Վահանի «վահանը»
Ազգային ժողովի պատգամավոր, վերջերս «Բարգավաճ Հայաստան» կուսակցության շարքերը լքած Վահան Բաբայանը հնարավոր է առաջիկայում նոր կուսակցություն ստեղծի։ Կուսակցությունը կլինի ազգային-ռեֆորմիստական գաղափարախոսությամբ: Ովքե՞ր են լինելու կուսակցության նախաձեռնող խմբում, ի՞նչ անվանում է ունենալու ու այլ մանրամասներ Վահան Բաբայանը դեռեւս չի հայտնում, շտապում է լոկ ասել, որ իր կուսակցությունն ընդդիմադիր չի լինելու: Բաբայանը դա բացատրում է, երկրում ստեղծված իրավիճակով, որը, ըստ նրա, թույլ չի տա, որ նա հանդես գա ընդդիմության շարքերից: Ո՞վ է Վահան Բաբայանը եւ ի՞նչ շանսեր նա ունի Վերջին 15 տարիներին Վահան Բաբայանը հասցրել է անդամագրվել ու լքել մի քանի կուսակցություն, 20-ամյա պատանին մղվել է քաղաքական ասպարեզ, բայց չի կորչել հորձանուտներում: Քաղաքական բեմելը սկսել է Քրիստոնեադեմոկրատական կուսակությունից, Խոսրով Հարությունյանն էլ եղել է նրա քաղաքական կնքահայրը: Նորաթուխ երիտասարդն անմիջապես գլխի է ընկել իր հանգրվանած ուժի անհեռանկարային կարգավիճակի մասին ու տեղափոխվել Արամ Սարգսյանի ղեկավարած «Հանրապետություն» կուսակցություն: 2002-2005 թվականներին Վահան Բաբայանը կուսակցության երիտասարդական թեւի նախագահն էր, ինչպես նաեւ քաղխորհրդի անդամը: 7-ամյա քաղաքական անցյալով, ընդդիմության երիտթեւերում բավական պատկառազդու պաշտոններ վարած երիտկարիերիստը տեսավ, որ այնտեղ լավ չէ, ավելի շուտ` իր ուզածը չէ, այդ թեւերով ուշանում է իր վերելքը դեպի իշխանության բարձունքներ, սահուն տեղափոխվեց ոչ ընդդիմադիր կուսակցություններ: Մի կարճ շրջան հանգրվանեց ՄԻԱԿ-ում, ապա իր հաստատուն տեղը գտավ ՀԵԿ-ում, որտեղ արագ կատարված ինչ-ինչ գործընթացների արդյունքում ՀԵԿ նախագահ Սարգիս Ասատրյանը հրաժարական տվեց եւ նախագահի պաշտոնակատար ընտրվեց ինքը: Որպես Հայաստանի երիտասարդական կուսակցության առաջնորդ իր տեղը գտավ իշխանական դաշտում: Նա, կուբացի հայտնի հեղափոխական Չե Գեւարայի նկարով շապիկը հագին, մամուլի ակումբներում Սերժ Սարգսյանին սատարելու կոչեր էր անում: Իսկ որոշ ժամանակ անց, 2011 թվականի սկզբին, իր ղեկավարած կուսակցությունը միացրեց «Բարգավաճ Հայաստանին» եւ սկսեց հանդես գալ արդեն Ծառուկյանին սատարելու կոչերով: Հավանաբար հենց ճիշտ ժամանակին կողմնորոշվելու այդ հատկությունն օգնեց երիտասարդ կարիերիստին հայտնվել Ազգային ժողով տանող ճանապարհին:Ի վերջո, ԲՀԿ-ի ցուցակի 20 համարի տակ նա դարձավ պատգամավոր եւ այս տարիներին հասցրեց կոփվել նաեւ մի քանի անգամ այլընտրանքից ընդդիմություն եւ հակառակ կարգավիճակներում սահուն վայրէջք կատարելով: ԲՀԿ-ից դուրս եկավ իր խոսքերով՝ գաղափարական անհամաձայնությունների պատճառով: Մասնավորապես այն, որ Բաբայանը ցանկանում էր, որ ԲՀԿ-ն էլ կոալիցիա կազմի, նա անձամբ քայլեր էր արել այդ ուղղությամբ Միքայել Մելքումյանի հետ գնացել էր կառավարություն ու խնդրել Հովիկ Աբրահամյանին իրենց էլ ընդունեն: Բայց եղավ այն, ինչ եղավ, իսկ պարոն Բաբայանը չհարմարվեց անգամ միայն խոսքով ընդդիմադիր հանդես եկող ԲՀԿ-ին եւ Վահանը իր <<վահանը>>, որը կերաշխավորի ապագայում իր քաղաքական լինելիությունը: Դժվար է պատկերացնել, թե ովքեր կանդամակցեն մի քանի տերեր փոխած լիդերի կուսակցությանը, բայց որ Բաբայանը դա կծառայեցնի իր անձնական շահերին ու կուսակցության անվան տակ կկորզի պատգամավորական մեկ մանդատ կցվելով ՀՀԿ-ին, դրանում կարող եք վստահ լինել: Անի Սահակյան