Կեղծ ընտրարշավը Արցախում սկսված է
Վարչապետ Նիկոլ Փաշինյանը և Արցախի Հանրապետության նախագահ Բակո Սահակյանը հանդիպում են ունեցել Արցախի նախագահական ընտրություններին իրենց թեկնածությունն առաջադրել պատրաստվող գործիչների` «Արցախի ժողովրդավարական կուսակցության» ղեկավար, ԱՀ Ազգային ժողովի գործող նախագահ Աշոտ Ղուլյանի, ԱՀ արտաքին գործերի գործող նախարար Մասիս Մայիլյանի, «Ազատ Հայրենիք» կուսակցության նախագահ Արայիկ Հարությունյանի հետ:
Ինչպես տեղեկացնում է ՀՀ կառավարության մամուլի ծառայությունը, հանդիպմանը մասնակցել է նաև ՀՅԴ Արցախի ԿԿ-ի ներկայացուցիչ, ԱՀ Ազգային ժողովի «Դաշնակցություն» խմբակցության անդամ Դավիթ Իշխանյանը։
«Հանդիպման ընթացքում անդրադարձ է կատարվել Արցախում կայանալիք համապետական ընտրությունների կազմակերպմանը, առկա քաղաքական իրավիճակին: Վարչապետը հանգամանալից անդրադարձել է նաև ղարաբաղյան հակամարտության կարգավորման գործընթացին, բանակաշինության ուղղությամբ տարվող աշխատանքներին: Նիկոլ Փաշինյանը կարևորել է Արցախում տեղի ունենալիք նախագահական և խորհրդարանական ընտրությունների ազատ, արդար, թափանցիկ և միջազգային չափանիշներին համապատասխան անցկացումը` ընդգծելով, որ ՀՀ կառավարությունն այդ գործում ամեն կերպ աջակցելու է Արցախի իշխանություններին»:
Ինչպես նկատելի է՝ Արցախի եւ Հայաստանի ղեկավարների հետ հանդիպող գործիչների ցանկից բացակայում է Արցախի հերոս Վիտալի Բալասանյանը, ով բառացիորեն մեկ օր առաջ հայտարարեց իր թեկնածությունն առաջադրելու մասին, ի տարբերություն օրինակ Դաշնակցության, որը դեռեւս որոնումների մեջ է, չի կողմնորոշվում սեփական թեկնածու առաջադրել, թե միասնական, ինչի առիթով հանդիպումների մեջ են, ի տարբերություն Մասիս Մայիլյանի, որը նույնպես կամուկացի մեջ է ու հստակ առաջադրվելու հայտարարություն չի արել: Բալասանյանին, մեր տեղեկություններով, հարկ չեն համարել հրավիրել հանդիպմանը, ինչու, կարծում ենք՝ հայտնի է բոլորին: Տեւական ժամանակ է նա բացահայտ առճակատման մեջ է ՀՀ իշխանությունների հետ ու սուր քննադատում է Հայաստանում վարվող քաղաքականությունը՝ անձնավորված, առանց երկնչելու, քանի որ նա հասկանում է, որ երկրի համար վճռական ու վտանգավոր ժամանակաշրջանում ջայլամային կեցվածքը հանցակից լինել կնշանակի: «Իհարկե, կան տարակարծություններ, բայց ես որեւէ անհատի հետ անձնական որեւէ խնդիր չունեմ, մանավանդ Նիկոլ Փաշինյանի հետ: Մենք իրար ճանաչում ենք մոտ 25 տարի: Ես դեմ եմ իր կուրսին, ես երեւույթներին եմ գնահատական տալիս: Մի քանի օր առաջ հարցազրույցներ եմ տվել եւ դա շարունակելի է լինելու: Իմ գնահատականը հետեւյալն է. երբ ժողովուրդը կվստահի ինձ, ես կառաջնորդվեմ այն օրենքներով, միջպետական պայմանագրերով, այն Սահմանադրությամբ, որը գործում է թե Հայաստանի, Արցախի տարածքում»,-երեկ հայտարարեց Բալասանյանը:
Բայց այսքանից հետո Նիկոլ Փաշինյանն առաջնորդվեց ոչ թե քաղաքական,պետական, այլ անձնական՝ նեղ մտածողությամբ՝ ցույց տալով, որ չի հանդուրժում իր հասցեին քննադատությունը, այլախոհությունը, իսկ այս պարագայում խոսել, թե աջակցելու է Արցախի իշխանություններին ազատ, արդար ընտրություններ անցկացնելու համար, առնվազն ծիծաղելի է, քանզի մեկնարկն արդեն իսկ գուժում է, որ այդ Փաշինյանը կողմնակալ է ու ոչ մի երաշխիք, որ անհավասար պայմաններ ստեղծելով առաջ կբրդի իր թեկնածուին:
Հ.Գ.-Տարակուսելի է նաեւ Բակո Սահակյանի դիրքորոշումը, թե ինչու է նա համաձայնել այսպիսի խտրական հանդիպման մասնակից դառնալ, կպարզենք առաջիկայում:
Անի Սահակյան
Հետևեք մեզ Viber-ում
