Խաչատուր Սուքիասյան-Ռուբեն Հայրապետյան. Նիկոլ Փաշինյանին հաջողվեց պայթեցնել
Խաչատուր Սուքիասյան-Ռուբեն Հայրապետյան հեռահար բանավեճը և ընդհանրապես Ռուբեն Հայրապետյանի հրապարակային հայտարարություններով ջրի երես դուրս եկած զարգացումները ցույց են տալիս, որ հին ու նոր ինտրիգները շարունակում են մնալ կառավարման գործում:
Անդրանիկ Քոչարյանի և Ռուբեն Հայրապետյանի երբեմնի ընկերությունը, որի մասին առաջինը խոսեց Հայրապետյանը, դեռևս 90-ականերից է սկիզբ առել: Ըստ տեղեկությունների` ժամանակին Ռուբեն Հայրապետյանը խնդիրներ է ունեցել իրավապաների հետ, և այն ժամանակ իշխանության հետ սերտ կապեր ունեցող Անդրանիկ Քոչարյանը օգնել է Հայրապետյանին` ազատվել քրեական հետապնդումից: Հետագայում արդեն Ռուբեն Հայրապետյանը տարիներ շարունակ տարբեր հարցերում աջակցել է Անդրանիկ Քոչարյանին, և այսպես ձևավորվել է նրանց ընկերությունը: Եվ հիմա, երբ Ռուբեն Հայրապետյանի շուրջ օղակն ակնհայտորեն սեղմվում է, Անդրանիկ Քոչարյանը, հանուն հին ընկերության, երրորդ անձի միջոցով փորձել է նախազգուշացնել, որը մարդկային և բարոյական տեսանկյունից նորմալ քայլ է: Լինելով իշխանության ներկայացուցիչ` Անդրանիկ Քոչարյանը, պարզ է, չէր կարող այլ բան անել, քան հրապարակավ հերքել, որ ինքը Ռուբեն Հայրապետյանին խորհուրդ է տվել հեռանալ երկրից, որովհետև Նիկոլ Փաշինյանը հրահանգել է ձերբակալել նրան: Փաստացի Նիկոլ Փաշինյանին հաջողվեց փչացնել նրանց հարաբերությունները:
Ինչ վերաբերում է Խաչատուր Սուքիասյան-Ռուբեն Հայրապետյան հակամարտությանը, որը նույնպես տարիների պատմություն ունի. մեր տեղեկություններով` վերջին շրջանում նրանց հաշտեցմանն ու բիզնես հաշիվների կարգավորմանը խառնվել էր Գագիկ Ծառուկյանը, որը, հիշեցնենք, Սուքիասյանի խնամին է: Բայց այս պահին Բջնի գործարանի շուրջ ընդհանուր հայտարարի գալու տարբերակն արդեն փոշիացված է, բացի այդ` որոշակի լարվածություն է մտցվել անգամ Ծառուկյանի և Սուքիասյանի ընտանեկան հարաբերությունների մեջ:
Այս ընդհանուր տապալված հարաբերությունների ֆոնին ուժեղացած ու շահած է դուրս գալիս Նիկոլ Փաշինյանը, որից այս խառը պատմության բոլոր գործող անձինք առանձին վերցրած ունեն կախվածություն: Տարբեր կենտրոններին և ազդեցիկ անձանց` միմյանց դեմ լարելով` սեփական իշխանության ամրապնդումը կառավարման այն մեթոդներից է, որին լայնորեն տուրք էր տալիս Սերժ Սարգսյանը: Նույն բանն այժմ մեծ վարպետությամբ իրականացնում է նաև Նիկոլ Փաշինյանը` հերթով պայթեցնելով բոլոր հեռանկարային հարաբերությունները:
Նաիրա Բաղդասարյան
Հետևեք մեզ Viber-ում
