Հայաստանի շուրջ օղակը սեղմվում է

Մինչ Հայաստանում իշխանությունները ուժեղացնում են ՍԴ-ի շուրջ ճնշումները, միջազգային գործընկերները վերջին օրերին խոշորացույցի տակ են վերցրել իշխանությունների գործողությունները: Իմ Քայլի խմբակցության ղեկավար Լիլիթ Մմակունցը դեռ չէր հասցրել խորհրդարանում հոխորտալ, թե ՍԴ-ի հարցերը լուծելու պահանջ ստացել են ժողովրդից եւ որ ժողովրդի մեծամասնությունը իրենցից նախեւառաջ դա է պահանջում, իմքայլականները դեռ չէին հասցրել մինչեւ վերջ հրճվել ԵԽԽՎ երկու համազեկուցողների հայտարարություններով, քանզի նրանք իրենց հայտնի կենդանու տեղ դրած թմբկահարում էին միայն իրենց ձեռնտու՝ չեզոք տողերը, իսկ իշխանություններին հասցված քոթակի վրա աչք փակում, երբ եղավ երկրորդ հարվածը:

Վենետիկի հանձնաժողովի նախագահ Ջիանի Բուքիքիոն հայտարարություն է արել Հայաստանում Սահմանական դատարանի շուրջ ստեղծված իրավիճակի մասին, որում ասվում է. «2019-ի հոկտեմբերի 29-ի իմ հայտարարությունից հետո ես շարունակում եմ մտահոգված լինել Հայաստանի Սահմանադրական դատարանի շուրջ ծավալվող բաց հակամարտության պատճառով: Կիսում եմ Եվրոպայի խորհրդի Խորհրդարանական վեհաժողովի զեկուցողների մտահոգությունն այս հարցի շուրջ:Կցանկանայի հիշեցնել Վենետիկի հանձնաժողովի՝ 2019 թվականի հոկտեմբերին ընդունած եզրակացությունում նշվող առաջարկությունների մասին առ այն, որ Սահմանադրական դատարանում վաղաժամ կենսաթոշակի անցնելու համակարգը պետք է շարունակի իրապես կամավոր լինել, բացառի ցանկացած անհարկի քաղաքական կամ անձնական ճնշում դատավորների վրա և պետք է այնպես մշակվի, որ չազդի դիտարկվելիք գործերի արդյունքի վրա:
Վերջին հանրային հայտարարությունները և գործողությունները չեն համապատասխանում այս չափանիշներին և չեն նպաստի իրավիճակի սրումից խուսափելուն:
Ժողովրդավարական մշակույթը և հասունությունը պահանջում են ինստիտուցիոնալ զսպվածություն, բարեխղճություն և փոխադարձ հարգանք պետական ինստիտուտների միջև: Կրկին կոչ եմ անում բոլոր կողմերին զսպվածություն դրսևորել և խուսափել այս մտահոգիչ իրավիճակի սրումից՝ ապահովելու համար Հայաստանում սահմանադրության նորմալ գործունեությունը»,- ասել է նա:

Եւ չնայած Բուքիքոն բաց տեքստով իշխանությանը մեղադրում է ոչ հասունության, այն է՝ տհասության մեջ, եւ փաստում, որ վերջին հանրային գործողություններն ու հայտարարությունները չեն համապատասխանում վաղաժամ կենասթոշակի կամավոր սկզբունքին, այդուհանդերձ Նիկոլ Փաշինյանի զինակիցը կիսում է նաեւ այս դիրքորոշումը.«Ինչպես և ԵԽԽՎ համազեկուցողների դեպքում, կիսում եմ պարոն Բուքիքյոյի անհանգստությունը Հայաստանում ինստիտուտների միջև լարվածության վերաբերյալ: Կարծում եմ՝ Հրայր Թովմասյանի գործունեության արդյունքում առաջացած այս լարվածությունը և ճգնաժամը պիտի հնարավորինս արագ հանգուցալուծում ստանան, և գործող սահմանադրության ոգին պիտի վերականգնվի:
Կարևոր եմ համարում պարոն Բուքիքյոյի հիշեցումը՝ կապված կամավոր վաղ կենսաթոշակի համակարգի հետ:
Կարծում եմ, որ վերջին շրջանում տեղ գտած որոշ հայտարարություններ և գործողություններ՝ այդ թվում ՍԴ նախագահի, ՍԴ որոշ անդամների և ՍԴ աշխատակազմի ներկայացուցիչների, ինչպես նաև տարատեսակ ընդդիմադիր քաղաքական գործիչների կողմից արված, կարող են ընկալվել որպես քաղաքական և անձնական ճնշում ՍԴ այն անդամների վրա, որոնք կարող են օգտվել վաղ կենսաթոշակի համակարգից»,- գրել է Ռուբինյանը:

Ինչպես ասում են Փաշինյանի թիմում անմեղսունակների պակաս չի զգացվում, կան պարզապես վառ անհատականություններ եւ ավելի թեթեւ ախտանիշ ունեցողներ, Ռուբինյանն առաջինների թվում է: Մի քանի օրից, երբ կասկած չկա, որ հարցը մտնելու է ԵԽԽՎ օրակարգ, կարծում ենք պարոն Ռուբինյանը նույն անաչառությամբ կողջունի նաեւ այդ փաստը:

Անի Սահակյան