Իշխանության հատուկ օպերացիան. որն էր նպատակը

Նիկոլ Փաշինյանը տոնական օրով իրականացրեց իր սիրելի ասֆալտին փռելու օպերացիան,  ձեռնաշղթաներ հագցնելու միջոցով բերման ենթարկվեցին Նարեկ Մալյանը, Կոնստանտին Տեր–Նակալյանը, Արթուր Դանիելյանը, Գրիգոր Մինասյանը, Ազատ Ադամյանը, Նարեկ Սամսոնյանը։ Որպես հիմք էր վերցվել ապօրինի զենքի կամ թմրանյութի օգտագործման կասկածանքի թեման, ինչն ավելի քան ծիծաղելի է:

Բացառությամբ վերջինի, որին քիչ առաջ են բերման ենթարկել, մյուսներն ազատ են արձակվել, քանի որ այն, ինչ իբր փնտրում էին այս երտասարդների մոտ, չեն գտել:
Իրականում այս բեմականացման, ասֆալտ փռելու շոուի համար   նա տարբեր պատճառներ ունի. առաջիկայում անկասկած է, որ սեփականության վերաբաշխման գործընթաց է սկսվելու, բանկային գաղտնիքի մասին նոր օրենքի ընդունումն էլ գումարած այդ ամենին կարելի է կանխատեսել, որ դատական պրոցեսների բում է սպասվում: Բնականաբար, հարցերի լուծման բանալին էլ դառնալու է ՍԴ-ն: Ստամբուլյան կոնվենցիա, Արցախի հարց, սահմանադրական փոփոխություններ, ահա, այս ամենն էլ եթե հավելենք, ամբողջական կդառնա պատկերը, թե ինչու է Փաշինյանը գրոհել ՍԴ-ի ու նրա նախագահի դեմ:
Բայց  անցած ողջ շաբաթը ծավալված իրադարձությունները պարզորոշ դարձրեցին, թե որքան սնանկ է իշխանությունը ՍԴ-ի դեմ իր կոմպրոմատների հարցում: Պարզ դարձավ, որ ամենահուժկու կոմպրոմատն էլ հայտնի գրիչն է, որի երեւան բերելուց հետո իշխանությունը ծաղրուծանակի ենթարկվեց:
Սկզբում Նիկոլ Փաշինյանը հրահանգեց թիմին իր ներկայացրած փաստից ավելի անհեթեթ հիմնավորում ներկայացնել,որը կխլացներ իր անձի շուրջ աղմուկը, բայց քանի որ դա չհաջողվեց, հիմա անցել է ուժի ցուցադրության:

Նիկոլ Փաշինյանը շատ լավ գիտի, որ բերման ենթարկվածներն ակտիվ դեմքեր են ու նրանց բերման ենթարկելն անաղմուկ չի կարող անցնել։ Իրենց հենց այդ աղմուկն էր պետք՝ գրիչի թեմայից ձերբազատվելու համար։ Այսինքն՝ նա պատրաստ է հայհոյանքների տեղատարափի տակ ընկնել բերման ենթարկելու համար, միայն թե չհիշվի տխրահռչակ գրիչը։ Նիկոլ Փաշինյանն իբրև երիտասարդ բռնապետ թերեւս ուսումնասիրել է, որ բռնապետական, ավտորիտար համակարգերի փլուզման նախանշաններից մեկն այն է, երբ ռեժիմը դառնում է ծաղրուծանակի առարկա ու սկսում են համատարած հեգնել:
Սակայն որքան անկասկած է, որ Նիկոլ Փաշինյանը ձեռք չի քաշելու ՍԴ-ից եւ պետք է սպասել հաջորդ գրոհին, նույնքան աներկբա, որ հաջորդիվ նոր կրկեսային ներկայացումների ենք այս թեմայով ըմբոշխնելու:

Անի Սահակյան