Մարգվելաշվիլին Վրաստանի քաղաքացիությունից կզրկի իր հայրենակիցներին

Lenta.ru-ի փոխանցմամբ՝ Վրաստանի նախագահ Գեորգի Մարգվելաշվիլին մտադիր է երկրի քաղաքացիությունից զրկել բոլոր հայրենակիցներին, որոնք պետական պաշտոններ են զբաղեցնում Ուկրաինայում։ Այդ մասին հայտարարել է Ուկրաինայում Վրաստանի դեսպան Միխաիլ Ուկլեբան: «Վրաստանի Սահմանադրությունում հստակ գրված է, որ Վրաստանի քաղաքացին չի կարող լինել այլ երկրի քաղաքացի՝ բացառությամբ այն դեպքերի, երբ Վրաստանի քաղաքացիությունն այլ երկրի քաղաքացուն շնորհվում է պետության առջև ունեցած արժանիքների համար»։ Դիվանագետը հավելել է, որ խոսքը միայն սահմանադրական նորմերի ու օրենքի իրագործման մասին է։ Սակայն քաղաքացիությունից զրկված բոլոր վրացիները կարող են վերադարձնել այն՝ համապատասխան խնդրանքով դիմելով հանրապետության նախագահին։ 2015 թվականի դեկտեմբերի 4-ին Մարգվելաշվիլին ստորագրել է երկրի նախագահ Միխեիլ Սաակաշվիլիին Վրաստանի քաղաքացիությունից զրկելու մասին հրամանը, ով դրանից առաջ դարձել էր Ուկրաինայի քաղաքացի։ Օդեսայի նահանգապետ Միխեիլ Սաակաշվիլիից բացի, Ուկրաինայում կան նաև պաշտոն զբաղեցնող այլ վրացիներ։ Ուկրաինայի ազգային ոստիկանության պետի պաշտոնը զբաղեցնում է Խատիա Դեկանոիձեն, իսկ Ուկրաինայի կառավարության՝ կոռուպցիայի դեմ պայքարի հարցերով խորհրդականի պաշտոնը՝ Զուրաբ Ադեիշվիլին։ Օդեսայի ոստիկանությունը գլխավորում է Վրաստանի ներքին գործերի նախկին փոխնախարար Գեորգի Լորդկիպանիձեն։