Նիկոլ Փաշինյանի հերթական «զոհը»
Հենրիկ Հարթենյանը վայր դրեց Երեւանի ավագանու Իմ Քայլը խմբակցության մանդատը եւ ներողություն խնդրեց հանրությունից․
«Սիրելի հայրենակիցներ, ելնելով ստեղծված իրավիճակից՝ հայցում եմ բոլորիդ ներողամտությունը և անհամատեղելի եմ համարում աշխատանքս Երևանի քաղաքի ավագանիում ու վայր եմ դնում մանդատս»:
Հիշեցնենք, որ երեկ, երբ վարչապետ Նիկոլ Փաշինյանն աշխարհով մեկ խայտառակեց իրեն՝ հրապարակելով «անհամարժեք» պատասխանը ՍԴ նախագահ Հրայր Թովմասյանի դեմ ու դարձավ ծաղրուծանակի առարկա, իր թիմակիցներից համեմատաբար խելոքներն անցան ջրի հատակը ու անգամ չտարածեցին վարչապետի հուժկու հարվածն իրենց էջերում։ Ջրի երես դուրս եկան վարչապետի ֆանատներն ու նրա քաղաքական գծի հետեւորդները։ Ամենաստորը Հենրիկ Հարթենյանի ինքնադրսեւորումն էր։
Երևանի ավագանու «Իմ քայլը» խմբակցության այլեւս նախկին անդամ անդամը ֆեյսբուքյան իր էջի story բաժնում ՍԴ նախագահ Հրայր Թովմասյանի դստեր էջի լուսանկարն էր հրապարակել և կից գրել. «Հ. Թովմասյանի աղջկա ֆբնա, ձեզ տեսնեմ ժողովուրդ ջան»:
Այս արարքը բուռն քննադատությունների առարկա դարձավ, Հենրիկ Հարթենյանը ջնջեց ֆեյսբուքյան իր էջը, «Իմ քայլը» խմբակցությունն էլ արարքը դատապարտող հայտարարությամբ հանդես եկավ և այսօր ավագանում խմբակցության արտահերթ նիստ հրավիրեց։ Նույնը խոստացան անել ՔՊ վերստուգող, վերահսկիչ մարմնից։ Ի վերջո, խմբակցությունում կայացած քննարկումների ընթացքում նրան հորդորել են վայր դնել մանդատը։
Ավելին, ով չալարեց, իր դատապարտող հայտարարությամբ, գրառումով ինքնահաստատվեց քսանամյա այս երիտասարդի վրա։
Այն դեպքում, երբ ագրեսիայի այս մթնոլորտի թիվ մեկ պատասխանատուն իրենց քաղաքական կուռքն է՝ Նիկոլ Փաշինյանը, ով ամենօրյա ռեժիմով նպաստում է այդ մթնոլորտի կարծրացմանը եւ 20 ամյա երիտասարդեը մեղմ ասած ինչ տեսնում, այն էլ սովորում է։ Հենրիկ Հարթենյանն իրականում Նիկոլ Փաշինյանի ու իր ստեղծած չար արժեհամակարգի «զոհն» է։
Ի դեպ, մի գրչի պատմությունը ջրի երես հանեց իշխանության ողջ աղտերը։ Պարզ դարձավ, որ իշխանության կադրային բանկն այնքան սնանկ է, որ ավագանու անդամ են դարձրել բուհը չավարտած կիսագրագետ մի երիտասարդի, որը չուներ նման իրավունք։
Անի Սահակյան
Հետևեք մեզ Viber-ում
