Ապտակ ԱՄՆ-ից՝ արցախյան բանակցությունների պահին

Հայաստանի արտգործնախարար Զոհրաբ Մնացականյանը երեկ Ժնևում հանդիպել է ԵԱՀԿ Մինսկի խմբի համանախագահների հետ: Իսկ այսօր Ժնևում կայացավ Հայաստանի և Ադրբեջանի արտաքին գործերի նախարարներ Զոհրաբ Մնացականյանի և Էլմար Մամեդյարովի հանդիպումը:

«Ժնևում մեկնարկեց Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի հանդիպումը, որն անցկացվեց ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ստեֆան Վիսկոնտիի (Ֆրանսիա), Էնդրյու Շոֆերի (ԱՄՆ) և ԵԱՀԿ գործող նախագահի անձնական ներկայացուցիչ Անջեյ Կասպրչիկի միջնորդությամբ և մասնակցությամբ», - այս մասին հայտնեց ՀՀ արտգործնախարարության խոսնակ Աննա Նաղդալյանը:

Հայաստանի ու Ադրբեջանի արտաքին գործերի նախարարները նախորդ անգամ հանդիպել էին Բրատիսլավայում դեկտեմբերի 4-ին: Մնացականյանը և Մամեդյարովը քննարկել էին հրադադարի ամրապնդման, վստահության միջոցառումների հարցերը: Սա արդեն Մնացականյան-Մամեդյարով 10-րդ հանդիպումն է:

Մինչ ընթանում էր Մնացականյան-Մամեդյարով հանդիպումը՝ ադրբեջանական գործակալությունները հայտնեցին, որ Ադրբեջանում ԱՄՆ դեսպանը Լի Լիտցենբերգի նախաձեռնությամբ կայացել է հանդիպում՝ Լեռնային Ղարաբաղի «ադրբեջանական համայնքի» ղեկավարի հետ, որն էլ դեսպանին է ներկայացրել է «համայնքի» պահանջներն ու ակնկալիքները: Ըստ Turan գործակալության՝ հունվարի 29-ին Գյանջալիևը դեսպանին է փոխանցել ադրբեջանական համայնքի հիմնական ցանկություններն ու պահանջները՝ մասնավորապես, «իրենց տարածքները վերադառնալու, խախտված իրավունքները, այդ թվում գույքային, վերականգնելու» վերաբերյալ: Դեսպան Լիտցենբերգն ասել է, որ ուշիուշով հետևում է Լեռնային Ղարաբաղի ադրբեջանական համայնքի գործունեությանը:

Ամերիկյան կողմից ապտակից բացի, այլ կերպ չի կարելի գնահատել այս քայլը: ԱՄՆ-ն ԵԱՀԿ Մինսկի խմբում համանախագահող պետություն է, և պարտավոր է չեզոքություն պահպանել:

Իսկ մեր իշխանությունները նախանձելի հաճախականությամբ հայտարարում են, որ ղարաբաղյան հակամարտությունն ավելի ու ավելի ընկալելի է դառնում միջազգային հանրության համար, այն առումով, որ Արցախում ինքնորոշման համար պայքարող ժողովուրդ է ապրում:

Եվ այս ամենից հետո ԵԱՀԿ Մինսկի խմբում համանախագահող պետության դեսպանը Ադրբեջանում ճիշտ նույն օրը, երբ Մնացականյանն ու Մամեդյարովը բանակցում են՝ նախաձեռնում է Լեռնային Ղարաբաղի «ադրբեջանական համայնքի ղեկավարի» հետ հանդիպում, լսում նրա պահանջները...

Ինչպես ասում են՝ խոսքերն ավելորդ են. հայկական դիվանագիտության հերթական «պտուղներից» մեկն է:

Մետաքսյա Շալունց