Նիկոլ Փաշինյանի «սև ցուցակում» նաև յուրայիններն են

Ազգային ժողովն ընդունել է, այսպես կոչված, «գաղտնալսումների մասին օրենքը»։ Խոսքը «Օպերատիվ-հետախուզական գործունեության մասին» օրենքում փոփոխությունների նախագծի մասին է, որով ոստիկանությանն իրավունք է տրվում օպերատիվ–հետախուզական աշխատանքների շրջանակում գաղտնալսում կատարել առանց դատարանի որոշման։ Մինչև օրենքի փոփոխությունը հեռախոսային խոսակցությունների գաղտնալսման իրավունք ուներ միայն ԱԱԾ–ն, և Քրեակատարողական հիմնարկի տարածքում կարող էին գաղտնալսել միայն դատապարտյալներին: Իսկ ոստիկանությանը գաղտնալսում կարող էր կատարել բացառապես ԱԱԾ–ի թույլտվությամբ:
Նախօրեին արդարադատության նախարարի տեղակալ Սրբուհի Գալյանն ԱԺ–ում նախագծի քննարկման ժամանակ կառավարության անունից ԱԺ պատգամավորներին կոչ էր արել դեմ քվեարկել «Իմ քայլը» խմբակցության անդամներ Արմեն Խաչատրյանի ու Սիփան Փաշինյանի հեղինակած` գաղտնալսումների մասին նախագծին։ Նրա խոսքով` կառավարությունը սեփական առաջարկն էր պատրաստվում ներկայացրել, ըստ որի` հեռախոսային խոսակցությունների գաղտնալսումների իրավունքը պետք է վերապահվեր մասնավոր կազմակերպությանը։ Խորհրդարանը, սակայն, չսպասելով կառավարության օրենսդրական նախաձեռնությանը` ընդունեց իշխանական պատգամավորների հեղինակած օրինագիծը։

Այստեղ, սակայն, կա մեկ այլ խորքային խնդիր ևս, որը իշխանությանը կարող է կանգնեցնել ճգնաժամի առաջ: Դիցուք եթե միմյանցից անկախ և' ոստիկանությունը, և' ԱԱԾ-ն նույն անձին գաղտնալսում են, իսկ արդյունքների մասին զեկուցում են տրամգծորեն հակառակ տվյալներ: Ում ներկայացրած տվյալներն են այդ դեպքում առավել արժանահավատ դիտվելու: Կամ արդյոք ոստիկանությունն իրավասու է լինելու գաղտնալսել ԱԱԾ աշխատակիցներին: Հաջորդաբար արդեն պետությունը ոստիկանությանը պետք է զինի սարքավորումներով, որպեսզի նրանք կարողանան գաղտնալսել բոլորին: Այսպիսով` Հայաստանի խաբված հասարակությունը մտնում է տոտալ վերահսկողական լծի տակ: Սա օրենքի ուժով ոստիկանությանը տրված քաղաքական մահակ է. յուրաքանչյուր ոք, ով իշխանության աչքին «ալա-բուլա» կերևա, նրան կսկսեն գաղտնալսել: Որևէ մեկը հստակ չի կարող ասել, թե իրականում որ արարքը կարող է դառնալ գաղտնալսման առիթ: Սև ցուցակում հայտնվելու վտանգի տակ են բոլորը` Նիկոլ Փաշինյանի հասցեին ամենափոքր քննադատություն հնչեցնողից, սոցցանցերում ընդդիմադիր գրառումներին հավանություն տվողներից սկսած, մինչև իշխանության ներսում գտնվող այլախոհները:
Ըստ ամենայնի, Նիկոլ Փաշինյանը տոտալ անվստահություն ունի բոլորի հանդեպ: Իշխանությունը կորցնելու վախերը նրան հուշում են ուժեղացնել վերահսկողությունն առաջին հերթին իշխանական կադրերի և պատգամավորների նկատմամբ, որոնցից որոշները, ըստ մամուլի հրապարակումների, առաջիկայում կարող են լքել «Իմ քայլը» դաշինքը: Այս օրենքին կողմ քվեարկող պատգամավորները թերևս չեն պատկերացնում, որ առաջին հերթին գաղտնալսվելու են իրենք և իրենց մերձավորները:

Հայկ  Դավթյան