Նոր զարգացում Քոչարյանի գործով
ՀՀ ոստիկանության կազմակերպված հանցավորության դեմ պայքարի գլխավոր վարչությունում ստացված տեղեկությունների հիման վրա իրականացված լայնածավալ օպերատիվ-հետախուզական միջոցառումներով եւ արդյունքներով նախապատրաստված նյութերով փաստական տվյալներ են ձեռք բերվել, որ Ռոբերտ Քոչարյանի աջակիցները հանդիպում են 2008 թվականի մարտի 1-ի դեպքերից տուժած անձանց և ականատես վկաների հետ ու նրանց փորձում են կաշառել, որպեսզի վերջիններս հրաժարվեն իրենց ցուցմունքներից։ Այս մասին տեղեկացրին ՀՀ ոստիկանության հասարակայնության հետ կապերի և լրատվության վարչությունից։
«Մասնավորապես, Ռոբերտ Քոչարյանի աջակիցներից մեկը Քանաքեռում գտնվող իր գրասենյակ է հրավիրել մարտի 1-ի դեպքերից տուժած անձանցից մեկին ու առաջարկել հրաժարվել տուժողի կարգավիճակից, տված ցուցմունքից և չներկայանալ դատական նիստերին՝ հայտնելով, որ պատրաստ է վճարել այն գումարը, որը պետք է պետությունը տրամադրի որպես դրամական աջակցություն։ Բացի այդ, խոստացել է, որ իշխանափոխությունից հետո տուժողին կնշանակեն բարձր պաշտոնի։
Դեպքի առթիվ ոստիկանությունում քրեական գործ է հարուցվել։ Քրեական գործի շրջանակներում ի թիվս այլ գործողությունների կատարվել են խուզարկություններ։ Հանգամանքները քննությամբ պարզվում են»,- նշված է հաղորդագրության մեջ։
Այս հաղորդագրությունը կարելի է դասել նախագահ Ռոբերտ Քոչարյանի աջակցության հանրային շարժմանը հակազդելու իշխանական միջոցառումների շարքում: Ըստ ամենայնի հող է նախապատրաստվում հերթական դատական նիստից առաջ հիմնավորելու այն թեզը, որ ազատ արձակման դեպքում երկրորդ նախագահը ճնշումներ կգործադրի և կխնագարի գործի քննությանը: Սա նաև դատարանի վրա ճնշում գործադրելու պատրվակ է:
Իշխանության գործողություններն այս առումով գնալով ավելի ու ավելի պարզունակ և կանխատեսելի են դառնում: Զուտ իրավական տեսանկյունից, քանի դեռ հաղորդագրության մեջ ներկայացված տեքստը հիմնավորված չէ փաստերով, Քոչարյանի անվան շրջանառումն արդեն իսկ քաղաքական հետապնդում է և անմեղության կանխավարկածի կոպիտ խախտում:
Հայկ Դավթյան
Հետևեք մեզ Viber-ում
