Վարորդներին տոնական տհաճ անակնկալ է սպասվում. բողոքի նոր ալիք է հասունանում

Տնտեսական հեղափոխության փնտրտուքը Նիկոլ Փաշինյանին ու նրա թիմին նոր երևակայական քայլերի է մղում: Մարդիկ հավանաբար երկար-բարակ մտածել են, թե ինչ

ճանապարհով, ումից և ինչպես հավելյալ գումարներ գանձեն, որ կարողանան բյուջեում շատ փող ունենալ: Եվ ահա ելքերը գտել են. վարորդների թիվը գնալով ավելանում է, մեքենաների ներմուծումը, 2019 թվականին առաջին 10 ամսվա տվյալներով, ավելացել է 70 տոկոսով, հետևաբար ճիշտ ժամանակն է նրանցից նոր տուրքեր գանձել:
ԱԺ ԲՀԿ խմբակցության պատգամավոր Նաիրա Զոհրաբյանն իր ՖԲ էջում գրում է, որ մի քանի օր առաջ խորհրդարանական մեծամասնությունը ընդունել է «Ճանապարհային երթևեկության կանոնակարգման բալային համակարգի ներդրման» օրենքի նախագիծը։
«Փոքրիկ «սպռավոչկա» վարորդների համար, որ հանկարծ էս նախատոնական ֆոնին անակնկալի չգան ու խելոք գնան վարչական դատարան։
Եւ այսպես, եթե պետավտոտեսուչը ձեզ տուգանում է, ասենք, 2 հազար դրամ, բայց դուք վստահ եք, որ այդ օրինախախտումը չեք կատարել, բողոքարկելու եւ վարչական դատարան դիմելուց առաջ խորը շունչ քաշեք։ Որովհետեւ, եթե նախկինում վարորդները վարչական մարմնի որոշումների բողոքների մասով պետական տուրքից ազատված էին, հիմա վարչական դատարան դիմելու եւ բողոքարկելու համար պիտի վճարեն 4 հազար դրամ։ Անգամ, եթե ձեզ տուգանել են հազար դրամ, բայց դուք պետավտոտեսուչի գրած ակտը ուզում եք բողոքարկել, պետք է վճարեք 4 հազար դրամ։
Ահա էսպես, հպարտ եւ աննկուն իմ հայրենակիցներ։
Եւ ուրեմն, ինչպես ասվում է դասական գրականության մեջ՝ հանգիստ նստեք տեղներդ ու խելոք վճարեք պետավտոտետուչի գրած ակտը։
Հուսով եմ, որեւէ մեկի ամանորյա մաժորը չհարամեցի»,- տեղեկացնում է Զոհրաբյանը։
Շարունալով նորամուծությունների շարքը՝ նշենք, որ Վարչական իրավախախտումների վերաբերյալ օրենսգրքում փոփոխությունների և լրացումների ու կից օրինագծերի փաթեթով նախատեսվում է տրանսպորտային միջոցներ վարելու իրավունք ունեցող անձին վարորդական վկայական ստանալու օրվանից մեկ տարի ժամկետով տրամադրել 9 միավոր: Խախտում արձանագրելու դեպքում վարչական իրավախախտում կատարած անձին տվյալ տարում տրված ընդհանուր միավորներից հանվում են տուգանային միավորներ։
Խախտում ամրագրելու դեպքում վարչական իրավախախտում կատարած անձին տվյալ տարում տրված ընդհանուր միավորներից ինքնաշխատ եղանակով հանվում են օրենսգրքի համապատասխան հոդվածով նախատեսված իրավախախտման համար սահմանված տուգանային միավորները: Երթևեկության ոլորտի 100 զանցակազմերից այս պահին տուգանային միավորներ նախատեսված են շուրջ 20-ի համար։
Ենթադրվում է, որ վարորդական վկայական ունեցող բոլոր քաղաքացիների նկատմամբ նոր համակարգի համաչափ կիրառումը սոցիալական բեռ է դառնալու հատկապես տաքսու վարորդների համար: Օրենքով չկա տարանջատում՝ օրվա մեջ մի քանի ժամ և ամբողջ օրը երթևեկող վարորդների համար նույն բալային համակարգն է գործում: Մինչդեռ, եթե տրանսպորտային միջոցը մարդու համար զուտ փոխադրամիջոց է, դա այլ խնդիր է, բոլորովին այլ է, եթե մարդիկ գրեթե 10-12 ժամ ղեկին են նստած: Անընդհատ երթևեկող վարորդների դեպքում մանր խախտումներով միավորներ կորցնելու հավանականությունն ավելի մեծ է, հատկապես որ Հայաստանում ճանապարհների վիճակը դեռևս հեռու է միջազգային չափանիշներով բարվոք համարվելուց: Եվրոպական երկրներում, որտեղ այս համակարգը գործում է վաղուց, անորակ ճանապարհների համար վարորդները իրավունք ունեն դատի տալ պատկան մարմիններին: Իսկ եթե մեզ մոտ այդ պրակտիկան ներդրվի, պետության բյուջեն հազիվ թե բավարարի դրա տակից դուրս գալու համար:
Մի խոսքով՝ տոներից հետո՝ դեռ տոնածառը չհավաքած, վարորդները կհավաքվեն կառավարության շենքի մոտ՝ բողոքի ցույցի:

Հայկ Դավթյան