Հայկ Մարությանի արաբական ձմեռը

Երևանի քաղաքապետ Հայկ Մարությանի և ԲՀԿ առաջնորդ Գագիկ Ծառուկյանի միջև հեռակա բանավեճ է ծավալվել: Ամեն ինչ սկսվեց այն բանից հետո, երբ Ծառուկյանն Ազգային ժողովում հայտարարեց, թե Հայաստանում խոշոր ներդրումներ կատարելու ցանկություն ունեցող Աբու Դաբիի թագաժառանգը Հայկ Մարությանի հետ հանդիպումից հետո հիասթափված հեռացել է:
Քաղաքապետի մամուլի խոսնակը փորձեց հերքել Ծառուկյանին` առանց հիմնավոր փաստերի: Դրան հաջորդեց Ծառուկյանի հեռուստաընկերությամբ եթեր հեռարձակված տեսանյութը, որտեղ թագաժառանգ շեյխ Սուլթան Բին Խալիֆա բին Զաիդ Ալ Նահյանի ներկայացուցիչները որոշ փակագծեր բացեցին քաղաքապետի հետ կայացած հանդիպումից ուշագրավ փակագծեր են բացել: Ջաբեր և Ադել ալ Մարզուքի եղբայրների պատմելով, իրենք հանդիպել են Երևանի քաղաքապետի և Երևանի գլխավոր ճարտարապետ Արթուր Մեսչյանի հետ` Ծառուկյանի միջնորդությամբ: Ընդ որում հանդիպման համար Ծառուկյանը, պարզվում է, զանգել է Փաշինյանին: Նրանք Երևանի քաղաքապետին առաջարկել են ներդրումային ծրագիր, մասնավորապես Երևանի կենտրոնում կառուցել բարեգործական հիվանդանոց և հյուրանոց, ինչպես նաև նորոգել մետրոյի կայարաններ: Բայց Հայկ Մարությանը մերժել է` ասլով, թե քաղաքապետարանը չի կարող համապատասխան տարածք առաջարկել, ուստի ներդրողները կարող են դիմել մասնավորին: Արաբ շեյխերը հայտարարեցին, թե իրենք վիրավորված են քաղաքապետից, ով, իրենց խոսքով, անհարգալից ընդունելություն և վերաբերմունք է ցուցաբերել:

Ավելի ուշ խնդրին անդրադարձավ նաև Երևանի քաղաքապետ Հայկ Մարությանը` Հանրային Հեռուստաընկերության եթերում «Հանրային քննարկում» հաղորդաշարի ժամանակ:
«Պարոն Ծառուկյանն առաջին անգամը չէ, որ նման հայտարարություններ է անում, և այդ հայտարարությունների հետևում փաստեր չկան,- նշել է քաղաքապետը և հավելել,- Հիասթափության մասին խոսելը սխալ կողմից է նկարագրվում։ Զանգեցին, ասացին, որ հանդիպման ցանկություն կա, կիրակի օրը հանդիպում եղավ։ Հադիպումը, քննարկումը եղավ շատ պրոդուկտիվ։ Հիվանդանոցի բարեգործական լինելու մասին ոչ մի խոսք չի եղել։ Մենք ասացինք՝ ինչով հնարավոր է կաջակցենք»,- մանրամասնել է քաղաքապետը։
Գագիկ Ծառուկյանի հայտարարությանը, որ մեծ հյուրանոց են կառուցում և քաղաքապետարանը արգելում է, Երևանի քաղաքապետը արձագանքել է․ «Պարոն Ծառուկյան, ամենայն հարգանքով, Դուք չեք տիրապետում ինֆորմացիային, որովհետև Ձեր հյուրանոցի կառուցումը կասեցվել է Ձեր հարևանի դատարան դիմելու պատճառով: Դատարանը, որպես հայցի ապահովման միջոց, կասեցրել է շինարարությունը»։
Ուշագրավ իրավիճակ է ստեղծվում` փաստացի Հայաստանի ներքաղաքական խնդիրներին ակամայից մասնակից են դառնում նաև Աբու Դաբիի թագաժառանգները: Հետաքրքիր է` ինչպես կարձագանքի կատարվածին վարչապետ Նիկոլ Փաշինյանը:

Հայկ Դավթյան