Ինչո՞ւ Աբրահամյանը հրաժարվեց իր խոստումից
Ամիսներ առաջ Ռուսաստանի հայերի միության նախագահ Արա Աբրահամյանի շռնդալից ասուլիսն ու հայտարարությունը քաղաքական հայտի մասին, անփառունակ ավարտ ունեցավ։ Պարզվում է՝ դեռ չծնված, վախճանվել է Աբրահամյանի նորաստեղծ կուսակցությունը։ Այդ մասին գուժել է Աբրահամյանի հայաստանյան խոսնակ Արամ Սարգսյանը՝ Դեմկուսի նախագահը։ Նա ասել է, որ կուսակցություն ձեւավորելու փոխարեն շարժում կնախաձեռնեն, հոկտեմբեին տնտեսական ֆորում կանցկացնեն, դրանից հետո լայն թափով գործունեություն կծավալեն. «Մենք հոկտեմբերի 2-5-ը նախապատրաստվում ենք բիզնես ֆորում անցկացնել, որն իր նպատակները արդեն հայտարարել է՝ ՀՀ տնտեսության զարգացմանը նպաստելն է: Եվ այդ առումով մենք բավականին մեծ աշխատանք ենք կատարել, որի մասին ավելի կմանրամասնենք: Մեր խնդիրն այս պահին դա է»,- պարզաբանել է Արամ Սարգսյանը: Դատելով գործողությունների ընթացքից՝ խոստացած շարժումն էլ կտապալվի, որովհետեւ ամիսներ առաջ հայտարարվեց, որ տնտեսական ֆորումը պատրաստվում են անել հունիսին, իսկ հիմա մի քանի ամսով հետաձգում են։ Երբ անցած տարվա հոկտեմբերին «ալամ աշխարհի» նախագահը եկավ Հայաստան ու հուժկու հայտարարություններ արեց իր հնարավորությունների ու մեծ ծրագրերի մասին, շատերը կասկած չունեին, որ ապագայում Հայաստանի նոր «փրկիչ» է երեւալու, նա ասել էր, որ կուսակցություն է բացելու, որը չի ունենալու ֆինանսական խնդիրներ, եւ որի նպատակն է լինելու իշխանության գալը: Արա Աբրահամյանը չէր բացառել նաեւ իր բարձր պաշտոնի անցնելը, բայց դրանից ամիսներ հետո Աբրահամյանի թոզն անգամ չերեւաց Հայաստանում, նա գաղտագողի ժամանում ու մեկնում էր հայրենիքից՝ այդպես էլ չհստակեցնելով իր քաղաքական ծրագրերի հարցը։ Այդ ընթացքում խոսեցին մամուլի աղբյուրները, որ Արա Աբրահամյանի կուսակցություն ստեղծելու գաղափարը ճզմվել է հենց նույն օրը՝ հայաստանյան հայտնի ասուլիսից ու նախագահի նստավայր այցելելուց եւ նախագահ Սարգսյանի հետ հանգամանալի զրույց ունենալուց հետո։ Հետո առաջ եկան նոր վարկածներ, որ Աբրահամյանն ինքն է փոշմանել, քանի որ նոր Սահմանադրությունը հնարավորություն չի ընձեռում երկքաղաքացիներին ղեկավար պաշտոններ ստանձնել, իսկ Աբրահամյանը ՌԴ քաղաքացի է նաեւ։ Այսինքն առնվազն երկու պատճառով Աբրահամյանը կարող էր հրաժարվել իր գաղափարից։ Դատելով նրա հրապարակային հայտարարություններից՝ իշխանությունն է արգելել շարունակել սկսածը։ Վերջին օրերին «Ազատության» ռուսաստանյան մասնաճյուղին տված հարցազրույցում Աբրահամյանը ՀՀ իշխանությունների մասին համարձակ հայտարարել է, որ իր տպավորությամբ «իշխանություն չկա»։ Մի՞թե քաղաքական մշակույթն այնքան դեգրադացվել է, իշխանությունն էլ այն աստիճան թուլացել, որ կարող է վտանգ զգալ Արա Աբրահամյանի պես ֆիգուրից, որին հայ հասարակությունն արդեն մերժել էր իր հայտնի ասուլիսի ու շեդեւր հայտարարությունների պատճառով։ Մյուս կողմից՝ իշխանությունն ինչու պետք է արգելի տնտեսական ֆորումի ծրագրի իրականացումը, որը, փաստորեն, հունիսից տեղափոխվել է հոկտեմբեր։ Գուցե Աբրահամյանն անձնական շահերից ելնելով էր նետվել քաղաքական ասպարեզ ու ցանկանում էր բարձր պաշտոններ զբաղեցնել, այլ ոչ թե հայ ժողովրդի համար, ինչի մասին նա սրտաճմլիկ հայտարարություններ էր անում։ Իսկ եթե իր պաշտոնը չի լինելու, ապա ամեն բան թող կոչի։ Անի Սահակյան
Հետևեք մեզ Viber-ում
