Ասում էինք `շատ մի դատեք, դատվել կա. Արսեն Բաբայանի հոդվածը ո՞ւմ վրա է դրվելու

«Լույս» խմբակցության ղեկավար Դավիթ Խաժակյանը
Երևանի քաղաքապետարանում տեղի ունեցած պաշտոնեական կեղծիքի վերաբերյալ հաղորդում է տվել հանցագործության մասին: Խնդիրը քաղաքապետ Հայկ Մարությանի բացակայության ժամանակ փոխքաղաքպետ Հայկ Սարգսյանի կողմից քաղաքապետի լիազորությունների կատարմանը և դրան առնչվող իրավական ակտերին է վերաբերվում:
Համաձայն Երևան քաղաքում տեղական ինքնակառավարման մասին ՀՀ օրենքի 48-րդ հոդվածի` քաղաքապետի առաջին տեղակալը փոխարինում է քաղաքապետին վերջինիս բացակայության ժամանակ: Քաղաքապետի առաջին տեղակալը պետք է լինի Երևանի ավագանու անդամ: Հիշեցենք, որ ավագանու անդամ է նաև Երևանի քաղաքապետը: Մյուս փոխքաղաքապետերը ավագանու անդամ չեն, և  իրավասություն չունեն կատարելու քաղաքապետի պարտականությունները:

Բայց արի տես, որ Հայկ Մարությանի բացակայության ժամանակ, նրան փոխարինել է քաղաքապետի տեղակալ Հայկ Սարգսյանը, մինչդեռ նա քաղաքապետի առաջին տեղակալը չէ, հետևաբար չէր կարող փոխարինել: Բայց սա էլ մի կողմ. պարզվում է` Երևանի քաղաքապետի կարգադրությունը, որով Հայկ Մարությանի արձակուրդում գտնվելու ժամանակ պարտականությունների կատարումը վերապահվել է փոխքաղաքպետ Հայկ Սարգսյանին, քանի որ առաջին տեղակալ Հրաչյա Սարգսյանը երկրում չի եղել, փաստաթղթային կեղծիք է:

«Այսօր ստացել եմ քաղաքապետի կարգադրությունը՝ Հայկ Մարությանին արձակուրդ տրամադրելու մասին, որով լիազորությունները վերապահվում էր նաև քաղաքապետի տեղակալ Հայկ Սարգսյանին: Տեղի է ունեցել պաշտոնեական կեղծիք, և նոյեմբերի 4-ին այս որոշումը ստեղծվել է և հետին ամսաթվով՝ հոկտեմբերի 17-ով գրվել է թուղթ, որն իրականում գրվել էր նոյեմբերի 4-ին: Դուք ինձ տալիս եք փաստաթուղթ՝ քաղաքապետի ստորագրությամբ, ասում եք՝ այս մեկն է: Ես ունեմ այդ նույն կարգադրությունը, բայց այդտեղ Ձեր ստորագրությունը չէ: Սա այն փաստաթուղթն է, որը դուք փոխել եք»,- ավագանու նիստում հայտարարել է Դավիթ Խաժակյանը և ցուցադրել է իր ձեռքի տակ եղած քաղաքապետի երկու կարգադրությունները, որոնցից մեկը, նրա պնդմամբ, կեղծված է:
Քաղաքապետի խորհրդական Կարեն Համբարձումյանը, արձագանքել է, ասելով, որ կատարվածն անօրինականության հետ որևէ կապ չունի:
Բայց փաստն ինքնին, որր Երևանի քաղաքապետի պարտականությունները կատարել է Հայկ Սարգսյանը` չունենալով դրա իրավունքը, ինքնին խոսուն է: Երկրորդ փաստը, թե իրականում ով է ստորագրել քաղաքապետի այն կարգադրության տակ, որով Հայկ Սարգսյանին են վերապահվել քաղաքապետի լիազորությունները, դեռ պետք է ճշգրտել: Եթե պարզվի, որ կարգադրությունը ստորագրվել է հետին ամսաթվով, ապա դա պաշտոնական կեղծիք է: Իրավիճակն հենց այս կետից դառնում է ինտրիգային. բանն այն է, որ պաշտոնական փաստաթղթեր կեղծելու մեղադրանքով գործ էր հարուցվել ԱԺ աշխատակազմի ղեկավարի նախկին տեղակալ Արսեն Բաբայանի նկատմամբ: Բաբայանը մոտ 20 օր մնաց կալանիք տակ: Հիմա եկել է պահը, որ իշխանությունը ցուցաբերի նույն սկզբունքայնությունն ու հետևողականությունը և կալանավորի Երևանի քաղաքապետարանի այն պաշտոնատար անձին, ով հետին ամսաթվով քաղաքապետի կարգադրություն է արձակել:
Ասում էինք` շատ մի դատեք, դատվել կա:

Հայկ Դավթյան