նախկին ղեկավարը անուղղակիորեն հավաստել է, որ Ռոբերտ Քոչարյանն այժմ քաղբանտարկյալի կարգավիճակում է:

3. Վանեցյանը ազատման դիմում երեք անգամ է գրել` առաջին դիմումը եղել է գաղտնալսումից անմիջապես հետո, եւս մեկ անգամ՝ աշխատելու ընթացքում և վերջինը, երբ արդեն ազատվել է: Այսպիսով ԱԱԾ նախկին ղեկավարը հաստատել է այդ շրջանում մամուլում տեղ գտած տեղեկությունները, թե նա դիմումներ է գրում` Փաշինյանի հետ անհամաձայնության պատճառով, դրանք առնչվել են նաև ՍԴ-ին. «Հանձնարարականներ եղել են բոլորի նկատմամբ: Արդեն իսկ իշխանությունները չեն թաքցնում, որ իրենք չեն հանդուրժելու Հրայր Թովմասյանի՝ ՍԴ նախագահ լինելու հանգամանքը: Այն զարգացումները, որ եղան ՍԴ շուրջ վերջին շրջանում, ես չէի կարող ուղղակի լինել մասնակից նման զարգացումների: Ինձ ուղիղ հանձնարարական չի եղել: Իմ՝ հրաժարական ներկայացնելու հիմնական պատճառներից մեկը եղել է այդ հարցում անհամաձայնությունը, եւ ես հնչեցրել եմ կանգ առնելու սթափեցնող կոչը»:
4. Արթուր Վանեցյանը չի ընդունում պետական հեղաշրջման փորձի մեղադրանքը . <<Պետական հեղաշրջման փորձ իրականացնող մարդը պետք է նստած լիներ համապատասխան վայրում: Ես նման ցանկություն չեմ ունեցել, ընդհակառակը, վստահ եմ՝ ցանկացած մարդ, որը կփորձի իրականացնել պետական հեղաշրջում կամ հակասահմանադրական ճանապարհով կփորձի տիրանալ իշխանության, այդ մարդը պետք է դատապարտվի եւ կրի իր պատիժը»,- ասել է նա: Վանեցյանը նաև չի կիսում այն մոտեցումը, թե 2018-ին Նիկոլ Փաշինյանը իշխանության է եկել հակասահմանադրական ճանապարհով: Նրա խոսքով` դա եղել է համաժողովրդական պահանջ:
5. Առաջիկայում ԱԱԾ նախկին ղեկավարը կգրանցի քաղաքական կուսակցություն, որը լինելու է աջ կենտրոնամետ ուղղվածության և նպատակ չի ունենալու հետ բերել նախկին ուժերին. «Այսօր անհրաժեշտություն կա, որ ձեւավորվի մի քաղաքական ուժ, որը կփորձի համախմբել հասարակության այն լայն զանգվածը, որը դժգոհ է իշխանություններից, եւ նրանց հույսերը չեն արդարացել: Նրանք մարդիկ են, որոնք չեն ուզում վերադարձ անցյալին: Հասարակությանը սեւերի ու սպիտակների բաժանելը կեղծ օրակարգ է, որը բերվել է քաղաքական դաշտ, թե իբր գործող իշխանությունների այլընտրանքը նախկիններն են: Վերադարձ անցյալին երբեք չի լինելու, ես այն մարդն եմ, որ պայքարելու եմ դրա դեմ: Նման բան չկա»,- ասել է Վանեցյանը:

Հնարավոր է, որ Վանեցյանը բացառելով անցյալի վերադարձը` նկատի է ունեցել, որ նախկին ուժերը կոռուպցիայի և մի շարք արատավոր այլ բարքերի կրողներ են եղել: Բայց անցյալի մի ամենկարևոր ժառանգությունն ամեն դեպքում պետությունն է իր անցած գրեթե 30-ամյա ճանապարհով, Արցախյան հաղթանակով, երկրի բանակով և մնացած ինստիտուտներով: Անցյալի մերժումն այս իմաստով չի կարող լինել ամբողջական, որովհետև ամբողջական մերժումը կնշանակի հրաժարվել ձեռքբերումներից և առաջին հերթին Արցախի հաղթանակից: Վանեցյանի քաղաքական առաջին հրապարակային ուղերձն այս առումով լուրջ բացթողում ուներ, որը ԱԱԾ նախկին ղեկավարը պարտավոր է առաջիկայում շտկել, նաև հստակեցնել, որ այսօր կառուցվող նոր Հայաստանը նախկինների ստեղծածի իրավահաջորդն է` տեր է ձեռքբերումներին, պարտավոր է վերացնել բացթողումները:

 Հայկ  Դավթյան