Հեղափոխությո՞ւն, թե՞ բ..-ի զավակ. ի՞նչ տարբերություն` զինվորի՞ փողն ես ուտում, թե՞ դպրոցի

Հեղափոխության ժառանգները սկսել են խժռել հեղափոխութկամ արժեքները: Նիկոլ Փաշինյանի հայտարարած զրո կոռուպցիա կոնցեպտն այլևս արդիական չէ:

Նախօրեին հայտնի դարձավ, որ առանձնապես խոշոր չափի կաշառք վերցնելու մեղադրանքով ձերբակալվել է կրթության, գիտության, մշակույթի և սպորտի նախարարի տեղակալ Գևորգ Լոռեցյանը:
<<Հայաստանի Հանրապետության ազգային անվտանգության ծառայության աշխատակիցների կողմից, կոռուպցիայի դեմ պայքարին ուղղված գործառույթների իրականացման շրջանակներում ձեռնարկված մեծածավալ օպերատիվ-հետախուզական միջոցառումների արդյունքում, 2019թ. դեկտեմբերի 4-ին, առանձնապես խոշոր չափերով կաշառք ստանալու կասկածանքով, բերման է ենթարկվել ՀՀ կրթության, գիտության, մշակույթի և սպորտի նախարարի տեղակալը, ինչպես նաև վերջինիս վարորդն ու ՀՀ-ում գործող ֆուտբոլային ակումբներից մեկի նախագահը, ով միաժամանակ հանդիսանում է նաև մի շարք մատակարարող ընկերությունների փաստացի ղեկավարը:
Ձեռք բերված նախնական տվյալների համաձայն՝ ՀՀ ԿԳՄՍ նախարարի տեղակալը, նախարարության ենթակա հիմնարկների կարիքների համար մարզագույքի և մարզահագուստի ձեռքբերման նպատակով հայտարարված մրցույթներում աջակցություն ցուցաբերելով վերոնշյալ տնտեսվարողին, դրա դիմաց վարորդի օժանդակությամբ պայմանավորվածություն է ձեռք բերել ստանալ առանձնապես խոշոր չափերով կաշառք գումար:
Տնտեսվարողի կողմից գումարի մի մասը նախարարի տեղակալի վարորդին փոխանցելուց անմիջապես հետո վերջիններս բռնվել են:
Առերևույթ հանցագործության դեպքի առթիվ նախապատրաստված նյութերը փոխանցվել են ՀՀ ԱԱԾ քննչական դեպարտամենտ>>,-- նշվում է ԱԱԾ տարածած հաղորդագրության մեջ:
Օգոստոսի 29-ին, կառավարության որոշմամբ, կրթության, գիտության, մշակույթի և սպորտի նախարարությանը հատկացվեց ավելի քան 523 մլն դրամ գումար` մարզագույքի ձեռքբերման համար, որը ԿԳՄՍՆ պաշտոնական տեղեկատվության համաձայն, նախատեսված էր հանրակրթական, միջին մասնագիտական և բարձրագույն ուսումնական հաստատությունների, ինչպես նաև մանկապատանեկան մարզադպրոցների, մարզաձևերի ազգային ֆեդերացիաների և այլ մարզական, հասարակական կազմակերպությունների համար` մարզական գույք ձեռք բերելու պետական ծրագրի իրրագործմանը: Գևորգ Լոռեցյանին վերագրվող կոռուպցիոն մեղադրանքը թերևս այս ծրագրին է առնչվում:
Գևորգ Լոռեցյանը Քաղաքացիական պայմանագիր կուսակցության անդամ է, ընդամենը 25 տարեկան: Հեղափոխությունից անմիջապես հետո նա նշանակվել էր սպորտի և երիտասարդության հարցերի փոխնախարար, իսկ կրթության և գիտության, մշակույթի և սպորտի նախարարությունների միավորումից հետո նա դարձավ սպորտի և երիտասարդության ոլորտը համակարգող փոխնախարար: Դատելով կենսագրությունից` սպորտի հետ կապ է ունեցել այնքանով, որ նախկինում եղել է VivaroNews-ի միջազգային բաժնի խմբագիրը:
Ընդամնեը մեկ տարի առաջ հեղափոխության հարթակից Նիկոլ Փաշինյանի հետ Սերժ Սարգսյանին մերժած ու կոռուպցիայի դեմ պայքարի մասին բարձրագոչ ճառեր ասող երիտհեղափոխականը, որը հեղափոխությունից հետո անսպասելի բարձր պաշտոն էր ստացել, պարզվում է` շատ արագ հեղափոխականից վերածվել է կոռուպցիոների: <<Լավ մարդ ինչքան պետք է բ...-ի տղա լինի, որ զինվորին ուղարկածը գողանա: Լավա դեպի ծով ելք չունենք, թե չէ ԱԱԾ-ն լավ ման գար, սուզանավ էլ կգտներ>>,- հեղափոխության օրերին Մանվել Գրիգորյանի ձերբակալության մասին ահա այսպիսի խրոխտ տողեր է գրել երիտասարդ Լոռեցյանը, որին ԱԱԾ-ն երեկ ձերբակալել է: Ամենևին չխախտելով անմեղության կանխավարկածը` ուզում ենք հարցնել` մարդ ինչքան պիտի բ..-ի տղա լինի, որ դպրոցին տրված պետության փողն ուտի:

Հայկ Դավթյան