Տիգրան Հակոբյանն ու Սասուն Խաչատրյանը «փուռն են տալիս» միմյանց
Հեռուստատեսության և ռադիոյի հանձնաժողովը հայտարարություն էր տարածել Հայաստանի Հանրային հեռուստաընկերության «Լուրեր» լրատվական ծրագրի ընթացքում եթեր հեռարձակված` «ՀՔԾ-ն մանրամասներ է ներկայացրել Հրայր Թովմասյանի մեղադրանքից» վերտառությամբ տեսանյութի վերաբերյալ` նշելով, որ «կիսում է Մարդու իրավունքների պաշտպանի տեսակետն առ այն, որ տեսանյութում խախտվել է անմեղության կանխավարկածի սկզբունքը» և «արձանագրելով», որ նշված սկզբունքի խախտման պատասխանատուն առաջին հերթին ՀՔԾ-ն է։
Ի պատասխան Տիգրան Հակոբյանի ղեկավարած կառույցի այս գնահատականի, պատասխան հայտարարությամբ է հանդես եկել ՀՀ հատուկ քննչական ծառայությունը: «ՀՀ հատուկ քննչական ծառայությունը հանդիսանալով քրեական հետապնդման մարմին և քրեական դատավարության օրենսդրության համաձայն` հանդես գալով մեղադրանքի կողմում, իրավասու է քրեական գործով տեղեկատվություն տրամադրել այն ծավալով, որ չափով որ անհրաժեշտ է համարում այս կամ այն քրեական գործի շրջանակներում` ելնելով գործի նկատմամբ հանրային հետաքրքրությունից և կարևորելով հասարակության կողմից օբյեկտիվ և անաչառ տեղեկատվություն ստանալու իրավունքը: Նման դիրքորոշումը բարձրաձայնելը որևէ կերպ չի կարող դիտվել որպես անմեղության կանխավարկածի սկզբունքի խախտում:
Նշենք նաև, որ համաձայն ՀՀ քրեական դատավարության օրենսգրքի 201-րդ հոդվածի` նախնական քննության տվյալները ենթական են հրապարակման միայն գործով վարույթն իրականացնող մարմնի թույլտվությամբ, ինչը տվյալ դեպքում առկա է: Այսինքն` նախաքննական մարմնի կողմից լրատվամիջոցին ներկայացվել են ՀՀ քրեական դատավարության օրենսգրքով նախատեսված ընթացակարգերի խստիվ պահպանմամբ ձեռք բերված ապացույցների բավարար համակցությամբ հիմնավորված փաստերի մասին վարույթն իրականացնող մարմնի հետևությունները, որոնց հիման վրա արդեն իսկ անձին մեղադրանք է առաջադրվել:
Վերոգրյալը հաշվի առնելով և արձանագրելով, որ ՀՀ հատուկ քննչական ծառայության գործունեությանը գնահատական տալը գտնվում է Հեռուստատեսության և ռադիոյի հանձնաժողովի իրավասություններից դուրս, հորդորում ենք այսուհետ ձեռնպահ մնալ քրեական գործերի և, առհասարակ, ՀՔԾ գործունեության մասին սիրողական մակարդակի իրավական վերլուծություններ անելուց»,- մասնավորապես նշվում է հաղորդագրության մեջ:
Հեռուստատեսության և ռադիոյի հանձնաժողովը հատկապես ԵԽԽՎ համազեկուցողների` ՍԴ շուրջ ստեղծված իրավիճակի վերաբերյալ հայտնի զեկույցից հետո, բնականաբար ստպված էր ինչ-որ բան անել: Բայց արի ու տես, որ պետության միջոցներով ստեղծված այս կառույցը բավարար համարձակություն չի ունեցել գնահատական տալու Հանրային հեռուստաընկերությանը, որը նույնպես հարկատուներիս հաշվին ապրող կառույց է: Փաստորեն Հանրայինի նատաշկաներն անձեռնմխելի են, իսկ Տիգրան Հակոբյանի և Սասուն Խաչատրյանի ղեկավարած հիմնարկները միմյանց փուռն են տալիս:
Սա այն դեպքն է, որ ՀՔԾ-ի հետ չհամաձայնվելը դժվար է` Հեռուստատեսության և ռադիոյի հանձնաժողովն ի՞նչ գործ ունի գնահատելու ՀՔԾ գործունեությունը: Դրա համար կան այլ ատյաններ: Հանձնաժողովի սուրբ պարտականությունն է վերահսկել ԶԼՄ-ների գործունեությունը և գնահատական տալ, թե որքանով են նրանք պահպանում քարոզչության հավասարակշռությունն ու բազմակարծությունը, ինչը տվյալ պարագայում Հանրայինը կոպտորեն խախտել է` ի վնաս ՍԴ նախագահի: Եթե մեկ այլ ռեպորտաժում, կամ էլ գուցե նույն ռեպորտաժի մեջ ներկայացվեր նաև ՍԴ նախագահի փաստաբանների մեկնաբանությունը հարուցված գործի առնչությամբ, հարցին կարելի էր չանդրադառնալ: Ինչ վերաբերում է ՀՔԾ-ի կողմից Հրայր Թովմասյանի անմեղության կանխավարկածի խախտմանը, ապա դա դատարանում քննարկելու խնդիր է:
Հայկ Դավթյան
Հետևեք մեզ Viber-ում
