Փաշինյանը որոշել է գլուխը կտրել, գլխացավը բուժելու փոխարեն

Կառավարություն-Ազգային ժողով վերջին հարցուպատասխանի ժամանակ պարզվեց, որ Նիկոլ Փաշինյանը լիովին կողմ է ծննդատների փակմանը:
«Ինչու այսօր պահանջ չի դրվում, որ ՀՀ բոլոր բնակավայրերում պետք է ծննդատուն լինի»,– հռետորական հարց է հնչեցրել վարչապետն` անդրադառնալով ծննդատների փակման թեմային։ «Մարալիկի ծննդատունը ևս 25 գյուղերի է սպասարկում, ինչո՞ւ պետք է փակվի։ Ինձ մոտ հարց առաջացավ` ինչո՞ւ այդ 25 գյուղերում չկան ծննդատներ։ Հարցի պատասխանը պարզ է, քանի որ դա տրամաբանական պահանջ չի, քանի որ դա նույնն է, որ պահանջնենք` ամեն շենքի մոտ ծննդատուն լինի»,–հայտարարել է Փաշինյանը։
Երբ հեռուսատեսությամբ տեսել է Մարալիկի ծննդատան բուժաշխատողներին, որոնք «հիվանդանոցային խալաթներով ու ոտնամաններով» դուրս էին եկել ձյան մեջ քայլում, բողոքի ակցիա էին անում, վարչապետն ապշել է. քանի որ մտածել է, թե հետո բժիշկներն այդ նույն խալաթներով պետք է գնային ծնունդ ընդունելու։
Փաստորեն մեկ տարուց մի քիչ ավել էր պետք, հեղափոխության առաջնորդից քաղաքական ցինիկի վերածվելու համար: Փաշինյանի ձայնն արդեն տաք տեղից է գալիս: «Յոլա գնալու տրամաբանությամբ ենք ապրում, ու մեզ թվում է` յոլա գնալն ավելի էժան է»,–աել է վարչապետը: Նրա կարծիքով` ավելի լավ է ծննդատուն պահելու փոխարեն, ասֆալտ փռել, ճանապարհներ նորոգել:

Ի՞նչ է պատահել էր, որ` Մարալիկի հարակից գյուղերի ծննդկանները 25-30 կմ հեռավորությամբ գտնվող Արթիկի կամ Գյումրու ծննդատներ կդիմեն: Իսկ Մարալիկում, ավելի լավ է ծննդատուն չլինի` ոչ կարգին մասնագետ ունեն, ոչ էլ սահմանված քանակով ծնունդներ: Փաշինյանի մտքով երևի չի անցել, որ իր խոստացած 5 մլն բնակչությամբ երկրին ծննդատներ են պետք լինելու: Եվ վերջապես` սովետական Հայաստանի ղեկավարները անմի՞տ էին, որ Մարալիկում ծննդատուն էին կառուցում և ծննդկաններին չէին ասում` Գյումրի կամ Արթիկ գնացեք, որովհետև Մարալիկի ծննդատանը տարեկան 150 երեխա չի ծնվում: Հիմա ստացվում է, որ գլխացավը բուժելու փոխարեն, Փաշինյանը որոշել են գլուխը կտրել: Չկա գլուխ, չկա նաև գլխացավ: Փոխանակ Մարալիկի և համյանքային մյուս ծննդատների բարելավման պետական ծրագիր իրագործեն, դեմքի խելոք արտահայտությամբ մեզ համոզում են, թե ինչքան լավ բան է ծննդատուն փակելը: Ավելին` քիչ է մնում հավատացնեն, թե ծննդատներն են մեղավոր, որ մենք դեռ չեք ապրում Փաշինյանի խոստացած երջանիկ Հայաստանում:

«Բայց ամեն ինչ հարաբերական է։ Վերջերս, օրինակ, երբ ՀՔԾ–ի օրվան էինք մասնակցում, պարզվեց, որ միայն 2019թ–ի 10 ամիսների ընթացքում ՀՔԾ–ն պետությանը հասցված այնքան վնաս է վերականգնել, որքան ծառայության գոյության ողջ ընթացքում։ Բայց մյուս կողմից պետք է արձանագրենք` խնդիրները, որ մենք դրել ենք` կոպեկ–կոպեկ վերականգնելու մասին, բավարար արդյունավետությամբ չենք կարողանում լուծել»,– ասել է վարչապետը։

Ըստ նրա` պատճառները և՛ օբյեկտիվ են, և՛ սուբյեկտիվ։ Քրեական գործերն այնքան են շատացել, որ փորձագիտական եզրակացություններ ստանալը ամիսներ է տևում։
Հիշեցնենք` 2019թ–ի դեկտեմբերին վարչապետը հայտարարել էր, համակարգային կոռուպցիա Հայաստանում չկա, բայց դա չի նշանակում, որ ՀՀ-ում չկան կոռուպցիոն երևույթներ:
Ծննդատների փակումը կոռուպցիայի հետ կապ չունի, բայց շատ ուղղակիորեն կապված է մարզերը դատարկելու հակապետական ծրագրի հետ:

Հայկ Դավթյան