Արցախ մեկնած 2 կամավորի ազատել են աշխատանքից

Այս օրերին, երբ մի շարք տղաներ, որպես կամավոր, մեկնում էին սահման, եղել են դեպքեր, որ գործատուն աշխատանքից ազատել է նրանց,Փաստաբանների պալատի անդամ Ինեսա Վարդանյանը լրագրողներին ասաց, որ այս պահին իրեն են դիմել երկու կամավոր, որոնց աշխատանքից ազատել են աշխատանքի չներկայանալու պատճառաբանությամբ: Ինեսա Վարդանյանը  նշեց, որ իր պաշտպանյալները կգնան աշխատանքի, քանի որ ԶԼՄ-երի անդրադարձից հետո նաեւ նրանք վերականգնվել են իրենց աշխատավայրում. «Նման պատերազմական իրավիճակում իմ պաշտպանյալներից մեկը գիշերվա ժամին դուրս էր եկել տնից ու գնացել Արցախ: Նա միայն զանգով՝ բանավոր կերպով էր հասցրել հաշվապահին տեղեկացնել այդ մասին: Իրավական առումով դա թույլ ծանուցում էր: Օրենսգրքով միայն անհարգալից բացակայության դեպքում գործատուն կարող է աշխատողին ազատել աշխատանքից, մինչդեռ գործատուն դա պետք է գնահատման առարկա դարձներ, ինչն էլ նա պատշաճ կերպով չի իրականացրել: Ես սիրում եմ այդ օրինակը բերել՝ ասենք, մարդը ընկել է կոմայի մեջ, ինչպե՞ս պետք է նա իրավական ճիշտ ընթացակարգով տեղեկացներ գործատուին»: «Մեզ երկուսն են դիմել, բայց նման դեպքերը շատ են: Քանի որ հարցը հանրային հնչեղություն ստացավ, այն կկարգավորվի, և կոնկրետ մեզ դիմած երկու տղաներն էլ աշխատանքի կանցնեն: Տղաներից մեկը, օրինակ, 22 տարեկան է և սահման մեկնելուց առաջ գիշերը զանգել էր հաշվապահին, ասել, որ գնում է առաջնագիծ: Պարզ է, որ ճիշտ կլիներ` գրավոր ծանուցում ուղարկեր, բայց, միևնույն է, գործատուն իրավունք չուներ ազատելու աշխատանքից: Գործատուն ասում է` աշխատանքի չի ներկայացել, ես էլ հանել եմ աշխատանքից, սակայն նա հաշվի չէր առել մի հանգամանք, որ աշխատանքային օրենսգրքում գրված է, որ գործատուն իրավունք ունի հեռացնելու աշխատանքից, երբ աշխատակցի` աշխատանքից բացակայելը հարգելի պատճառով չէ»,- ասաց Վարդանյանը: