Պատերազմական ֆոտոսեսիա` Իլհամ և Մեհրիբան դեկորների ֆոնին

Ադրբեջանի նախագահ Իլհամ Ալիևը և նրա կին Մեհրիբան Ալիևան կիրակի այցելել են Ղարաբաղի հետ շփման գծում: Ալիևը այցելել է 3 շրջան` Թարթառի, Բարդինի և Աղդամի շրջաններ: Ադրբեջանի նախագահ Իլհամ Ալիևը ժամանել է Թարթառի շրջանի զորամաս: Ադրբեջանի պաշտպանության նախարար Զաքիր Հասանովը Գերագույն զորահրամանատարին զեկուցել է շփման գծում վերջին իրադրության մասին: Ավելի ուշ նախագահը կնոջ հետ եղել է Թարթառի Գափանլի գյուղում, որը շփման գծից գտնվում է 200 մետր հեռավորության վրա, ինչպես նաև Աղդամի շրջանի Մահրիզլի գյուղում, որոնք ապրիլի 27-ի գիշերը գնդակոծվել են խոշոր տրամաչափի զինատեսակի և հրետանու միջոցով, դիտել են քանդված տները, հանդիպել են և զրուցել տեղաբնակների հետ: «Իլհամ Ալիևը և նրա կին Մեհրիբան Ալիևան այցելել են քաղաքացիներին, ովքեր տուժել են հայկական զինված ուժերի գնդակոծություններից և գտնվում են Բարդինի հիվանդանոցում, և նրանց ցանկացել են շուտափույթ առողջացում», հայտնում էին ադրբեջանական կայքերը: Ադրբեջանի նախագահի աշխատակազմի ղեկավարի տեղակալ, արտաքին կապերի բաժնի պետ Նովրուզ Մամեդովը հայտնել է, թե «Ղարաբաղյան հակամարտության գոտում իրավիճակի սրացումը չի ազդել Ադրբեջանի հեղինակության վրա և որ աճել են Ադրբեջանի հետ համագործակցել ու երկրում ներդրում անել ցանկացողների թիվը. «Ադրբեջանի համբերությունը կարող է հատել: Դա տեսնում են, հաշվի են առնում և պետք է հաշվի առնեն բոլոր կողմերը»: Ուշագրավ է, որ դրանից անմիջապես առաջ Moody’s միջազգային վարկանիշային գործակալությունը Ադրբեջանին շնորհել է բացասական կանխատեսման վարկանիշ` կապված աճող ռիսկերի հետ: Moody’s-ն ընդգծել էր, որ աշխարհաքաղաքական ռիսկերն աճել են ոչ վաղ անցյալում Լեռնային Ղարաբաղում հակամարտության վերաէսկալացման հետ: Ալիևն ու նրա կինը շփվել են տեղաբնակների հետ և կարգադրել է շուտափույթ վերականգնել հայկական հրետանու հարվածներից ավերված ու վնասված տները: Այցի արդյունքներով Ալիևը Հայաստանին մեղադրել է «բանակցային գործընթացից շեղվելու» համար, արդարացված է համարել բանակաշինության վրա կատարված ծախսերը, հայտարարել է, թե Ադրբեջանը «երբեք չի հաշտվի» ներկայիս իրավիճակի հետ: Ալիևը Թարթառի շրջանում հայտարարել է, թե տարեսկզբին Ղարաբաղյան բանակցային գործընթացում գրանցվել է առաջընթաց. «Մենք չենք ցանկանում պատերազմ: Մենք ցանկանում ենք հակամարտությունը կարգավորել խաղաղ ճանապարհով: Սակայն անիմաստ է բանակցել հանուն բանակցությունների պատրանք ստեղծելու: Մենք հավատարիմ ենք ապրիլի 5-ին ձեռք բերված հրադադարի մասին համաձայնագրին»: Զավեշտի են նմանվում Ալիևի հայտարարությունները: Տարիներ շարունակ բանակցություններից խուսափող Ադրբեջանը, պարզվում է, բանակցություններում առաջընթաց էր նկատել: Ու դեռ պարզվում է, որ Ադրբեջանը ապրիլի 5-ից ձեռքբերված հրադադարը հարգում է: Ադրբեջանական կեղծիքները չափ ու սահման չունեն: Այն, ինչ արել է Ադրբեջանն` այժմ Հայաստանի վրա գցելն, իսկապես, ծիծաղելի է: Իհարկե, Ալիևն ինքն էլ չի հավատում իր հայտարարություններին, սակայն նա մտել է մի դերի մեջ, ու ամեն ինչ շուրջը դեկորացիա է ճիշտ այնպես, ինչպես կիրակնօրյա «ռազմաճակատային» ֆոտոսեսիան կնոջ հետ, մի քանի տասնյակ ադրբեջանցիների ներկայությամբ: Հավանաբար, Ղարաբաղի հետ շփման գծի բնակավայրերում բնակիչներ չեն մնացել, նրանք ահ ու սարսափը սրտներում`փախել են, իսկ Իլհամի ու Մեհրիբանի համար ֆոտոսոսիայի համար հարկ է եղել այլ բնակավայրերից մարդիկ բերել` ֆոն ապահովելու համար: Կամ էլ, պարզապես այդքան մարդ է մնացել այդ բնակավայրերում. «հաղթանակած» Ադրբեջանի հասարակությունը փախել է իր բնակավայրերից` առանց սպասելու Ալիևների հետ տոնելու քառօրյա պատերազմում գովազդված կեղծ «հաղթանակը»: Թամար Բագրատունի