Ինչու են թաքցրել Հրայր Թովմասյանի հարցով Վենետիկի նամակը և ինչու կարկամեց նախարարը
Ճակատագրի հեգնանքով կամ էլ պատահաբար երեկ ՍԴ նախագահը Սահմանադրական օրենքի կոպտագույն խախտմաբ հարցաքննվում էր ՀՔԾ քննիչի կողմից, և արդարադատության նախարար Ռուստամ Բադասյանը ճիշտ նույն պահին ասուլիս էր տալիս:
Կա արդյոք արդարադատություն հետհեղափոխական Հայաստանում` հարցրին լրագրողները: Նախարարը մի պահ կարկամեց, ապա հայտարարեց, թե արդարադատություն Հայաստանում կար նաև մինչև հեղափոխությունը, բայց ինքը ունի մտահոգություններ: Իսկ ինչպես է անդրադառնում արդարատության վրա վարչապետի կոչով ԱԺ-ի և դատարանների շրջափակումը, ՍԴ դատավորներին օրինական կաշառք` վաղաժամկետ թոշակ առաջարկելը: Արդարադատության նախարարը համոզված է, որ ԱԺ-ն շրջափակվել է միանգամայն օրինական ճանապարհով, իսկ դատարանների շրջափակումը ոչ թե ճմշում էր դատարանների վրա, այլ նպատակ ուներ ուշադրություն հրավիրել, որ այդ համակարգում խնդիրներ կան: Դե իսկ ՍԴ դատավորներին կենսաթոշակի ուղարկելու օրենքը, նախարարի պատկերացմամբ, հրաժարականի արժանապատիվ տարբերակն է:
Իսկ ինչպես են Նիկոլ Փաշինյանն ու նրա նշանակած նախարարը չափել դատավորների արժանապատվությունը և ինչ են անելու, եթե պարզվի, որ իրենց առաջարկած արժանապատիվ տարբերակը դատավորները չեն ընդունելու: Առանց ՍԴ համաձայնության` Հրայր Թովմասյանին հարցաքննության կանչելը և որպես մեղադրյալ ներգրավելը նույնպես արդարադատության նախարարի պատկերացրած արդարադտության և օրինականության նորմերին չեն հակասում:
Արդարադատության նախկին նախարար Արփինե Հովհաննիսյանը Ֆեյսբուքի իր էջում հայտնում է, որ Վենետիկի հանձնաժողովը ՍԴ շուրջ ստեղծված իրավիճակի կապակցությամբ նամակ է ուղարկել Արդարադատության նախարարությանը, որտեղ տրված են խիստ գնահատականներ:
«Երեկ արդարադատության նախարարությունում Վենետիկի հանձնաժողովից ՍԴ շուրջ ստեղծված իրավիճակի կապակցությամբ նամակ է ստացվել, որում ոչ միայն բացատրություններ են հայցվում, այլև բավական միարժեք որակումներ են տրվում իշխանությունների գործողություններին։
Կարծում եմ՝ ակնհայտ է, որ օրվա իշխանությունների այս անպատասխանատու եւ արկածախնդիր վարքագծի պատճառով մեր պետության միջազգային հեղինակությանը լուրջ հարված է հասցվում»,- գրել է նախկին նախարարը և կոչ արել լրագրողներին կառավարությունից պահանջել` հրապարակել դեկտեմբերի 27-ին Վենետիկից ստացված նամակը։
Սրան ի պատասխան` արդարադատության նախարարությունը տարածել է հաղորդագրություն, որ Արդարադատության նախարարությունը Վենետիկի հանձնաժողովից որևէ պաշտոնական նամակ չի ստացել. «Ինչ վերաբերում է ոչ պաշտոնական գրագրությանը՝ այն հրապարկման ենթակա չէ։ Այդուհանդերձ, տեղեկացնում ենք, որ արդարադատության նախարար Ռուստամ Բադասյանը անձնական նամակով շնորհավորել է Վենետիկի հանձնաժողովի նախագահ Ջիանի Բուքիքիոյին Սուրբ ծննդի և Ամանորի կապակցությամբ, որին ի պատասխան՝ Հանձնաժողովի նախագահը Ռուստամ Բադասյանին ևս շնորհավորել և բարեմաղթանք է հղել տոների առթիվ։
Այլ՝ ոչ պաշտոնական գրագրություններ հրապարակման ենթակա չեն»,- ասված է նախարարության Հերքում վերնագրով հաղորդագրության մեջ։
Թե ինչն են հերքել, պարզ չէ: Ավելին, ըստ ամենայնի, նրանք հաստատել են, որ ոչ պաշտոնական նամակ ամեն դեպքում ստացել են, որը չեն ուզում հրապարակել: Եթե նախարարությունը որևէ նամակ, անգամ ոչ պաշտոնական, ստացած չլիներ, ապա հանգիստ կհերքեր նաև այդ փաստը: Ընդամենը փոքրիկ ուղղում` Վենետիկի հանձնաժողովը ոչ պաշտոնական նամակներ նախարարություն չի ուղարկում, անգամ, շնորհավորանք, որի մասին նշված է նախարարության տեքստում, պաշտոնական գրագրության մաս է համարվում:
Հայկ Դավթյան
Հետևեք մեզ Viber-ում
