Հալեպի հայաբնակ թաղամասերը հրթիռակոծվում են

Հալեպում և հարակից շրջաններում զինված հակամարտությունը շարունակվում է, գրում է «Բերիո լուրերի» ֆեյսբուքյան էջը։ Ավելի քան մեկ շաբաթ է՝ ահաբեկչական խմբավորումները հրթիռակոծում են քաղաքն ամբողջությամբ։ Չկա մի վայր կամ շրջան, որը հրթիռակոծությունից տուժած չլինի. ամեն տեղ կարելի է տեսնել ավերված, քանդված  բնակարաններ, աշխատավայրեր, ավտոմեքենաներ և այլն։ Վերջին օրերին հարյուրավոր հրթիռներ են արձակվել Սուլեյմանիե, Ազիզիե, Նոր գյուղ, Թելեֆոն Հաուայի, Ժապրիե, Վիլլաներ, Սեյիդ Ալի, Մունշիե և այլ թաղամասերում։ «Բոլոր առումներով ճգնաժամային պահեր են ապրում հալեպցիները՝ ավելի քան մեկ շաբաթ անընդհատ ճչացող շտապօգնության մեքենաների ձայների ազդեցության ներքո։ Շտապօգնության ծառայողները դիակներ ու վիրավորներ են տեղափոխում։ Մերթ ընդ մերթ լսվում են ռազմական օդանավերի ու թնդանոթների հարվածների ձայները, որոնք ուղղված են զինյալների դիրքերին։ Հալեպցիները պատերազմական քաոս են ապրում։ Զինադադարը փուլ է եկել»,-գրում է «Բերիո լուրերը»։ Այս օրերին զոհվածների թվում կան հայեր. Ջորջ Թաշճյանը, Ավետիս Թորոսյանը զոհվել էին ապրիլի 25-ին, իսկ նույն օրը վիրավորված Անի Ավագյանն ավելի ուշ՝ հիվանդանոցում։ Վիրավորների թվում են Անդո Բահարյանն ու Հարութ Բաքքալյանը։ «Միջին Արևելքում Սիրիայի պատերազմական իրավիճակը դեռ հեռու է խաղաղ հանգուցալուծման հասնելուց։ Հալեպի խաղաղ բնակչությունը, կենցաղային կաթվածահար վիճակով, հրթիռակոծումների և զինյալ բախումների մեջ իր գոյատևման համար է պայքարում։ Միայն անցյալ շաբաթվա պայթյունների պատճառով հազարավոր ընտանիքներ լքել են Հալեպն ու հեռացել՝ փորձելով առավել անվտանգ վայրեր տեղափոխվել, իսկ շատերը սպասում են 2015-2016 ուսումնական տարվա ավարտին»,-գրում է «Բերիո լուրերը»։