Բյուջեն թալանելը պոզով-պոչով է լինո՞ւմ

Վարչապետ Նիկոլ Փաշինյանի կինը ձեռնոց է նետել պաշտպանության նախկին նախարար Սեյրան Օհանյանի տիկնոջը, Աննա Հակոբյանն անդրդվելի է ինչպես որեւէ նախկին ղեկավարի կին: Նա կրակն է ընկել իր ակտիվության ձեռքը եւ հենց այդ ակտիվության պատճառով է, որ ԶԼՄ-ներում օրը մի սկանդալ է պայթում տիկնոջ ու իր ընտանիքի վերաբերյալ: Չէին հասցրել մարսել ու արդարանալ Մարիամ Փաշինյանի համար բյուջեի միջոցներով գնված ամենագնացի պատմությունը, երբ համացանցումը նոր քննարկում մոլեգնեց:

Երեկ վարչապետի տիկին Աննա Հակոբյանն իր ֆեյսուքյան էջում գրառում էր արել՝ անդրադառնալով ավտեմեքենայի մասին մամուլի հրապարակումներից մեկին:
Գրառման տակ ֆեյսբուքյան օգտատերերից մեկը Աննա Հակոբյանին «մեղադրել էր» անկեղծ չլինելու մեջ՝ նշելով, որ վարչապետի տիկնոջ վարսահարդարումը և դիմահարդարումը մեկ տարվա կտրվածքով ՀՀ հարկատուների վրա նստել է մոտ 39 000 դոլար։

Ի պատասխան Աննա Հակոբյանը գրել է.«Անկեղծ եմ, ուզո՞ւմ եք հրաժարվեմ վարսահարդարումից և դիմահարդարումից, և ամեն տեղ ներկայանամ իմ բնական տեսքով, ես դա կանեմ առանց որևէ բարդույթի, բայց արդյո՞ք դուք և բոլորը հավանության կարժանացնեք դա: Պարտավոր ենք հաշվետու լինել, և հաշվետու ենք, դիմահարդարման և վարսահարդարման համար էլ, կներեք, անձնական գումարներ չունենք, որովհետև պետական բյուջեն տակից չենք թալանում և հարստություն դիզում»:

Նախ անհասկանալի է, թե ինչու է տիկին Հակոբյանը սպառնում իր բնական տեսքով, այո, մենք ձեզ տեսել ենք այդպիսին եւ ոչ մի սարսափելի բան չկա, որ հարց ծագի մեր հավանություն տալուն կամ չտալուն: Այո, ուզում ենք տիկին Աննա, հրաժարվեք այդ քաղքենի կյանքից, որը վարում եք մեր՝ հարկատուներիս հաշվին: Իսկ եթե այդ կյանքը ձեզ շատ է դուր եկել, ապա ծախսերը հոգացեք ինքներդ:

Արդարացումը, թե բյուջեն տակից չեք թալանում եւ հարստություն դիզում, դրա համար էլ բոլոր ձեր ծախսերը բյուջեից եք անում ու թափանցիկ հայտարարում այդ մասին, առնվազն ծիծաղելի է: Բյուջեն թալանելը պոզով-պոչով է լինո՞ւմ:

Եթե միայn ձեր արտաքին խնամքի համար տարեկան 40 հազար դոլար է ծախսվում, ապա կարելի է պատկերացում կազմել ձեր բոլոր ծախսերի մասին: Եւ վերջապես, որն ձեր ակտիվության ՕԳԳ-ն, ընդհանրապես ով է ձեզ պարտադրում տարին տասներկու ամիս շրջագայել ձեր ամուսնու հետ, որ մի հատ էլ մտածեք ձեր թանկարժեք տեսքի համար: Մենք, ի վերջո, տեսել ենք նախկին ղեկավարների տիկնանց, որոնք իրենց ամուսինների հետ հազվադեպ այցերի ժամանակ ոչ դիմահարդար էին տանում, ոչ վարսահարդար, նախապես գնում էին վարսավիրանոց ու հարցն այդքանով ավարտվում էր:

Անի Սահակյան