Փաշինյանը չի խնայում.թիմին հանել է պատերազմի
Սուր նեւրոտիկ խանգարում ախտորոշմամբ իշխանությունում թերեւս շատերն են տառապում: Համենայն դեպս այդ տպավորությունն է թողնում վերջին օրերի քաղաքական մթնոլորտը: Սահմանադրական դատարանի նախագահ Հհրայր Թովմասյանի դեմ սանձազերծած պատերազմում խայտառակ պարտություն կրած վարչապետ Նիկոլ Փաշինյանը հրապարակ է հանել իրեն չզիջող ներվային խանգարում ունեցողներին: Մի քանի օր առաջ Կապանում Փաշինյանը Հրայր Թովմասյանի հարցում նախահարձակ եղավ, հայտարարեց, թե Թովմասյանը 2018 թվականի հեղափոխությունից հետո ամենօրյա, ամենժամյա, ամենամսյա ռեժիմով իր ծառայություններն է առաջարկել իրեն, որ ինքն էլ նրան ուղարկել է ուր որ պետքն է, քանի որ չի ցանկանում համագործակցել նախկին կոռումպացված ռեժիմի մնացորդների հետ: Բայց պատասխանը չուշացավ, ՍԴ նախագահն անհեթեթություն համարեց վարչապետի հայտարարությունները, ժամանակ տվեց փաստ ներկայացնել, հակառակ պարագայում դատի է տալու: Փաշինյանն էլ ավելի դիրքավորվեց, թե անհամարժեք պատասխանը չի ուշանա, ինքը փաստեր ունի, մեկ ծանր գիշերվանից հետո հրապարակեց հայտնի գրիչն ու մի զավեշտալի պատմություն, թե ինչպես է Թովմասյանը միջոցառումներից մեկի ժամանակ քծնել իրեն, ջան ու ջիգյար ասել, վերջում էլ, երբ իր մոտ գրիչ չի եղել, ՍԴ նախագահն իր գրիչն է նվիրել, որն ըստ վարչապետի իրեղեն ապացույցն է ծառայություն մատուցելու պատրաստակամության:
Պետության ղեկավարի կողմից ներկայացված այս հուժկու պատասխանի առիթով երկու օր է հանրության մեղմ ասած բոցեր է անում, զվարճանում է եւ անհանգստանում վարչապետի առողջական վիճակի համար: Եւ, ահա, Փաշինյանին այս մթնոլորտն էլ ավելի է նյարդայնացրել եւ նա որոշել է մենակ չմնալ այս անհեթեթ վիճակում ու նույն դրության մեջ դնել իր թիմակիցներին՝ հորդորելով զարկել շեփոր, հելնել, հեծել թուր կեծակին ու գնալ պատերազմի: Մանր ու միջին հարձակումներից հետո վստահ ենք նրա անմիջական հրահանգով դաշտ նետվեց իր ծանր հրետանին՝ ԱԺ փոխխոսնակ Ալեն Սիմոնյանը:
<<Վանեցյանն ինձ զանգահարել է Հրայր Թովմասյանի անունից ու ասել, որ նա պատրաստ է աշխատել, ամեն ձևով աջակցել>>,- հայտարարեց Սիմոնյանը ու շարունակեց ինքն էլ իր հուժկու փաստը ներկայացնել Հրայր Թովմասյանի դեմ պատմելով, որ դրանից շաբաթներ անց փողոցում իրեն հետեւից գրկել են, հետո թեքվել ու տեսել է, որ Հրայր Թովմասյանն է, ով ասել է՝ հիմա ամեն ինչ նորմալ է, չէ՞: Թե ինչու է մի գրկախառնությունից այդքան հուզվել Ալեն Սիմոնյանը, գուցե նեղն անձնական հարց է եւ չի ուզեցել հրապարակային բացատրել, սակայն Ալեն Սիմոնյանը սա ներկայացրել է իբրեւ երկրորդ ծանրակշիռ փաստը Հրայր Թովմասյանի՝ իրենց ծառայություն մատուցելու հարցում:
Ինչպես ասում են՝ սա արդեն ոչ այնքան ծիծաղելի է, որքան անհանգստացնող: Իշխանությունում կարծես թե պաթոլոգիա է նեվրոտիկ խանգարում ախտորոշումը: Իսկ մենք չմոռանանք, որ պատերազմական երկրում ենք ու ցանկացած պարագայում նոպաների ազդեցության տակ հնարավոր է մի ամբողջ պետության հարց լուծվի:
Անի Սահակյան
Հետևեք մեզ Viber-ում
