«2018-ին տեղի ունեցածն աննախադեպ բռնի հեղաշրջում էր, իսկ անցնող տարին՝ խոստումներով կերակրող տարի». Միհրդատ Մադաթյան (տեսանյութ)

2018 թվականի ապրիլին տեղի ունեցավ աննախադեպ բռնի հեղաշրջում թե՛ ֆիզիկական, թե՛ հոգեբանական առումով, որը մինչև օրս շարունակվում է: Այս մասին Անժելա Թովմասյանի՝ «Արմնյուզ» ՀԸ եթերում հեռարձակվող հեղինակային «Հայելու առաջ» հաղորդաշարի ժամանակ ասել է հոգեբան Միհրդատ Մադաթյանը.

«2019 թվականն սկսվեց ԱԺ արտահերթ ընտրություններից հետո, և հեղաշրջում իրականացրած ազնիվ մղումներով ժողովուրդը մտածում էր, որ ինչ-որ բան է փոխվելու, մինչդեռ անցնող տարին պարզապես խոստումներով կերակրող տարի էր»։

Հաղորդման մյուս հյուրը՝ ՀՀԿ կուսակցության անդամ Հովհաննես Սահակյանն իր խոսքում նշել է, որ կիսում է Հրանուշ Խառատյանի կարծիքը, որ անցնող տարում սպասելիքներն իսկապես շատ էին, սակայն իրավական ոլորտում պետությունը հետընթաց է ապրել. «Մենք տեսանք, որ երկրում չեն պահպանվում սահմանադրական նորմերն ու չի գործում իշխանության տարանջատման սկզբունքը։ Կա անձ, որին ենթարկվում են իշխանության երեք թևերը»։

Խոսելով ՍԴ դատավորներին վաղ կենսաթոշակի ուղարկելու օրենքի մասին՝ Հովհաննես Սահակյանն ասել է, որ այս օրենքով վիրավորում են ՍԴ դատավորներին, ասելով՝ Դուք կոռումպացված եք, մենք Ձեզ չենք վստահում, Ձեր փողը վերցրեց ու գնացեք տուն։

Ազգագրագետ Հրանուշ Խառատյանը դիտարկմամբ՝ մեկ տարվա իշխանությունից շատ բան չի կարելի սպասել, բայց այնպես չէ, որ իշխանությունը ոչինչ չի արել, օրինակ՝ ճանապարհներ է բարեկարգել, ինչին հակադարձեց Միհրդատ Մադաթյանը՝ նշելով, որ ճանապարհները բարեկարգելն առանձին տեխնոլոգիա է։ Այդուհանդերձ՝ Հրանուշ Խառատյանի համոզմամբ՝ առաջնայինն է պետության իրավական զարգացումը, որի առումով մենք ունենք սարսափելի վիճակ, ինչի հետ համաձայնեց Հովհաննես Սահակյանը. «Այսօր կան դատավորներ, որոնք իրենց աշխատասենյակներում սառած նստած են, չգիտեն՝ ինչ անեն։ Եթե այդ մարդիկ դիմում գրեն և հեռանան, կասեն` «վնգստացող» են»։

Խառատյանի կարծիքով՝ ամբողջ ցավը նրանում է, որ իրավական այս բարդ իրավիճակը նոր չէ։ Անդրադառնալով Հայաստանում պարբերաբար իրականացվող ձերբակալություններին՝ նա նշեց, որ հասարակության այն զանգվածը, որն աջակցում էր հեղափոխությանը, այսօր խորը հիասթափության մեջ է այդ թատերականացումներից։

Միհրդատ Մադաթյանի կարծիքով էլ իշխանությունները ձերբակալություններով խաղ է խաղում. «Երեկ ձերբակալեցին «5-րդ ալիք» ՀԸ-ի սեփականատիրոջը, մի քանի ժամ հետո բաց թողեցին Ռոբերտ Քոչարյանի աջակից Նարեկ Մութաֆյանին։ Որևէ մեկը կարո՞ղ է բացատրել՝ սա ի՞նչ խաղ է։ Մի բան պարզ է՝ հասարակությունը հոգնել է այսպիսի ձերբակալություններից»։