Էլիտար «ձրիակերն» ու իր արշինը

Նախագահի պաշտոնը զբաղեցնող Արմեն Սարգսյանը ստորագրել է ՍԴ դատավորներին վաղաժամ կենսաթոշակի ուղարկելու նախագիծը, որն ԱԺ-ում ընդունվեց հոկտեմբերի 11-ին։ Փորձագիտական շրջանակները իշխանության այս նախաձեռնությունը բնորոշել են որպես շանտաժի եւ դատավորներին անպարկեշտ առաջարկ անելու և պետբյուջեի միջոցներով կաշառելու մասին օրենք։ Մինչ ստորագրելը բազմաթիվ իրավաբաններ, քաղաքական գործիչներ կոչով դիմել էին նախագահին՝ հորդորելով զերծ մնալ այն ստորագրելու պատասխանատվությունից եւ օգտվելով իր սահմանադրական իրավունքից՝ նախագիծն ուղարկել ՍԴ քննությանը։ Սակայն, նախագահի պաշտոնը զբաղեցնող անձը այս անգամ էլ այս անգամ էլ հարմար չգտավ իր սահմանադրական առաքելությունը կատարել եւ ապացուցեց, որ ինքը նախագահ է աշխատում Նիկոլ Փաշինյանի մոտ։
Ինչ խոսք՝ այդ օրենքը շատ հոգեհարազատ է Ա. Սարգսյանին, քանզի ինքն այդ հայեցակարգով է ապրում՝ պետբյուջեի հաշվին զբաղեցնում է նախագահի պաշտոնն ու շրջագայում աշխարհով մեկ ու առաջ տանում սեփական բիզնես շահերը։ Երբեմն-երբեմն էլ սիրողական այցեր կատարում Հայաստան ու ընդունում ճիշտ այդպիսի որոշումներ։ Հիշեցնենք, որ հոկտեմբերի 2-ին դեռեւս անցած խորհրդարանի կողմից ընդունված աղմկահարույց նախագիծը Արմեն Սարգսյանը չստորագրեց, այլ ուղարկեց ՍԴ։ ԱԺ-ի պաշարման առիթ հանդիսացած հոկտեմբերի 2-ի օրենքի պարագայում Սարգսյանը սպասեց վերջին` 21-րդ օրվան, ապա դիմեց ՍԴ`օրենքի` Սահմանադրությանը համապատասխանելու հարցը որոշելու համար։ Սա հնարավորություն տվեց Արմեն Սարգսյանին օրենքի ընդունումից հինգ ամիս անց միայն, երբ տեղի էին ունեցել բուռն քրեաքաղաքական իրադարձություններ՝ սահմանադրական կարգի տապալմամբ խորհրդարանի արձակում, ընտրություններ, նոր խորհրդարանի ձեւավորում, ստորագրել ի սկզբանե ակնհայտ սահմանադրական օրենքը` ամենախաղաղ պայմաններում` առանց որեւէ պատասխանատվության եւ բեռի։ Այնքան խաղաղ, որ նույնիսկ ինքը` Արմեն Սարգսյանը, չպատասխանեց, թե ի վերջո ինչու էր ինքը դիմել Սահմանադրական դատարան, այլ ընդամենը իր աշխատակազմի իրավաբանական վարչության միջոցով պաշտոնապես տեղեկացրեց, որ իր ՍԴ դիմելու պատճառներից մեկն այն էր, որ օրենքի որոշ դրույթներ դարձել են բազմաթիվ իրավաբանների քննարկման առարկա։

Բանն այն է, որ այդ օրենքը չէր բխում Նիկոլ Փաշինյանի շահերից եւ Արմեն Սարգսյանին պետք էր այդպես մտածել, իսկ ՍԴ դատավորների «պարապության» նպաստի հայտնի նախագիծն իշխանությունն օրակարգ է բերել հատուկ նպատակով՝ չեզոքացնելու ՍԴ նախագահ Հրայր Թովմասյանին։ Ոի չնայած այն բանի, որ հիմա էլ ավելի բազմաթիվ իրավաբանների քննարկման առարկա էր սույն ձեռնարկը հանդիսացել, սակայն դա չխանգարեց մեր էլիտար տուրիստին ստորագրել նախագծի տակ։Սարգսյանն իր ստորագրությամբ դարձավ հակասահմանադրական այդ օրենքի համահեղինակ և հավասարապես պատասխանատու է լինելու դրա հետևանքների համար։
Ինչ մնում է ՍԴ դատավորներին, ապա նրանք պետք է այնքան արժանապատվություն, իրավական գիտակցություն ունենան, որ հրաժարվեն հանրության հաշվին ձրիակերությամբ զբաղվելու կեղտոտ առաջարկից։
Ի դեպ, իշխանությունը Սարգսյանի ստորագրելուն պես արդեն անցել է դատավորներին ճնշելու գործուն քայլերի։ ՀՔԾ քննիչներ են այցելել ՍԴ եւ պարզ է, որ փորձում են հոգեբանական ճնշում գործադրել դատավորների վրա։

Անի Սահակյան