Միանում եմ Աննա Հակոբյանի հրավերին, և Մեհրիբան Ալիևային հրավիրում եմ Արցախ՝ մուղամ լսելու, բայց նաև հայկական-ժողովրդական երգեր էլ պետք է լսենք․ Գառնիկ Իսագուլյան. video
Ես վաղուց եմ ասել, որ դեպքերի նման շարունակության դեպքում մենք ոչ միայն Ռոբերտ Քոչարյանին կտեսնենք կալանքի տակ, այլև՝ Սերժ Սարգսյանին, Արցախի նախկին-ներկա նախագահներին: Այս մասին Անժելա Թովմասյանի՝ «Արմնյուզ» ՀԸ եթերում հեռարձակվող հեղինակային «Հայելու առաջ» հաղորդաշարի ժամանակ ասել է «Ազգային անվտանգություն» կուսակցության նախագահ Գառնիկ Իսագուլյանը՝ անդրադառնալով ՀՀ երրորդ նախագահ Սերժ Սարգսյանին առաջադրված մեղադրանքին:
Գառնիկ Իսագուլյանի խոսքով՝ հնարավոր է Արցախի հարցում այնպիսի սցենար զարգանա, որի հետևանքով որոշվի կալանավորել Սերժ Սարգսյանին:
ՀՀ նախկին վարչապետ, քաղաքական գործիչ Խոսրով Հարությունյանի կարծիքով էլ՝ այս իշխանության նպատակն է մինչև վերջ սևացնել նախկիններին. «Ես միշտ ասել եմ՝ ինձ համար կան սիմվոլներ: Կալանավորել նախկին նախագահին, դա նույնն է, ինչ կալանքի տակ վերցնել պետականությունը»:
Անդրադառնալով Մեհրիբան Ալիևայի վերջին հայտարարությանն առ այն, որ նա ցանկանում է մուղամ լսել Արցախում, որին արձագանքել է նաև ՀՀ վարչապետի տիկին Աննա Հակոբյանը, Ադրբեջանի հարցերով փորձագետ Անժելա Էլիբեգովան ասել է, որ Աննա Հակոբյանի ընդհանուր հայտարարությունում խնդրահարույց կետեր կային: Ըստ նրա՝ Աննա Հակոբյանն իր խոսքում միտումնավոր չշեշտեց, որ խախտումների մեղավորը ադրբեջանական կողմն է:
Գառնիկ Իսագուլյանի դիտարկմամբ՝ Աննա Հակոբյանը պարզապես Նիկոլ Փաշինյանի կինն է, ով ասում է բաներ, որոնք Նիկոլ Փաշինյանը պետք է ասեր. «Աննա Հակոբյանը շարունակում է Նիկոլ Փաշինյանի տրամաբանությունը: Միանում եմ Աննա Հակոբյանի հրավերին, և Մեհրիբան Ալիևային հրավիրում եմ Արցախ՝ մուղամ լսելու, բայց նաև հայկական-ժողովրդական երգեր էլ պետք է լսենք»:
Խոսրով Հարությունյանն էլ նշում է, որ Աննա Հակոբյանի խոսքի նպատակն այլ է: Նա պարզապես ուզում է ցույց տալ, որ ինքը խաղաղության կողմնակից կին է:
Անդրադառնալով Արցախի շուրջ բանակցությունների ներկա իրավիճակին՝ Անժելա Էլիբեգովան ասել է, որ Բրատիսլավայում մեզ դրդում են, որ գնանք բուն բանակցային գործընթացին, մինչդեռ հայկական կողմը վերջին մոտ երկու տարվա ընթացքում փորձել է մարդասիրական գործունեություն ծավալել:
Խոսրով Հարությունյանը ուշադրությունը հրավիրեց Ադրբեջանի ԱԳ նախարար Մամեդյարովի ու ՌԴ ԱԳ նախարար Լավրովի բրիֆինգին, որի իրական հասցեատերը Հայաստանն էր, ոչ Ադրբեջանը. «Ինձ համար առաջին անգամ մենք ունենք մի իրավիճակ, որ Ռուսաստանը հարավային ուղղությամբ արդեն ունի մի քանի ռազմավարական գործընկերներ, որոնց թվում է նաև Ադրբեջանը, որը ոչ թե հետևողի ու լսողի դերում է, այլ՝ պահանջներ դնողի»:
Հետևեք մեզ Viber-ում
