Օլանդի վարկանիշը հակառեկորդ է սահմանել

Ֆրանսիայի նախագահ Ֆրանսուա Օլանդի աջակցության մակարդակը ապրիլին շարունակել է անկումը՝ հասնելով իշխանության ղեկին նրա գտնվելու ողջ ընթացքում ամենացածր նշագծին։ Նման տվյալներ է հրապարակել Elabe սոցիոլոգիական ծառայությունը, որի հետազոտությունն անցկացվել է Le Eco թերթի պատվերով։ Հետազոտության արդյունքներով՝ անցած ամիս պետության ղեկավարի վարկանիշը նվազել է 2 կետով։ Պատասխանողների միայն 16 տոկոսն է սոցիոլոգներին հայտնել, որ վստահում է Օլանդին և հավատում, որ նա կարող է արդյունավետորեն հաղթահարել բոլոր հիմնական խնդիրները, որոնք կանգնած են Ֆրանսիայի առջև։ Գործող նախագահի աջակցության նման ցածր մակարդակ Elabe-ում գրանցում են 2012-ին նրա ընտրվելու պահից ի վեր առաջին անգամ։ Օլանդի հետ մեկտեղ շարունակել է նվազել նաև Ֆրանսիայի վարչապետ Մանուել Վալսի վստահության վարկանիշը։ Ապրիլին նրա աջակցության մակարդակը նույնպես նվազել է 2 կետով՝ հասնելով 20 տոկոսի նշագծին։ Այս ֆոնին շարունակում է զգալիորեն միավորներ հավաքել էկոնոմիկայի նախարար Էմանուել Մակրոնը։ Ապրիլին նրա վարկանիշն աճել է միանգամից 5 կետով, և այժմ նրա մասին դրական կարծիք է արտահայտում պոտենցիալ ընտրողների 43 տոկոսը։ Ժողովրդականության մակարդակով անկուսակցական նախարարը գրեթե հավասարվել է նախկին վարչապետ, Բորդոյի քաղաքապետ Ալեն Ժյուպեին, ով ներկայում նախագահի պաշտոնում առաջադրման ամենահավանական թեկնածուն է աջ կենտրոնամետ ընդդիմությունից։