Նոր զառանցանք Բաքվից

Երեկ Բաքվում կայացավ Թյուրքալեզու երկրների համագործակցության խորհրդի (Թյուրքական խորհուրդ) անդամ երկրների արտգործնախարարների արտահերթ նիստը, որը մամուլի համար եղել է դռնփակ: Նիստին մասնակցել են Թուրքիայի արտգործնախարար Մևլութ Չավուշօղլուն, Ադրբեջանի արտգործնախարար Էլմար Մամեդյարովը, Ղրղզստանի արտգործնախարար Չինգիզ Այդարբեկովը, Ղազախստանի արտգործնախարար Մուխտար Տլեուբերդին, Ուզբեկստանի արտգործնախարար Աբդուլազիզ Քամիլովը և Թյուրքական խորհրդի գլխավոր քարտուղար Բաղդադ Ամրեևը։ Թուրքիայի ԱԳ նախարար Մևլութ Չավուշօղլուն Բաքու այցի ընթացքում առանձնազրույցներ կունենա Ադրբեջանի արտգործնախարար Էլմար Մամեդյարովի, Ղրղզստանի արտգործնախարար Չինգիզ Այդարբեկովի և Թյուրքական խորհրդի գլխավոր քարտուղար Բաղդադ Ամրեևի հետ։

Փետրվարի 6-ին Բաքվում Ադրբեջանի և Թուրքիայի ԱԳ նախարարների հանդիպման ընթացքում Էլմար Մամեդյարովը Մևլութ Չավուշօղլուին տեղեկացրել է Ժնևում Հայաստանի ԱԳ նախարար Զոհրաբ Մնացականյանի հետ Լեռնային Ղարաբաղի հակամարտության կարգավորման հարցով ունեցած հանդիպման մասին: «Հանդիպման ընթացքում Մամեդյարովը Չավուշօղլուի հետ քննարկել է Լեռնային Ղարաբաղի հակամարտության կարգավորման գործընթացը, մասնավորապես` Հայաստանի և Ադրբեջանի ԱԳ նախարարների ժնևյան հանդիպումը»,- տեղեկացրել է Ադրբեջանի ԱԳՆ-ն: Նախարարներն ընդգծել են նաև Թուրքիայի և Ադրբեջանի նախաձեռնած տարածաշրջանային ծրագրերի կարևորությունը:

Ժնևի բանակցություններից հետո որոշակի գաղտնիություն պահպանող ադրբեջանական կողմը խորամանկ տակտիկա է որդեգրել: Մի կողմից՝ Ալիևը Թուրքիայի իշխանությունների օգնությամբ Ադրբեջանի պահանջների վրա է ուշադրություն հրավիրում, մյուս կողմից՝ հերթական քարոզչական քայլն է իրականացնում:

ԵԱՀԿ Մինսկի խմբի համանախագահող պետության՝ ԱՄՆ-ի դեսպանի ու վերջերս Լեռնային Ղարաբաղի «ադրբեջանական» համայնքի ղեկավարի հետ հանդիպում կազմակերպելուց հետո էլ Բաքվից կոչ են արել ԼՂՀ բնակիչներին մասնակցել Ադրբեջանում սպասվող արտահերթ ընտրություններին: Ըստ hraparak.am-ի՝ այժմ էլ Բաքվում գործող, այսպես կոչված՝ «Ղարաբաղի ադրբեջանցիների համայնք» կազմակերպությունը հանդես է եկել կոչով ուղղված Ադրբեջանի՝ «ծագումով հայ ընտրողներին, ովքեր բնակվում են՝ հայերի կողմից օկուպացված ադրբեջանական տարածքներում»։

Կոչին հետևում է ցնդաբանություն հիշեցնող մի տեքստ այն մասին, թե ինչպես է Հայաստանը՝ «ագրեսիա գործադրել», «գրավել տարածքները», «իրականացրել ադրբեջանցիների հանդեպ էթնիկ զտումներ», ըստ նրանց՝ «զրկել է Ադրբեջանի տարածքում բնակվող ծագում հայ քաղաքացիներին իրենց ձայնի իրավունքից օգտվելու ու ընտրություններին մասնակցելու հնարավորությունից»։ Մի խոսքով՝ մի իսկական զառանցանք...

Ի դեպ, ՀՀ ԱԳՆ մամուլի խոսնակ Աննա Նաղդալյանը քիչ առաջ անդրադարձել է Բաքվում ԱՄՆ դեսպանի աղմուկ բարձրացրած հանդիպման թեմային: 

«Ադրբեջանի կառավարության կողմից կազմակերպված ոչ կառավարական կազմակերպությունների (GONGO) գործունեությունը, ինչպիսի մտացածին անվամբ էլ նրանք ներկայանան, որևէ գործոն չի հանդիսանում խաղաղ գործընթացում», նշել է ՀՀ ԱԳՆ մամուլի խոսնակը: Ապա՝ նաև հավելել է. «Հակամարտության կողմերի վերաբերյալ Հայաստանի դիրքորոշումը հստակ է: Սկսած 1992 թվականից Արցախի իշխանությունները ԼՂ ընտրյալ ներկայացուցիչների կարգավիճակով մասնակցել են խաղաղ գործընթացին: ԼՂ իշխանությունները ՀՀ-ի և Ադրբեջանի հետ մեկտեղ ստորագրել են հրադադարի հաստատման կոչ պարունակող Բիշքեկի արձանագրությունը, իսկ նույն 1994թ.-ի ԵԱՀԿ Բուդապեշտի գագաթաժողովի եզրափակիչ փաստաթղթում ամրագրվել է եռակողմ բանակցային ձևաչափը, որը բխում է 1994թ.-ի եռակողմ՝ ԼՂ, Ադրբեջան և Հայաստան հրադադարի համաձայնագրից»:

Մետաքսյա Շալունց