Հիբրիդային հակահեղափոխականներ ասելով՝ Նիկոլ Փաշինյանը նկատի ուներ «Իմ Քայլ»-ականներին․ Ավետիք Չալաբյան (video)
«Ազգային օրակարգ» կուսակցության համահիմնադիր Ավետիք Չալաբյանը վերջին մեկ շաբաթվա իրադարձություններից՝ ՍԴ նախագահ Հրայր Թովմասյանի և ՀՀ վարչապետ Նիկոլ Փաշինյանի փոխադարձ հայտարարություններից շոկի մեջ է։ Այս մասին Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ժամանակ ասել է վերջինս։
Չալաբյանի խոսքով՝ երկրի վարչապետը իր ֆեյսբուքյան էջում կատարած գրառումներով ատելությունն ուղղորդում է իր վրա․ «Քաղաքական տեսանկյունից ինձ համար տիրող իրավիճակը կատաստրոֆա է։ Մոտ երկու տարի առաջ շատերը դուրս էին եկել փողոց, որպեսզի դրական փոփոխություններ տեսնեն, բայց մենք տեսնում ենք դրա ուղիղ հակոտնյան»։
Քաղաքական գործչի դիտարկմամբ՝ ՀՀ վարչապետն ու գործող իշխանությունը քավության նոխազներ են իրենց համար ստեղծել, որն էլ հասարակության ներսում բարձրացնում է ատելության մակարդակը։
Անդրադառնալով Նիկոլ Փաշինյանի ու իշխանության կողմից ստեղծած օրակարգին, ինչպես նաև վարչապետի նշած տնտեսական աննախադեպ աճին՝ Ավետիք Չալաբյանն ասել է․ «Եթե մենք մեկ տարվա ընթացքում ունեցել ենք մաքսային օրենսդրության հնարավորություններից օգտվելու շանս ու դրանից մեկ անգամ բիզնես ծրագիր ենք իրականացրել, դա դեռ չի նշանակում,որ մենք տնտեսական աճ ունենք»։
Չալաբյանի խոսքով՝ իշխանությունն այսօր պետք է խոսեր մեր հետագա քայլերի մասին, ոչ թե վերամբարձ հայտարարություններ աներ տնտեսական հեղափոխության մասին, որը, ինչպես տեսնում ենք, չի եղել։
Խոսելով ներդրումային ոլորտից՝ Ավետիք Չալաբյանը նշել է, որ, եթե ինքը լիներ ներդրող, ապա այնպիսի երկրում ներդրում կաներ, որտեղ գոնե պետական ինստիտուտները կայուն աշխատում են․ «Պարոն Փաշինյան, մեկ ու կես տարի առաջ Դուք խոստացել էիք դատական իշխանության վրա ճնշումներ չգործադրել, բարի եղեք, Ձեր խոստումները պահեք։ Մենք Ձեր խոստումները հիշում ենք։ Իսկ ներդրողի համար կարևոր է, որ տվյալ երկրում դատական իշխանությունը կայուն գործի»։
Հաղորդման վերջում անդրադառնալով Նիկոլ Փաշինյանի՝ ասուլիսի ժամանակ արած հայտարարությանը, համաձայն որի՝ Հայաստանում հիբրիդային հեղափոխության փորձ է եղել, Ավետիք Չալաբյանը նշել է իր վարկածը․ «Ազգային ժողովում իշխանության քաղաքական հենարանն 88 պատգամավորներ են։ Ոչ ոք չի կարող բացառել, որ «Իմ Քայլը» դաշինքից կլինեն պատգամավորներ, որոնք դուրս կգան և շատ հնարավոր է, որ իշխանությունը՝ հիբրիդային հեղափոխություն ասելով նկատի ունի այն անհանգստությունը, որ իրենց դաշինքից ոմանց վրա կարող են դրսից ազդեցություններ լինել, որոնք էլ կհանգեցնեն նրան, որ իրենք անվստահություն կհայտնեն Նիկոլ Փաշինյանին»։
Հետևեք մեզ Viber-ում
