Ով է կազմակերպելու իրավապահների «հուղարկավորությունը»
Իշխանությունները ծանր են տանում, երբ մամուլն ու փորձագիտական շրջանակները պատեհ առիթներով բարձրաձայնում են, որ թավշյա իրադարձություններից հետո Հայաստանում իրավապահ համակարգը մահացել է, հուղարկավորող չկա:
Այն, ինչ անում են այդ անվան տակ հանդես եկողները, հեռու է իրավաբանությունից ու տեղավորվում է քաղաքական դաշտում: Հոկտեմբերի 27-ի գործով Սամվել Ուզունյանի Հայաստանից հեռանալու պատմությունը լավագույնս բնորոշում է իրավապահների գործունեությունը եւ ջրի երես հանում նրանց ողջ «պրոֆեսիոնալիզմը»:
Մի քանի օր առաջ հիտերիա բարձրացավ 51 հազար դոլար կաշառքի մեջ մեղադրվող Ուզունյանի «փախուստի» վերաբերյալ:
Իրավապահների տարածած հաղորդագրություններից պարզ դարձավ, որ նախկին դատավորը կարողացել է հեռանալ երկրից ճիշտ այն օրը, երբ իրեն մեղադրանք է առաջադրվել: Թե ինչպես է հաջողվել Ուզունյանին լքել երկիրը, երբ օդանավակայանում իր ուղեբեռում փամփուշտ է հայտնաբերվել, սրա պատասխանը կարող են տալ միայն իրավապահները:
Ճամպրուկը թողնելով Զվարթնոց օդանավակայանում՝ փաստ է, որ Ուզունյանը հաջողացրել է մեկնել Ռուսաստան։
Գլխավոր դատախազի խորհրդականը հայտնեց, որ դատախազի տեղակալը դեռևս ուրբաթ օրը Ուզունյանի նկատմամբ հետապնդում հարուցելու և նրան ազատությունից զրկելու միջնորդություն է ներկայացրել Բարձրագույն դատական խորհուրդ (ԲԴԽ), որը նույն օրը բավարարել է։ Դրանից հետո գլխավոր դատախազի տեղակալը որոշում է կայացրել նախկին դատավորին մեղադրյալ ներգրավելու վերաբերյալ և գրություն ուղարկել Հատուկ քննչական ծառայություն (ՀՔԾ), որպեսզի անձին առաջադրվի մեղադրանք և լուծվի խափանման միջոցի հարցը։ Շաբաթ օրն արդեն ՀՔԾ-ն դիմել է դատարան, որոշ տեղեկություններով դատարանը պետք է վճռեր կալանավորել Ուզունյանին, մինչ այդ որոշումը պաշտոնապես կլիներ, նախկին դատավորը լքել է Հայաստանը : Ինչ է ստացվում, ստացվում է, որ Ուզունյանը եղել է իրավապահ կառույցների ուշադրության ներքո, սակայն վերջիններս կամ չեն կարողացել իրենց պարտականությունները կատարել եւ նրան պահել իրենց վերահսկողության ներքո, կամ էլ միտումնավոր թույլ են տվել, որպեսզի հեռանա երկրից, որպեսզի հետո մեծ աղմուկ բարձրացնեն, թե հերթական նախկինը փախուստի դիմեց: Այս իշխանության մեկուկես տարիների ընթացքը ցույց տվեց, որ նախկիններից որեւէ մեկի դեմ հարուցված գործը իրավական տիրույթում չէ եւ նրանց բոլորի նկատմամբ քաղաքական հաշվեհարդար են փորձում տեսնել: Ուստի ավելի լավ է թողնել, որ դատավորը հեռանա, բայց թմբկահարել այդ փաստը, քան մնա այստեղ եւ դատավարությունը ջրի երես հանի գործընթացի ողջ խայտառակությունը:
Մի ուշագրավ դրվագ էլ կա այս պատմությունում, դա Ուզունյանի ուղեբեռում հայտնաբերված փամփուշտն է: Ինչպես եւ երբ հայտնվեց այդ փամփուշտը ճամպրուկի մեջ, կարելի է ենթադրել: Մի բան հաստատ է, որ կասկածյալը, ով ցանկանում էր ժամ առաջ լքել Հայաստանը, որեւէ կասկածելի իր չէր տանի իր ուղեբեռում: Իսկ դա նշանակում է, որ մինչ նրա նկատմամբ մեղադրանք առաջադրելը, նրան կալանավորելու որոշում կայացնելը օդանավակայանում նախապես իմացել են, որ նրան չի կարելի դուրս թողնել ու ուղեբեռում կասկածելի իր են գցել: Ահա սա մեր իրավապահների եւ իշխանության իրական դեմքը:
Անի Սահակյան
Հետևեք մեզ Viber-ում
